{"reader_html":"<h1 class=\"chapter-heading\">2 Samuel<span class=\"chapter-label\">Chapter 17<\/span><\/h1>\n<p class=\"verse-para\"><sup class=\"vnum\" data-v=\"1\" onclick=\"loadParallel(1,10,17,1,&quot;2 Samuel&quot;)\">1<\/sup><span class=\"vtext\">Dixit ergo Achitophel ad Absalom: Eligam mihi duodecim millia virorum, et consurgens persequar David hac nocte.<\/span> <\/p>\n<p class=\"verse-para\"><sup class=\"vnum\" data-v=\"2\" onclick=\"loadParallel(1,10,17,2,&quot;2 Samuel&quot;)\">2<\/sup><span class=\"vtext\">Et irruens super eum (quippe qui lassus est, et solutis manibus), percutiam eum: cumque fugerit omnis populus qui cum eo est, percutiam regem desolatum.<\/span> <\/p>\n<p class=\"verse-para\"><sup class=\"vnum\" data-v=\"3\" onclick=\"loadParallel(1,10,17,3,&quot;2 Samuel&quot;)\">3<\/sup><span class=\"vtext\">Et reducam universum populum, quomodo unus homo reverti solet: unum enim virum tu quæris: et omnis populus erit in pace.<\/span> <\/p>\n<p class=\"verse-para\"><sup class=\"vnum\" data-v=\"4\" onclick=\"loadParallel(1,10,17,4,&quot;2 Samuel&quot;)\">4<\/sup><span class=\"vtext\">Placuitque sermo ejus Absalom, et cunctis majoribus natu Israël.<\/span> <\/p>\n<p class=\"verse-para\"><sup class=\"vnum\" data-v=\"5\" onclick=\"loadParallel(1,10,17,5,&quot;2 Samuel&quot;)\">5<\/sup><span class=\"vtext\">Ait autem Absalom: Vocate Chusai Arachiten, et audiamus quid etiam ipse dicat.<\/span> <\/p>\n<p class=\"verse-para\"><sup class=\"vnum\" data-v=\"6\" onclick=\"loadParallel(1,10,17,6,&quot;2 Samuel&quot;)\">6<\/sup><span class=\"vtext\">Cumque venisset Chusai ad Absalom, ait Absalom ad eum: Hujuscemodi sermonem locutus est Achitophel: facere debemus an non? quod das consilium?<\/span> <\/p>\n<p class=\"verse-para\"><sup class=\"vnum\" data-v=\"7\" onclick=\"loadParallel(1,10,17,7,&quot;2 Samuel&quot;)\">7<\/sup><span class=\"vtext\">Et dixit Chusai ad Absalom: Non est bonum consilium quod dedit Achitophel hac vice.<\/span> <\/p>\n<p class=\"verse-para\"><sup class=\"vnum\" data-v=\"8\" onclick=\"loadParallel(1,10,17,8,&quot;2 Samuel&quot;)\">8<\/sup><span class=\"vtext\">Et rursum intulit Chusai: Tu nosti patrem tuum, et viros qui cum eo sunt, esse fortissimos et amaro animo, veluti si ursa raptis catulis in saltu sæviat: sed et pater tuus vir bellator est, nec morabitur cum populo.<\/span> <\/p>\n<p class=\"verse-para\"><sup class=\"vnum\" data-v=\"9\" onclick=\"loadParallel(1,10,17,9,&quot;2 Samuel&quot;)\">9<\/sup><span class=\"vtext\">Forsitan nunc latitat in foveis, aut in uno, quo voluerit, loco: et cum ceciderit unus quilibet in principio, audiet quicumque audierit, et dicet: Facta est plaga in populo qui sequebatur Absalom.<\/span> <\/p>\n<p class=\"verse-para\"><sup class=\"vnum\" data-v=\"10\" onclick=\"loadParallel(1,10,17,10,&quot;2 Samuel&quot;)\">10<\/sup><span class=\"vtext\">Et fortissimus quisque, cujus cor est quasi leonis, pavore solvetur: scit enim omnis populus Israël fortem esse patrem tuum, et robustos omnes qui cum eo sunt.<\/span> <\/p>\n<p class=\"verse-para\"><sup class=\"vnum\" data-v=\"11\" onclick=\"loadParallel(1,10,17,11,&quot;2 Samuel&quot;)\">11<\/sup><span class=\"vtext\">Sed hoc mihi videtur rectum esse consilium. Congregetur ad te universus Israël, a Dan usque Bersabee, quasi arena maris innumerabilis: et tu eris in medio eorum.