{"reader_html":"

ExodusChapter 39<\/span><\/h1>\n

1<\/sup>De hyacintho vero et purpura, vermiculo ac bysso, fecit vestes, quibus indueretur Aaron quando ministrabat in sanctis, sicut præcepit Dominus Moysi.<\/span> <\/p>\n

2<\/sup>Fecit igitur superhumerale de auro, hyacintho, et purpura, coccoque bis tincto, et bysso retorta,<\/span> <\/p>\n

3<\/sup>opere polymitario: inciditque bracteas aureas, et extenuavit in fila, ut possent torqueri cum priorum colorum subtegmine,<\/span> <\/p>\n

4<\/sup>duasque oras sibi invicem copulatas in utroque latere summitatum,<\/span> <\/p>\n

5<\/sup>et balteum ex eisdem coloribus, sicut præceperat Dominus Moysi.<\/span> <\/p>\n

6<\/sup>Paravit et duos lapides onychinos, astrictos et inclusos auro, et sculptos arte gemmaria nominibus filiorum Israël:<\/span> <\/p>\n

7<\/sup>posuitque eos in lateribus superhumeralis in monimentum filiorum Israël, sicut præceperat Dominus Moysi.<\/span> <\/p>\n

8<\/sup>Fecit et rationale opere polymito juxta opus superhumeralis, ex auro, hyacintho, purpura, coccoque bis tincto, et bysso retorta:<\/span> <\/p>\n

9<\/sup>quadrangulum, duplex, mensuræ palmi.<\/span> <\/p>\n

10<\/sup>Et posuit in eo gemmarum ordines quatuor. In primo versu erat sardius, topazius, smaragdus.<\/span> <\/p>\n

11<\/sup>In secundo, carbunculus, sapphirus, et jaspis.<\/span> <\/p>\n

12<\/sup>In tertio, ligurius, achates, et amethystus.<\/span> <\/p>\n

13<\/sup>In quarto, chrysolithus, onychinus, et beryllus, circumdati et inclusi auro per ordines suos.<\/span> <\/p>\n

14<\/sup>Ipsique lapides duodecim sculpti erant nominibus duodecim tribuum Israël, singuli per nomina singulorum.<\/span> <\/p>\n

15<\/sup>Fecerunt in rationali et catenulas sibi invicem cohærentes, de auro purissimo:<\/span> <\/p>\n

16<\/sup>et duos uncinos, totidemque annulos aureos. Porro annulos posuerunt in utroque latere rationalis,<\/span> <\/p>\n

17<\/sup>e quibus penderent duæ catenæ aureæ, quas inseruerunt uncinis, qui in superhumeralis angulis eminebant.<\/span> <\/p>\n

18<\/sup>Hæc et ante et retro ita conveniebant sibi, ut superhumerale et rationale mutuo necterentur,<\/span> <\/p>\n

19<\/sup>stricta ad balteum et annulis fortius copulata, quos jungebat vitta hyacinthina, ne laxa fluerent, et a se invicem moverentur, sicut præcepit Dominus Moysi.<\/span> <\/p>\n

20<\/sup>Feceruntque quoque tunicam superhumeralis totam hyacinthinam,<\/span> <\/p>\n

21<\/sup>et capitium in superiori parte contra medium, oramque per gyrum capitii textilem:<\/span> <\/p>\n

22<\/sup>deorsum autem ad pedes mala punica ex hyacintho, purpura, vermiculo, ac bysso retorta:<\/span> <\/p>\n

23<\/sup>et tintinnabula de auro purissimo, quæ posuerunt inter malogranata, in extrema parte tunicæ per gyrum:<\/span> <\/p>\n

24<\/sup>tintinnabulum autem aureum, et malum punicum, quibus ornatus incedebat pontifex quando ministerio fungebatur, sicut præceperat Dominus Moysi.<\/span> <\/p>\n

25<\/sup>Fecerunt et tunicas byssinas opere textili Aaron et filiis ejus:<\/span> <\/p>\n

26<\/sup>et mitras cum coronulis suis ex bysso:<\/span> <\/p>\n

27<\/sup>feminalia quoque linea, byssina:<\/span> <\/p>\n

28<\/sup>cingulum vero de bysso retorta, hyacintho, purpura, ac vermiculo bis tincto, arte plumaria, sicut præceperat Dominus Moysi.<\/span> <\/p>\n

29<\/sup>Fecerunt et laminam sacræ venerationis de auro purissimo, scripseruntque in ea opere gemmario, Sanctum Domini:<\/span> <\/p>\n

30<\/sup>et strinxerunt eam cum mitra vitta hyacinthina, sicut præceperat Dominus Moysi.<\/span> <\/p>\n

31<\/sup>Perfectum est igitur omne opus tabernaculi et tecti testimonii: feceruntque filii Israël cuncta quæ præceperat Dominus Moysi.<\/span> <\/p>\n

32<\/sup>Et obtulerunt tabernaculum et tectum et universam supellectilem, annulos, tabulas, vectes, columnas ac bases,<\/span> <\/p>\n

33<\/sup>opertorium de pellibus arietum rubricatis, et aliud operimentum de janthinis pellibus,<\/span> <\/p>\n

34<\/sup>velum; arcam, vectes, propitiatorium,<\/span> <\/p>\n

35<\/sup>mensam cum vasis suis et propositionis panibus;<\/span> <\/p>\n

36<\/sup>candelabrum, lucernas, et utensilia earum cum oleo;<\/span> <\/p>\n

37<\/sup>altare aureum, et unguentum, et thymiama ex aromatibus,<\/span> <\/p>\n

38<\/sup>et tentorium in introitu tabernaculi;<\/span> <\/p>\n

39<\/sup>altare æneum, retiaculum, vectes, et vasa ejus omnia; labrum cum basi sua; tentoria atrii, et columnas cum basibus suis;<\/span> <\/p>\n

40<\/sup>tentorium in introitu atrii, funiculosque illius et paxillos. Nihil ex vasis defuit, quæ in ministerium tabernaculi, et in tectum fœderis jussa sunt fieri.<\/span> <\/p>\n

41<\/sup>Vestes quoque, quibus sacerdotes utuntur in sanctuario, Aaron scilicet et filii ejus,<\/span> <\/p>\n

42<\/sup>obtulerunt filii Israël, sicut præceperat Dominus.<\/span> <\/p>\n

43<\/sup>Quæ postquam Moyses cuncta vidit completa, benedixit eis.<\/span> <\/p>\n

‹ Previous<\/a>Next ›<\/a><\/div>\n","page_title":"Exodus, Chapter 39 — Latin Vulgate","book_title":"Exodus","toolbar_title":"Exodus — Ch. 39","prev_url":"\/vulgate\/1\/2\/38","next_url":"\/vulgate\/1\/2\/40","tid":1,"book_id":2,"chapter":39,"num_chapters":40,"trans":"Vulgate","is_rtl":false,"strongs_data":{},"bsb_glosses":{},"book_name":"Exodus","canonical_url":"https:\/\/accept.gift\/vulgate\/1\/2\/39","meta_desc":"De hyacintho vero et purpura, vermiculo ac bysso, fecit vestes, quibus indueretur Aaron quando ministrabat in sanctis, sicut præcepit Dominus Moysi. Fecit ig…"}