{"reader_html":"

PsalmsChapter 118<\/span><\/h1>\n

1<\/sup>Alleluja. Beati immaculati in via, qui ambulant in lege Domini.<\/span> <\/p>\n

2<\/sup>Beati qui scrutantur testimonia ejus; in toto corde exquirunt eum.<\/span> <\/p>\n

3<\/sup>Non enim qui operantur iniquitatem in viis ejus ambulaverunt.<\/span> <\/p>\n

4<\/sup>Tu mandasti mandata tua custodiri nimis.<\/span> <\/p>\n

5<\/sup>Utinam dirigantur viæ meæ ad custodiendas justificationes tuas.<\/span> <\/p>\n

6<\/sup>Tunc non confundar, cum perspexero in omnibus mandatis tuis.<\/span> <\/p>\n

7<\/sup>Confitebor tibi in directione cordis, in eo quod didici judicia justitiæ tuæ.<\/span> <\/p>\n

8<\/sup>Justificationes tuas custodiam; non me derelinquas usquequaque.<\/span> <\/p>\n

9<\/sup>In quo corrigit adolescentior viam suam? in custodiendo sermones tuos.<\/span> <\/p>\n

10<\/sup>In toto corde meo exquisivi te; ne repellas me a mandatis tuis.<\/span> <\/p>\n

11<\/sup>In corde meo abscondi eloquia tua, ut non peccem tibi.<\/span> <\/p>\n

12<\/sup>Benedictus es, Domine; doce me justificationes tuas.<\/span> <\/p>\n

13<\/sup>In labiis meis pronuntiavi omnia judicia oris tui.<\/span> <\/p>\n

14<\/sup>In via testimoniorum tuorum delectatus sum, sicut in omnibus divitiis.<\/span> <\/p>\n

15<\/sup>In mandatis tuis exercebor, et considerabo vias tuas.<\/span> <\/p>\n

16<\/sup>In justificationibus tuis meditabor: non obliviscar sermones tuos.<\/span> <\/p>\n

17<\/sup>Retribue servo tuo, vivifica me, et custodiam sermones tuos.<\/span> <\/p>\n

18<\/sup>Revela oculos meos, et considerabo mirabilia de lege tua.<\/span> <\/p>\n

19<\/sup>Incola ego sum in terra: non abscondas a me mandata tua.<\/span> <\/p>\n

20<\/sup>Concupivit anima mea desiderare justificationes tuas in omni tempore.<\/span> <\/p>\n

21<\/sup>Increpasti superbos; maledicti qui declinant a mandatis tuis.<\/span> <\/p>\n

22<\/sup>Aufer a me opprobrium et contemptum, quia testimonia tua exquisivi.<\/span> <\/p>\n

23<\/sup>Etenim sederunt principes, et adversum me loquebantur; servus autem tuus exercebatur in justificationibus tuis.<\/span> <\/p>\n

24<\/sup>Nam et testimonia tua meditatio mea est, et consilium meum justificationes tuæ.<\/span> <\/p>\n

25<\/sup>Adhæsit pavimento anima mea: vivifica me secundum verbum tuum.<\/span> <\/p>\n

26<\/sup>Vias meas enuntiavi, et exaudisti me; doce me justificationes tuas.<\/span> <\/p>\n

27<\/sup>Viam justificationum tuarum instrue me, et exercebor in mirabilibus tuis.<\/span> <\/p>\n

28<\/sup>Dormitavit anima mea præ tædio: confirma me in verbis tuis.<\/span> <\/p>\n

29<\/sup>Viam iniquitatis amove a me, et de lege tua miserere mei.<\/span> <\/p>\n

30<\/sup>Viam veritatis elegi; judicia tua non sum oblitus.<\/span> <\/p>\n

31<\/sup>Adhæsi testimoniis tuis, Domine; noli me confundere.<\/span> <\/p>\n

32<\/sup>Viam mandatorum tuorum cucurri, cum dilatasti cor meum.<\/span> <\/p>\n

33<\/sup>Legem pone mihi, Domine, viam justificationum tuarum, et exquiram eam semper.<\/span> <\/p>\n

