{"reader_html":"

LeviticusChapter 19<\/span><\/h1>\n

1<\/sup>Locutus est Dominus ad Moysen, dicens:<\/span> <\/p>\n

2<\/sup>Loquere ad omnem cœtum filiorum Israël, et dices ad eos: Sancti estote, quia ego sanctus sum, Dominus Deus vester.<\/span> <\/p>\n

3<\/sup>Unusquisque patrem suum, et matrem suam timeat. Sabbata mea custodite. Ego Dominus Deus vester.<\/span> <\/p>\n

4<\/sup>Nolite converti ad idola, nec deos conflatiles faciatis vobis. Ego Dominus Deus vester.<\/span> <\/p>\n

5<\/sup>Si immolaveritis hostiam pacificorum Domino, ut sit placabilis,<\/span> <\/p>\n

6<\/sup>eo die quo fuerit immolata, comedetis eam, et die altero: quidquid autem residuum fuerit in diem tertium, igne comburetis.<\/span> <\/p>\n

7<\/sup>Si quis post biduum comederit ex ea, profanus erit, et impietatis reus:<\/span> <\/p>\n

8<\/sup>portabitque iniquitatem suam, quia sanctum Domini polluit, et peribit anima illa de populo suo.<\/span> <\/p>\n

9<\/sup>Cumque messueris segetes terræ tuæ, non tondebis usque ad solum superficiem terræ, nec remanentes spicas colliges,<\/span> <\/p>\n

10<\/sup>neque in vinea tua racemos et grana decidentia congregabis: sed pauperibus et peregrinis carpenda dimittes. Ego Dominus Deus vester.<\/span> <\/p>\n

11<\/sup>Non facietis furtum. Non mentiemini, nec decipiet unusquisque proximum suum.<\/span> <\/p>\n

12<\/sup>Non perjurabis in nomine meo, nec pollues nomen Dei tui. Ego Dominus.<\/span> <\/p>\n

13<\/sup>Non facies calumniam proximo tuo nec vi opprimes eum. Non morabitur opus mercenarii tui apud te usque mane.<\/span> <\/p>\n

14<\/sup>Non maledices surdo, nec coram cæco pones offendiculum: sed timebis Dominum Deum tuum, quia ego sum Dominus.<\/span> <\/p>\n

15<\/sup>Non facies quod iniquum est, nec injuste judicabis. Non consideres personam pauperis, nec honores vultum potentis. Juste judica proximo tuo.<\/span> <\/p>\n

16<\/sup>Non eris criminator, nec susurro in populo. Non stabis contra sanguinem proximi tui. Ego Dominus.<\/span> <\/p>\n

17<\/sup>Non oderis fratrem tuum in corde tuo, sed publice argue eum, ne habeas super illo peccatum.<\/span> <\/p>\n

18<\/sup>Non quæras ultionem, nec memor eris injuriæ civium tuorum. Diliges amicum tuum sicut teipsum. Ego Dominus.<\/span> <\/p>\n

19<\/sup>Leges meas custodite. Jumentum tuum non facies coire cum alterius generis animantibus. Agrum tuum non seres diverso semine. Veste, quæ ex duobus texta est, non indueris.<\/span> <\/p>\n

20<\/sup>Homo, si dormierit cum muliere coitu seminis, quæ sit ancilla etiam nubilis, et tamen pretio non redempta, nec libertate donata: vapulabunt ambo, et non morientur, quia non fuit libera.<\/span> <\/p>\n

21<\/sup>Pro delicto autem suo offeret Domino ad ostium tabernaculi testimonii arietem:<\/span> <\/p>\n

22<\/sup>orabitque pro eo sacerdos, et pro peccato ejus coram Domino, et repropitiabitur ei, dimitteturque peccatum.<\/span> <\/p>\n

23<\/sup>Quando ingressi fueritis terram, et plantaveritis in ea ligna pomifera, auferetis præputia eorum: poma, quæ germinant, immunda erunt vobis, nec edetis ex eis.<\/span> <\/p>\n

24<\/sup>Quarto autem anno omnis fructus eorum sanctificabitur, laudabilis Domino.<\/span> <\/p>\n

25<\/sup>Quinto autem anno comedetis fructus, congregantes poma, quæ proferunt. Ego Dominus Deus vester.<\/span> <\/p>\n

26<\/sup>Non comedetis cum sanguine. Non augurabimini, nec observabitis somnia.<\/span> <\/p>\n

27<\/sup>Neque in rotundum attondebitis comam, nec radetis barbam.<\/span> <\/p>\n

28<\/sup>Et super mortuo non incidetis carnem vestram, neque figuras aliquas aut stigmata facietis vobis. Ego Dominus.<\/span> <\/p>\n

29<\/sup>Ne prostituas filiam tuam, ne contaminetur terra et impleatur piaculo.<\/span> <\/p>\n

30<\/sup>Sabbata mea custodite, et sanctuarium meum metuite. Ego Dominus.<\/span> <\/p>\n

31<\/sup>Non declinetis ad magos, nec ab ariolis aliquid sciscitemini, ut polluamini per eos. Ego Dominus Deus vester.<\/span> <\/p>\n

32<\/sup>Coram cano capite consurge, et honora personam senis: et time Dominum Deum tuum. Ego sum Dominus.<\/span> <\/p>\n

33<\/sup>Si habitaverit advena in terra vestra, et moratus fuerit inter vos, non exprobretis ei:<\/span> <\/p>\n

34<\/sup>sed sit inter vos quasi indigena, et diligetis eum quasi vosmetipsos: fuistis enim et vos advenæ in terra Ægypti. Ego Dominus Deus vester.<\/span> <\/p>\n

35<\/sup>Nolite facere iniquum aliquid in judicio, in regula, in pondere, in mensura.<\/span> <\/p>\n

36<\/sup>Statera justa, et æqua sint pondera, justus modius, æquusque sextarius. Ego Dominus Deus vester, qui eduxi vos de terra Ægypti.<\/span> <\/p>\n

37<\/sup>Custodite omnia præcepta mea, et universa judicia, et facite ea. Ego Dominus.<\/span> <\/p>\n

‹ Previous<\/a>Next ›<\/a><\/div>\n","page_title":"Leviticus, Chapter 19 — Latin Vulgate","book_title":"Leviticus","toolbar_title":"Leviticus — Ch. 19","prev_url":"\/vulgate\/1\/3\/18","next_url":"\/vulgate\/1\/3\/20","tid":1,"book_id":3,"chapter":19,"num_chapters":27,"trans":"Vulgate","is_rtl":false,"strongs_data":{},"bsb_glosses":{},"book_name":"Leviticus","canonical_url":"https:\/\/accept.gift\/vulgate\/1\/3\/19","meta_desc":"Locutus est Dominus ad Moysen, dicens: Loquere ad omnem cœtum filiorum Israël, et dices ad eos: Sancti estote, quia ego sanctus sum, Dominus Deus vester. Unu…"}