{"reader_html":"

LeviticusChapter 25<\/span><\/h1>\n

1<\/sup>Locutusque est Dominus ad Moysen in monte Sinai, dicens:<\/span> <\/p>\n

2<\/sup>Loquere filiis Israël, et dices ad eos: Quando ingressi fueritis terram quam ego dabo vobis, sabbatizes sabbatum Domino.<\/span> <\/p>\n

3<\/sup>Sex annis seres agrum tuum, et sex annis putabis vineam tuam, colligesque fructus ejus:<\/span> <\/p>\n

4<\/sup>septimo autem anno sabbatum erit terræ, requietionis Domini: agrum non seres, et vineam non putabis.<\/span> <\/p>\n

5<\/sup>Quæ sponte gignet humus, non metes: et uvas primitiarum tuarum non colliges quasi vindemiam: annus enim requietionis terræ est:<\/span> <\/p>\n

6<\/sup>sed erunt vobis in cibum, tibi et servo tuo, ancillæ et mercenario tuo, et advenæ qui peregrinantur apud te:<\/span> <\/p>\n

7<\/sup>jumentis tuis et pecoribus, omnia quæ nascuntur præbebunt cibum.<\/span> <\/p>\n

8<\/sup>Numerabis quoque tibi septem hebdomadas annorum, id est, septies septem, quæ simul faciunt annos quadraginta novem:<\/span> <\/p>\n

9<\/sup>et clanges buccina mense septimo, decima die mensis, propitiationis tempore, in universa terra vestra.<\/span> <\/p>\n

10<\/sup>Sanctificabisque annum quinquagesimum, et vocabis remissionem cunctis habitatoribus terræ tuæ: ipse est enim jubilæus. Revertetur homo ad possessionem suam, et unusquisque rediet ad familiam pristinam:<\/span> <\/p>\n

11<\/sup>quia jubilæus est, et quinquagesimus annus. Non seretis neque metetis sponte in agro nascentia, et primitias vindemiæ non colligetis,<\/span> <\/p>\n

12<\/sup>ob sanctificationem jubilæi: sed statim oblata comedetis.<\/span> <\/p>\n

13<\/sup>Anno jubilæi, redient omnes ad possessiones suas.<\/span> <\/p>\n

14<\/sup>Quando vendes quippiam civi tuo, vel emes ab eo, ne contristes fratrem tuum, sed juxta numerum annorum jubilæi emes ab eo,<\/span> <\/p>\n

15<\/sup>et juxta supputationem frugum vendet tibi.<\/span> <\/p>\n

16<\/sup>Quanto plures anni remanserint post jubilæum, tanto crescet et pretium: et quanto minus temporis numeraveris, tanto minoris et emptio constabit: tempus enim frugum vendet tibi.<\/span> <\/p>\n

17<\/sup>Nolite affligere contribules vestros, sed timeat unusquisque Deum suum, quia ego Dominus Deus vester.<\/span> <\/p>\n

18<\/sup>Facite præcepta mea, et judicia custodite, et implete ea: ut habitare possitis in terra absque ullo pavore,<\/span> <\/p>\n

19<\/sup>et gignat vobis humus fructus suos, quibus vescamini usque ad saturitatem, nullius impetum formidantes.<\/span> <\/p>\n

20<\/sup>Quod si dixeritis: Quid comedemus anno septimo, si non severimus, neque collegerimus fruges nostras?<\/span> <\/p>\n

21<\/sup>dabo benedictionem meam vobis anno sexto, et faciet fructus trium annorum:<\/span> <\/p>\n

22<\/sup>seretisque anno octavo, et comedetis veteres fruges usque ad nonum annum: donec nova nascantur, edetis vetera.<\/span> <\/p>\n

23<\/sup>Terra quoque non vendetur in perpetuum, quia mea est, et vos advenæ et coloni mei estis:<\/span> <\/p>\n

24<\/sup>unde cuncta regio possessionis vestræ sub redemptionis conditione vendetur.<\/span> <\/p>\n

25<\/sup>Si attenuatus frater tuus vendiderit possessiunculam suam, et voluerit propinquus ejus, potest redimere quod ille vendiderat.<\/span> <\/p>\n

26<\/sup>Sin autem non habuerit proximum, et ipse pretium ad redimendum potuerit invenire,<\/span> <\/p>\n

27<\/sup>computabuntur fructus ex eo tempore quo vendidit: et quod reliquum est, reddet emptori, sicque recipiet possessionem suam.<\/span> <\/p>\n

28<\/sup>Quod si non invenerit manus ejus ut reddat pretium, habebit emptor quod emerat, usque ad annum jubilæum. In ipso enim omnis venditio redibit ad dominum et ad possessorem pristinum.<\/span> <\/p>\n