34<\/sup>Da mihi intellectum, et scrutabor legem tuam, et custodiam illam in toto corde meo.<\/span> <\/p>\n

35<\/sup>Deduc me in semitam mandatorum tuorum, quia ipsam volui.<\/span> <\/p>\n

36<\/sup>Inclina cor meum in testimonia tua, et non in avaritiam.<\/span> <\/p>\n

37<\/sup>Averte oculos meos, ne videant vanitatem; in via tua vivifica me.<\/span> <\/p>\n

38<\/sup>Statue servo tuo eloquium tuum in timore tuo.<\/span> <\/p>\n

39<\/sup>Amputa opprobrium meum quod suspicatus sum, quia judicia tua jucunda.<\/span> <\/p>\n

40<\/sup>Ecce concupivi mandata tua: in æquitate tua vivifica me.<\/span> <\/p>\n

41<\/sup>Et veniat super me misericordia tua, Domine; salutare tuum secundum eloquium tuum.<\/span> <\/p>\n

42<\/sup>Et respondebo exprobrantibus mihi verbum, quia speravi in sermonibus tuis.<\/span> <\/p>\n

43<\/sup>Et ne auferas de ore meo verbum veritatis usquequaque, quia in judiciis tuis supersperavi.<\/span> <\/p>\n

44<\/sup>Et custodiam legem tuam semper, in sæculum et in sæculum sæculi.<\/span> <\/p>\n

45<\/sup>Et ambulabam in latitudine, quia mandata tua exquisivi.<\/span> <\/p>\n

46<\/sup>Et loquebar in testimoniis tuis in conspectu regum, et non confundebar.<\/span> <\/p>\n

47<\/sup>Et meditabar in mandatis tuis, quæ dilexi.<\/span> <\/p>\n

48<\/sup>Et levavi manus meas ad mandata tua, quæ dilexi, et exercebar in justificationibus tuis.<\/span> <\/p>\n

49<\/sup>Memor esto verbi tui servo tuo, in quo mihi spem dedisti.<\/span> <\/p>\n

50<\/sup>Hæc me consolata est in humilitate mea, quia eloquium tuum vivificavit me.<\/span> <\/p>\n

51<\/sup>Superbi inique agebant usquequaque; a lege autem tua non declinavi.<\/span> <\/p>\n

52<\/sup>Memor fui judiciorum tuorum a sæculo, Domine, et consolatus sum.<\/span> <\/p>\n

53<\/sup>Defectio tenuit me, pro peccatoribus derelinquentibus legem tuam.<\/span> <\/p>\n

54<\/sup>Cantabiles mihi erant justificationes tuæ in loco peregrinationis meæ.<\/span> <\/p>\n

55<\/sup>Memor fui nocte nominis tui, Domine, et custodivi legem tuam.<\/span> <\/p>\n

56<\/sup>Hæc facta est mihi, quia justificationes tuas exquisivi.<\/span> <\/p>\n

57<\/sup>Portio mea, Domine, dixi custodire legem tuam.<\/span> <\/p>\n

58<\/sup>Deprecatus sum faciem tuam in toto corde meo; miserere mei secundum eloquium tuum.<\/span> <\/p>\n

59<\/sup>Cogitavi vias meas, et converti pedes meos in testimonia tua.<\/span> <\/p>\n

60<\/sup>Paratus sum, et non sum turbatus, ut custodiam mandata tua.<\/span> <\/p>\n

61<\/sup>Funes peccatorum circumplexi sunt me, et legem tuam non sum oblitus.<\/span> <\/p>\n

62<\/sup>Media nocte surgebam ad confitendum tibi, super judicia justificationis tuæ.<\/span> <\/p>\n