<\/span> <\/p>\n<p class=\"verse-para\"><sup class=\"vnum\" data-v=\"12\" onclick=\"loadParallel(1,10,17,12,&quot;2 Samuel&quot;)\">12<\/sup><span class=\"vtext\">Et irruemus super eum in quocumque loco inventus fuerit, et operiemus eum, sicut cadere solet ros super terram: et non relinquemus de viris qui cum eo sunt, ne unum quidem.<\/span> <\/p>\n<p class=\"verse-para\"><sup class=\"vnum\" data-v=\"13\" onclick=\"loadParallel(1,10,17,13,&quot;2 Samuel&quot;)\">13<\/sup><span class=\"vtext\">Quod si urbem aliquam fuerit ingressus, circumdabit omnis Israël civitati illi funes, et trahemus eam in torrentem, ut non reperiatur ne calculus quidem ex ea.<\/span> <\/p>\n<p class=\"verse-para\"><sup class=\"vnum\" data-v=\"14\" onclick=\"loadParallel(1,10,17,14,&quot;2 Samuel&quot;)\">14<\/sup><span class=\"vtext\">Dixitque Absalom, et omnes viri Israël: Melius est consilium Chusai Arachitæ, consilio Achitophel: Domini autem nutu dissipatum est consilium Achitophel utile, ut induceret Dominus super Absalom malum.<\/span> <\/p>\n<p class=\"verse-para\"><sup class=\"vnum\" data-v=\"15\" onclick=\"loadParallel(1,10,17,15,&quot;2 Samuel&quot;)\">15<\/sup><span class=\"vtext\">Et ait Chusai Sadoc et Abiathar sacerdotibus: Hoc et hoc modo consilium dedit Achitophel Absalom et senioribus Israël: et ego tale et tale dedi consilium.<\/span> <\/p>\n<p class=\"verse-para\"><sup class=\"vnum\" data-v=\"16\" onclick=\"loadParallel(1,10,17,16,&quot;2 Samuel&quot;)\">16<\/sup><span class=\"vtext\">Nunc ergo mittite cito, et nuntiate David, dicentes: Ne moreris nocte hac in campestribus deserti, sed absque dilatione transgredere: ne forte absorbeatur rex, et omnis populus qui cum eo est.<\/span> <\/p>\n<p class=\"verse-para\"><sup class=\"vnum\" data-v=\"17\" onclick=\"loadParallel(1,10,17,17,&quot;2 Samuel&quot;)\">17<\/sup><span class=\"vtext\">Jonathas autem et Achimaas stabant juxta fontem Rogel: abiit ancilla et nuntiavit eis. Et illi profecti sunt, ut referrent ad regem David nuntium: non enim poterant videri, aut introire civitatem.<\/span> <\/p>\n<p class=\"verse-para\"><sup class=\"vnum\" data-v=\"18\" onclick=\"loadParallel(1,10,17,18,&quot;2 Samuel&quot;)\">18<\/sup><span class=\"vtext\">Vidit autem eos quidam puer, et indicavit Absalom: illi vero concito gradu ingressi sunt domum cujusdam viri in Bahurim, qui habebat puteum in vestibulo suo: et descenderunt in eum.<\/span> <\/p>\n<p class=\"verse-para\"><sup class=\"vnum\" data-v=\"19\" onclick=\"loadParallel(1,10,17,19,&quot;2 Samuel&quot;)\">19<\/sup><span class=\"vtext\">Tulit autem mulier, et expandit velamen super os putei, quasi siccans ptisanas: et sic latuit res.<\/span> <\/p>\n<p class=\"verse-para\"><sup class=\"vnum\" data-v=\"20\" onclick=\"loadParallel(1,10,17,20,&quot;2 Samuel&quot;)\">20<\/sup><span class=\"vtext\">Cumque venissent servi Absalom in domum, ad mulierem dixerunt: Ubi est Achimaas et Jonathas? Et respondit eis mulier: Transierunt festinanter, gustata paululum aqua. At hi qui quærebant, cum non reperissent, reversi sunt in Jerusalem.<\/span> <\/p>\n<p class=\"verse-para\"><sup class=\"vnum\" data-v=\"21\" onclick=\"loadParallel(1,10,17,21,&quot;2 Samuel&quot;)\">21<\/sup><span class=\"vtext\">Cumque abiissent, ascenderunt illi de puteo, et pergentes nuntiaverunt regi David, et dixerunt: Surgite, et transite cito fluvium: quoniam hujuscemodi dedit consilium contra vos Achitophel.