{"reader_html":"

ProverbsChapter 15<\/span><\/h1>\n

1<\/sup>Responsio mollis frangit iram; sermo durus suscitat furorem.<\/span> <\/p>\n

2<\/sup>Lingua sapientium ornat scientiam; os fatuorum ebullit stultitiam.<\/span> <\/p>\n

3<\/sup>In omni loco, oculi Domini contemplantur bonos et malos.<\/span> <\/p>\n

4<\/sup>Lingua placabilis lignum vitæ; quæ autem immoderata est conteret spiritum.<\/span> <\/p>\n

5<\/sup>Stultus irridet disciplinam patris sui; qui autem custodit increpationes astutior fiet. In abundanti justitia virtus maxima est: cogitationes autem impiorum eradicabuntur.<\/span> <\/p>\n

6<\/sup>Domus justi plurima fortitudo, et in fructibus impii conturbatio.<\/span> <\/p>\n

7<\/sup>Labia sapientium disseminabunt scientiam; cor stultorum dissimile erit.<\/span> <\/p>\n

8<\/sup>Victimæ impiorum abominabiles Domino; vota justorum placabilia.<\/span> <\/p>\n

9<\/sup>Abominatio est Domino via impii; qui sequitur justitiam diligitur ab eo.<\/span> <\/p>\n

10<\/sup>Doctrina mala deserenti viam vitæ; qui increpationes odit, morietur.<\/span> <\/p>\n

11<\/sup>Infernus et perditio coram Domino; quanto magis corda filiorum hominum!<\/span> <\/p>\n

12<\/sup>Non amat pestilens eum qui se corripit, nec ad sapientes graditur.<\/span> <\/p>\n

13<\/sup>Cor gaudens exhilarat faciem; in mœrore animi dejicitur spiritus.<\/span> <\/p>\n

14<\/sup>Cor sapientis quærit doctrinam, et os stultorum pascitur imperitia.<\/span> <\/p>\n

15<\/sup>Omnes dies pauperis, mali; secura mens quasi juge convivium.<\/span> <\/p>\n

16<\/sup>Melius est parum cum timore Domini, quam thesauri magni et insatiabiles.<\/span> <\/p>\n

17<\/sup>Melius est vocari ad olera cum caritate, quam ad vitulum saginatum cum odio.<\/span> <\/p>\n

18<\/sup>Vir iracundus provocat rixas; qui patiens est mitigat suscitatas.<\/span> <\/p>\n

19<\/sup>Iter pigrorum quasi sepes spinarum; via justorum absque offendiculo.<\/span> <\/p>\n

20<\/sup>Filius sapiens lætificat patrem, et stultus homo despicit matrem suam.<\/span> <\/p>\n

21<\/sup>Stultitia gaudium stulto, et vir prudens dirigit gressus suos.<\/span> <\/p>\n

22<\/sup>Dissipantur cogitationes ubi non est consilium; ubi vero sunt plures consiliarii, confirmantur.<\/span> <\/p>\n

23<\/sup>Lætatur homo in sententia oris sui, et sermo opportunus est optimus.<\/span> <\/p>\n

24<\/sup>Semita vitæ super eruditum, ut declinet de inferno novissimo.<\/span> <\/p>\n

25<\/sup>Domum superborum demolietur Dominus, et firmos faciet terminos viduæ.<\/span> <\/p>\n

26<\/sup>Abominatio Domini cogitationes malæ, et purus sermo pulcherrimus firmabitur ab eo.<\/span> <\/p>\n

27<\/sup>Conturbat domum suam qui sectatur avaritiam; qui autem odit munera, vivet. Per misericordiam et fidem purgantur peccata: per timorem autem Domini declinat omnis a malo.<\/span> <\/p>\n

28<\/sup>Mens justi meditatur obedientiam; os impiorum redundat malis.<\/span> <\/p>\n

29<\/sup>Longe est Dominus ab impiis, et orationes justorum exaudiet.<\/span> <\/p>\n

30<\/sup>Lux oculorum lætificat animam; fama bona impinguat ossa.<\/span> <\/p>\n

31<\/sup>Auris quæ audit increpationes vitæ in medio sapientium commorabitur.<\/span> <\/p>\n

32<\/sup>Qui abjicit disciplinam despicit animam suam; qui autem acquiescit increpationibus possessor est cordis.<\/span> <\/p>\n

33<\/sup>Timor Domini disciplina sapientiæ, et gloriam præcedit humilitas.<\/span> <\/p>\n

‹ Previous<\/a>Next ›<\/a><\/div>\n","page_title":"Proverbs, Chapter 15 — Latin Vulgate","book_title":"Proverbs","toolbar_title":"Proverbs — Ch. 15","prev_url":"\/vulgate\/1\/20\/14","next_url":"\/vulgate\/1\/20\/16","tid":1,"book_id":20,"chapter":15,"num_chapters":31,"trans":"Vulgate","is_rtl":false,"strongs_data":{},"bsb_glosses":{},"book_name":"Proverbs","canonical_url":"https:\/\/accept.gift\/vulgate\/1\/20\/15","meta_desc":"Responsio mollis frangit iram; sermo durus suscitat furorem. Lingua sapientium ornat scientiam; os fatuorum ebullit stultitiam. In omni loco, oculi Domini co…"}