63<\/sup>Particeps ego sum omnium timentium te, et custodientium mandata tua.<\/span> <\/p>\n

64<\/sup>Misericordia tua, Domine, plena est terra; justificationes tuas doce me.<\/span> <\/p>\n

65<\/sup>Bonitatem fecisti cum servo tuo, Domine, secundum verbum tuum.<\/span> <\/p>\n

66<\/sup>Bonitatem, et disciplinam, et scientiam doce me, quia mandatis tuis credidi.<\/span> <\/p>\n

67<\/sup>Priusquam humiliarer ego deliqui: propterea eloquium tuum custodivi.<\/span> <\/p>\n

68<\/sup>Bonus es tu, et in bonitate tua doce me justificationes tuas.<\/span> <\/p>\n

69<\/sup>Multiplicata est super me iniquitas superborum; ego autem in toto corde meo scrutabor mandata tua.<\/span> <\/p>\n

70<\/sup>Coagulatum est sicut lac cor eorum; ego vero legem tuam meditatus sum.<\/span> <\/p>\n

71<\/sup>Bonum mihi quia humiliasti me, ut discam justificationes tuas.<\/span> <\/p>\n

72<\/sup>Bonum mihi lex oris tui, super millia auri et argenti.<\/span> <\/p>\n

73<\/sup>Manus tuæ fecerunt me, et plasmaverunt me: da mihi intellectum, et discam mandata tua.<\/span> <\/p>\n

74<\/sup>Qui timent te videbunt me et lætabuntur, quia in verba tua supersperavi.<\/span> <\/p>\n

75<\/sup>Cognovi, Domine, quia æquitas judicia tua, et in veritate tua humiliasti me.<\/span> <\/p>\n

76<\/sup>Fiat misericordia tua ut consoletur me, secundum eloquium tuum servo tuo.<\/span> <\/p>\n

77<\/sup>Veniant mihi miserationes tuæ, et vivam, quia lex tua meditatio mea est.<\/span> <\/p>\n

78<\/sup>Confundantur superbi, quia injuste iniquitatem fecerunt in me; ego autem exercebor in mandatis tuis.<\/span> <\/p>\n

79<\/sup>Convertantur mihi timentes te, et qui noverunt testimonia tua.<\/span> <\/p>\n

80<\/sup>Fiat cor meum immaculatum in justificationibus tuis, ut non confundar.<\/span> <\/p>\n

81<\/sup>Defecit in salutare tuum anima mea, et in verbum tuum supersperavi.<\/span> <\/p>\n

82<\/sup>Defecerunt oculi mei in eloquium tuum, dicentes: Quando consolaberis me?<\/span> <\/p>\n

83<\/sup>Quia factus sum sicut uter in pruina; justificationes tuas non sum oblitus.<\/span> <\/p>\n

84<\/sup>Quot sunt dies servi tui? quando facies de persequentibus me judicium?<\/span> <\/p>\n

85<\/sup>Narraverunt mihi iniqui fabulationes, sed non ut lex tua.<\/span> <\/p>\n

86<\/sup>Omnia mandata tua veritas: inique persecuti sunt me, adjuva me.<\/span> <\/p>\n

87<\/sup>Paulominus consummaverunt me in terra; ego autem non dereliqui mandata tua.<\/span> <\/p>\n

88<\/sup>Secundum misericordiam tuam vivifica me, et custodiam testimonia oris tui.<\/span> <\/p>\n

89<\/sup>In æternum, Domine, verbum tuum permanet in cælo.<\/span> <\/p>\n

90<\/sup>In generationem et generationem veritas tua; fundasti terram, et permanet.<\/span> <\/p>\n

91<\/sup>Ordinatione tua perseverat dies, quoniam omnia serviunt tibi.<\/span> <\/p>\n

