{"reader_html":"

2 ChroniclesChapter 10<\/span><\/h1>\n

1<\/sup>Profectus est autem Roboam in Sichem: illuc enim cunctus Israël convenerat ut constituerent eum regem.<\/span> <\/p>\n

2<\/sup>Quod cum audisset Jeroboam filius Nabat, qui erat in Ægypto (fugerat quippe illuc ante Salomonem), statim reversus est.<\/span> <\/p>\n

3<\/sup>Vocaveruntque eum, et venit cum universo Israël: et locuti sunt ad Roboam, dicentes:<\/span> <\/p>\n

4<\/sup>Pater tuus durissimo jugo nos pressit: tu leviora impera patre tuo, qui nobis imposuit gravem servitutem, et paululum de onere subleva, ut serviamus tibi.<\/span> <\/p>\n

5<\/sup>Qui ait: Post tres dies revertimini ad me. Cumque abiisset populus,<\/span> <\/p>\n

6<\/sup>iniit consilium cum senibus qui steterant coram patre ejus Salomone dum adhuc viveret, dicens: Quid datis consilii ut respondeam populo?<\/span> <\/p>\n

7<\/sup>Qui dixerunt ei: Si placueris populo huic, et leniveris eos verbis clementibus, servient tibi omni tempore.<\/span> <\/p>\n

8<\/sup>At ille reliquit consilium senum, et cum juvenibus tractare cœpit, qui cum eo nutriti fuerant, et erant in comitatu illius.<\/span> <\/p>\n

9<\/sup>Dixitque ad eos: Quid vobis videtur? vel respondere quid debeo populo huic, qui dixit mihi: Subleva jugum quod imposuit nobis pater tuus?<\/span> <\/p>\n

10<\/sup>At illi responderunt ut juvenes, et nutriti cum eo in deliciis, atque dixerunt: Sic loqueris populo qui dixit tibi: Pater tuus aggravavit jugum nostrum, tu subleva: et sic respondebis ei: Minimus digitus meus grossior est lumbis patris mei.<\/span> <\/p>\n

11<\/sup>Pater meus imposuit vobis grave jugum, et ego majus pondus apponam; pater meus cecidit vos flagellis, ego vero cædam vos scorpionibus.<\/span> <\/p>\n

12<\/sup>Venit ergo Jeroboam et universus populus ad Roboam die tertio, sicut præceperat eis.<\/span> <\/p>\n

13<\/sup>Responditque rex dura, derelicto consilio seniorum:<\/span> <\/p>\n

14<\/sup>locutusque est juxta juvenum voluntatem: Pater meus grave vobis imposuit jugum, quod ego gravius faciam; pater meus cecidit vos flagellis, ego vero cædam vos scorpionibus.<\/span> <\/p>\n

15<\/sup>Et non acquievit populi precibus: erat enim voluntatis Dei ut compleretur sermo ejus quem locutus fuerat per manum Ahiæ Silonitis ad Jeroboam filium Nabat.<\/span> <\/p>\n

16<\/sup>Populus autem universus rege duriora dicente, sic locutus est ad eum: Non est nobis pars in David, neque hæreditas in filio Isai. Revertere in tabernacula tua, Israël; tu autem pasce domum tuam David. Et abiit Israël in tabernacula sua.<\/span> <\/p>\n

17<\/sup>Super filios autem Israël qui habitabant in civitatibus Juda, regnavit Roboam.<\/span> <\/p>\n

18<\/sup>Misitque rex Roboam Aduram, qui præerat tributis, et lapidaverunt eum filii Israël, et mortuus est: porro rex Roboam currum festinavit ascendere, et fugit in Jerusalem.<\/span> <\/p>\n

19<\/sup>Recessitque Israël a domo David, usque ad diem hanc.<\/span> <\/p>\n

‹ Previous<\/a>Next ›<\/a><\/div>\n","page_title":"2 Chronicles, Chapter 10 — Latin Vulgate","book_title":"2 Chronicles","toolbar_title":"2 Chronicles — Ch. 10","prev_url":"\/vulgate\/1\/14\/9","next_url":"\/vulgate\/1\/14\/11","tid":1,"book_id":14,"chapter":10,"num_chapters":36,"trans":"Vulgate","is_rtl":false,"strongs_data":{},"bsb_glosses":{},"book_name":"2 Chronicles","canonical_url":"https:\/\/accept.gift\/vulgate\/1\/14\/10","meta_desc":"Profectus est autem Roboam in Sichem: illuc enim cunctus Israël convenerat ut constituerent eum regem. Quod cum audisset Jeroboam filius Nabat, qui erat in Æ…"}