<\/span> <\/p>\n<p class=\"verse-para\"><sup class=\"vnum\" data-v=\"22\" onclick=\"loadParallel(1,10,17,22,&quot;2 Samuel&quot;)\">22<\/sup><span class=\"vtext\">Surrexit ergo David, et omnis populus qui cum eo erat, et transierunt Jordanem, donec dilucesceret: et ne unus quidem residuus fuit, qui non transisset fluvium.<\/span> <\/p>\n<p class=\"verse-para\"><sup class=\"vnum\" data-v=\"23\" onclick=\"loadParallel(1,10,17,23,&quot;2 Samuel&quot;)\">23<\/sup><span class=\"vtext\">Porro Achitophel videns quod non fuisset factum consilium suum, stravit asinum suum, surrexitque, et abiit in domum suam et in civitatem suam: et disposita domo sua, suspendio interiit, et sepultus est in sepulchro patris sui.<\/span> <\/p>\n<p class=\"verse-para\"><sup class=\"vnum\" data-v=\"24\" onclick=\"loadParallel(1,10,17,24,&quot;2 Samuel&quot;)\">24<\/sup><span class=\"vtext\">David autem venit in castra, et Absalom transivit Jordanem, ipse et omnes viri Israël cum eo.<\/span> <\/p>\n<p class=\"verse-para\"><sup class=\"vnum\" data-v=\"25\" onclick=\"loadParallel(1,10,17,25,&quot;2 Samuel&quot;)\">25<\/sup><span class=\"vtext\">Amasam vero constituit Absalom pro Joab super exercitum: Amasa autem erat filius viri qui vocabatur Jetra de Jezraëli, qui ingressus est ad Abigail filiam Naas, sororem Sarviæ, quæ fuit mater Joab.<\/span> <\/p>\n<p class=\"verse-para\"><sup class=\"vnum\" data-v=\"26\" onclick=\"loadParallel(1,10,17,26,&quot;2 Samuel&quot;)\">26<\/sup><span class=\"vtext\">Et castrametatus est Israël cum Absalom in terra Galaad.<\/span> <\/p>\n<p class=\"verse-para\"><sup class=\"vnum\" data-v=\"27\" onclick=\"loadParallel(1,10,17,27,&quot;2 Samuel&quot;)\">27<\/sup><span class=\"vtext\">Cumque venisset David in castra, Sobi filius Naas de Rabbath filiorum Ammon, et Machir filius Ammihel de Lodabar, et Berzellai Galaadites de Rogelim,<\/span> <\/p>\n<p class=\"verse-para\"><sup class=\"vnum\" data-v=\"28\" onclick=\"loadParallel(1,10,17,28,&quot;2 Samuel&quot;)\">28<\/sup><span class=\"vtext\">obtulerunt ei stratoria, et tapetia, et vasa fictilia, frumentum, et hordeum, et farinam, et polentam, et fabam, et lentem, et frixum cicer,<\/span> <\/p>\n<p class=\"verse-para\"><sup class=\"vnum\" data-v=\"29\" onclick=\"loadParallel(1,10,17,29,&quot;2 Samuel&quot;)\">29<\/sup><span class=\"vtext\">et mel, et butyrum, oves, et pingues vitulos: dederuntque David, et populo qui cum eo erat, ad vescendum: suspicati enim sunt populum fame et siti fatigari in deserto.<\/span> <\/p>\n<div class=\"bottom-nav\"><a href=\"\/vulgate\/1\/10\/16\" class=\"nav-btn-lg nav-ajax\">&lsaquo; Previous<\/a><a href=\"\/vulgate\/1\/10\/18\" class=\"nav-btn-lg nav-ajax\">Next &rsaquo;<\/a><\/div>\n","page_title":"2 Samuel, Chapter 17 — Latin Vulgate","book_title":"2 Samuel","toolbar_title":"2 Samuel — Ch. 17","prev_url":"\/vulgate\/1\/10\/16","next_url":"\/vulgate\/1\/10\/18","tid":1,"book_id":10,"chapter":17,"num_chapters":24,"trans":"Vulgate","is_rtl":false,"strongs_data":{},"bsb_glosses":{},"book_name":"2 Samuel","canonical_url":"https:\/\/accept.gift\/vulgate\/1\/10\/17","meta_desc":"Dixit ergo Achitophel ad Absalom: Eligam mihi duodecim millia virorum, et consurgens persequar David hac nocte. Et irruens super eum (quippe qui lassus est,…"}