92<\/sup>Nisi quod lex tua meditatio mea est, tunc forte periissem in humilitate mea.<\/span> <\/p>\n

93<\/sup>In æternum non obliviscar justificationes tuas, quia in ipsis vivificasti me.<\/span> <\/p>\n

94<\/sup>Tuus sum ego; salvum me fac: quoniam justificationes tuas exquisivi.<\/span> <\/p>\n

95<\/sup>Me exspectaverunt peccatores ut perderent me; testimonia tua intellexi.<\/span> <\/p>\n

96<\/sup>Omnis consummationis vidi finem, latum mandatum tuum nimis.<\/span> <\/p>\n

97<\/sup>Quomodo dilexi legem tuam, Domine! tota die meditatio mea est.<\/span> <\/p>\n

98<\/sup>Super inimicos meos prudentem me fecisti mandato tuo, quia in æternum mihi est.<\/span> <\/p>\n

99<\/sup>Super omnes docentes me intellexi, quia testimonia tua meditatio mea est.<\/span> <\/p>\n

100<\/sup>Super senes intellexi, quia mandata tua quæsivi.<\/span> <\/p>\n

101<\/sup>Ab omni via mala prohibui pedes meos, ut custodiam verba tua.<\/span> <\/p>\n

102<\/sup>A judiciis tuis non declinavi, quia tu legem posuisti mihi.<\/span> <\/p>\n

103<\/sup>Quam dulcia faucibus meis eloquia tua! super mel ori meo.<\/span> <\/p>\n

104<\/sup>A mandatis tuis intellexi; propterea odivi omnem viam iniquitatis.<\/span> <\/p>\n

105<\/sup>Lucerna pedibus meis verbum tuum, et lumen semitis meis.<\/span> <\/p>\n

106<\/sup>Juravi et statui custodire judicia justitiæ tuæ.<\/span> <\/p>\n

107<\/sup>Humiliatus sum usquequaque, Domine; vivifica me secundum verbum tuum.<\/span> <\/p>\n

108<\/sup>Voluntaria oris mei beneplacita fac, Domine, et judicia tua doce me.<\/span> <\/p>\n

109<\/sup>Anima mea in manibus meis semper, et legem tuam non sum oblitus.<\/span> <\/p>\n

110<\/sup>Posuerunt peccatores laqueum mihi, et de mandatis tuis non erravi.<\/span> <\/p>\n

111<\/sup>Hæreditate acquisivi testimonia tua in æternum, quia exsultatio cordis mei sunt.<\/span> <\/p>\n

112<\/sup>Inclinavi cor meum ad faciendas justificationes tuas in æternum, propter retributionem.<\/span> <\/p>\n

113<\/sup>Iniquos odio habui, et legem tuam dilexi.<\/span> <\/p>\n

114<\/sup>Adjutor et susceptor meus es tu, et in verbum tuum supersperavi.<\/span> <\/p>\n

115<\/sup>Declinate a me, maligni, et scrutabor mandata Dei mei.<\/span> <\/p>\n

116<\/sup>Suscipe me secundum eloquium tuum, et vivam, et non confundas me ab exspectatione mea.<\/span> <\/p>\n

117<\/sup>Adjuva me, et salvus ero, et meditabor in justificationibus tuis semper.<\/span> <\/p>\n

118<\/sup>Sprevisti omnes discedentes a judiciis tuis, quia injusta cogitatio eorum.<\/span> <\/p>\n

119<\/sup>Prævaricantes reputavi omnes peccatores terræ; ideo dilexi testimonia tua.<\/span> <\/p>\n

120<\/sup>Confige timore tuo carnes meas; a judiciis enim tuis timui.<\/span> <\/p>\n

121<\/sup>Feci judicium et justitiam: non tradas me calumniantibus me.<\/span> <\/p>\n

122<\/sup>Suscipe servum tuum in bonum: non calumnientur me superbi.<\/span> <\/p>\n

123<\/sup>Oculi mei defecerunt in salutare tuum, et in eloquium justitiæ tuæ.<\/span> <\/p>\n

124<\/sup>Fac cum servo tuo secundum misericordiam tuam, et justificationes tuas doce me.<\/span> <\/p>\n

125<\/sup>Servus tuus sum ego: da mihi intellectum, ut sciam testimonia tua.<\/span> <\/p>\n

126<\/sup>Tempus faciendi, Domine: dissipaverunt legem tuam.<\/span> <\/p>\n

127<\/sup>Ideo dilexi mandata tua super aurum et topazion.<\/span> <\/p>\n

128<\/sup>Propterea ad omnia mandata tua dirigebar; omnem viam iniquam odio habui.<\/span> <\/p>\n

129<\/sup>Mirabilia testimonia tua: ideo scrutata est ea anima mea.<\/span> <\/p>\n

130<\/sup>Declaratio sermonum tuorum illuminat, et intellectum dat parvulis.<\/span> <\/p>\n

131<\/sup>Os meum aperui, et attraxi spiritum: quia mandata tua desiderabam.<\/span> <\/p>\n

132<\/sup>Aspice in me, et miserere mei, secundum judicium diligentium nomen tuum.<\/span> <\/p>\n

133<\/sup>Gressus meos dirige secundum eloquium tuum, et non dominetur mei omnis injustitia.<\/span> <\/p>\n

134<\/sup>Redime me a calumniis hominum ut custodiam mandata tua.<\/span> <\/p>\n

135<\/sup>Faciem tuam illumina super servum tuum, et doce me justificationes tuas.<\/span> <\/p>\n

136<\/sup>Exitus aquarum deduxerunt oculi mei, quia non custodierunt legem tuam.<\/span> <\/p>\n

137<\/sup>Justus es, Domine, et rectum judicium tuum.<\/span> <\/p>\n

138<\/sup>Mandasti justitiam testimonia tua, et veritatem tuam nimis.<\/span> <\/p>\n

139<\/sup>Tabescere me fecit zelus meus, quia obliti sunt verba tua inimici mei.<\/span> <\/p>\n

140<\/sup>Ignitum eloquium tuum vehementer, et servus tuus dilexit illud.<\/span> <\/p>\n

141<\/sup>Adolescentulus sum ego et contemptus; justificationes tuas non sum oblitus.<\/span> <\/p>\n

142<\/sup>Justitia tua, justitia in æternum, et lex tua veritas.<\/span> <\/p>\n

143<\/sup>Tribulatio et angustia invenerunt me; mandata tua meditatio mea est.<\/span> <\/p>\n

144<\/sup>Æquitas testimonia tua in æternum: intellectum da mihi, et vivam.<\/span> <\/p>\n

145<\/sup>Clamavi in toto corde meo: exaudi me, Domine; justificationes tuas requiram.<\/span> <\/p>\n

146<\/sup>Clamavi ad te; salvum me fac: ut custodiam mandata tua.<\/span> <\/p>\n

147<\/sup>Præveni in maturitate, et clamavi: quia in verba tua supersperavi.<\/span> <\/p>\n

148<\/sup>Prævenerunt oculi mei ad te diluculo, ut meditarer eloquia tua.<\/span> <\/p>\n

149<\/sup>Vocem meam audi secundum misericordiam tuam, Domine, et secundum judicium tuum vivifica me.<\/span> <\/p>\n

150<\/sup>Appropinquaverunt persequentes me iniquitati: a lege autem tua longe facti sunt.<\/span> <\/p>\n

151<\/sup>Prope es tu, Domine, et omnes viæ tuæ veritas.<\/span> <\/p>\n

152<\/sup>Initio cognovi de testimoniis tuis, quia in æternum fundasti ea.<\/span> <\/p>\n

153<\/sup>Vide humilitatem meam, et eripe me, quia legem tuam non sum oblitus.<\/span> <\/p>\n

154<\/sup>Judica judicium meum, et redime me: propter eloquium tuum vivifica me.<\/span> <\/p>\n

155<\/sup>Longe a peccatoribus salus, quia justificationes tuas non exquisierunt.<\/span> <\/p>\n

156<\/sup>Misericordiæ tuæ multæ, Domine; secundum judicium tuum vivifica me.<\/span> <\/p>\n

157<\/sup>Multi qui persequuntur me, et tribulant me; a testimoniis tuis non declinavi.<\/span> <\/p>\n

158<\/sup>Vidi prævaricantes et tabescebam, quia eloquia tua non custodierunt.<\/span> <\/p>\n

159<\/sup>Vide quoniam mandata tua dilexi, Domine: in misericordia tua vivifica me.<\/span> <\/p>\n

160<\/sup>Principium verborum tuorum veritas; in æternum omnia judicia justitiæ tuæ.<\/span> <\/p>\n

161<\/sup>Principes persecuti sunt me gratis, et a verbis tuis formidavit cor meum.<\/span> <\/p>\n

162<\/sup>Lætabor ego super eloquia tua, sicut qui invenit spolia multa.<\/span> <\/p>\n

163<\/sup>Iniquitatem odio habui, et abominatus sum, legem autem tuam dilexi.<\/span> <\/p>\n

164<\/sup>Septies in die laudem dixi tibi, super judicia justitiæ tuæ.<\/span> <\/p>\n

165<\/sup>Pax multa diligentibus legem tuam, et non est illis scandalum.<\/span> <\/p>\n

166<\/sup>Exspectabam salutare tuum, Domine, et mandata tua dilexi.<\/span> <\/p>\n

167<\/sup>Custodivit anima mea testimonia tua, et dilexit ea vehementer.<\/span> <\/p>\n

168<\/sup>Servavi mandata tua et testimonia tua, quia omnes viæ meæ in conspectu tuo.<\/span> <\/p>\n

169<\/sup>Appropinquet deprecatio mea in conspectu tuo, Domine; juxta eloquium tuum da mihi intellectum.<\/span> <\/p>\n

170<\/sup>Intret postulatio mea in conspectu tuo; secundum eloquium tuum eripe me.<\/span> <\/p>\n

171<\/sup>Eructabunt labia mea hymnum, cum docueris me justificationes tuas.<\/span> <\/p>\n

172<\/sup>Pronuntiabit lingua mea eloquium tuum, quia omnia mandata tua æquitas.<\/span> <\/p>\n

173<\/sup>Fiat manus tua ut salvet me, quoniam mandata tua elegi.<\/span> <\/p>\n

174<\/sup>Concupivi salutare tuum, Domine, et lex tua meditatio mea est.<\/span> <\/p>\n

175<\/sup>Vivet anima mea, et laudabit te, et judicia tua adjuvabunt me.<\/span> <\/p>\n

176<\/sup>Erravi sicut ovis quæ periit: quære servum tuum, quia mandata tua non sum oblitus.<\/span> <\/p>\n

‹ Previous<\/a>Next ›<\/a><\/div>\n","page_title":"Psalms, Chapter 118 — Latin Vulgate","book_title":"Psalms","toolbar_title":"Psalms — Ch. 118","prev_url":"\/vulgate\/1\/19\/117","next_url":"\/vulgate\/1\/19\/119","tid":1,"book_id":19,"chapter":118,"num_chapters":150,"trans":"Vulgate","is_rtl":false,"strongs_data":{},"bsb_glosses":{},"book_name":"Psalms","canonical_url":"https:\/\/accept.gift\/vulgate\/1\/19\/118","meta_desc":"Alleluja. Beati immaculati in via, qui ambulant in lege Domini. Beati qui scrutantur testimonia ejus; in toto corde exquirunt eum. Non enim qui operantur ini…"}