29<\/sup>Qui vendiderit domum intra urbis muros, habebit licentiam redimendi, donec unus impleatur annus.<\/span> <\/p>\n

30<\/sup>Si non redemerit, et anni circulus fuerit evolutus, emptor possidebit eam, et posteri ejus in perpetuum, et redimi non poterit, etiam in jubilæo.<\/span> <\/p>\n

31<\/sup>Sin autem in villa domus, quæ muros non habet, agrorum jure vendetur: si ante redempta non fuerit, in jubilæo revertetur ad dominum.<\/span> <\/p>\n

32<\/sup>Ædes Levitarum quæ in urbibus sunt, semper possunt redimi:<\/span> <\/p>\n

33<\/sup>si redemptæ non fuerint, in jubilæo revertentur ad dominos, quia domus urbium Levitarum pro possessionibus sunt inter filios Israël.<\/span> <\/p>\n

34<\/sup>Suburbana autem eorum non veneant, quia possessio sempiterna est.<\/span> <\/p>\n

35<\/sup>Si attenuatus fuerit frater tuus, et infirmus manu, et susceperis eum quasi advenam et peregrinum, et vixerit tecum,<\/span> <\/p>\n

36<\/sup>ne accipias usuras ab eo, nec amplius quam dedisti: time Deum tuum, ut vivere possit frater tuus apud te.<\/span> <\/p>\n

37<\/sup>Pecuniam tuam non dabis ei ad usuram, et frugum superabundantiam non exiges.<\/span> <\/p>\n

38<\/sup>Ego Dominus Deus vester, qui eduxi vos de terra Ægypti, ut darem vobis terram Chanaan, et essem vester Deus.<\/span> <\/p>\n

39<\/sup>Si paupertate compulsus vendiderit se tibi frater tuus, non eum opprimes servitute famulorum,<\/span> <\/p>\n

40<\/sup>sed quasi mercenarius et colonus erit: usque ad annum jubilæum operabitur apud te,<\/span> <\/p>\n

41<\/sup>et postea egredietur cum liberis suis, et revertetur ad cognationem, ad possessionem patrum suorum.<\/span> <\/p>\n

42<\/sup>Mei enim servi sunt, et ego eduxi eos de terra Ægypti: non veneant conditione servorum:<\/span> <\/p>\n

43<\/sup>ne affligas eum per potentiam, sed metuito Deum tuum.<\/span> <\/p>\n

44<\/sup>Servus et ancilla sint vobis de nationibus quæ in circuitu vestro sunt:<\/span> <\/p>\n

45<\/sup>et de advenis qui peregrinantur apud vos, vel qui ex his nati fuerint in terra vestra, hos habebitis famulos:<\/span> <\/p>\n

46<\/sup>et hæreditario jure transmittetis ad posteros, ac possidebitis in æternum: fratres autem vestros filios Israël ne opprimatis per potentiam.<\/span> <\/p>\n

47<\/sup>Si invaluerit apud vos manus advenæ atque peregrini, et attenuatus frater tuus vendiderit se ei, aut cuiquam de stirpe ejus:<\/span> <\/p>\n

48<\/sup>post venditionem potest redimi. Qui voluerit ex fratribus suis, redimet eum,<\/span> <\/p>\n

49<\/sup>et patruus, et patruelis, et consanguineus, et affinis. Sin autem et ipse potuerit, redimet se,<\/span> <\/p>\n

50<\/sup>supputatis dumtaxat annis a tempore venditionis suæ usque ad annum jubilæum: et pecunia, qua venditus fuerat, juxta annorum numerum, et rationem mercenarii supputata.<\/span> <\/p>\n

51<\/sup>Si plures fuerint anni qui remanent usque ad jubilæum, secundum hos reddet et pretium:<\/span> <\/p>\n

52<\/sup>si pauci, ponet rationem cum eo juxta annorum numerum, et reddet emptori quod reliquum est annorum,<\/span> <\/p>\n

53<\/sup>quibus ante servivit mercedibus imputatis: non affliget eum violenter in conspectu tuo.<\/span> <\/p>\n

54<\/sup>Quod si per hæc redimi non potuerit, anno jubilæo egredietur cum liberis suis.<\/span> <\/p>\n

55<\/sup>Mei enim sunt servi filii Israël, quos eduxi de terra Ægypti.<\/span> <\/p>\n

‹ Previous<\/a>Next ›<\/a><\/div>\n","page_title":"Leviticus, Chapter 25 — Latin Vulgate","book_title":"Leviticus","toolbar_title":"Leviticus — Ch. 25","prev_url":"\/vulgate\/1\/3\/24","next_url":"\/vulgate\/1\/3\/26","tid":1,"book_id":3,"chapter":25,"num_chapters":27,"trans":"Vulgate","is_rtl":false,"strongs_data":{},"bsb_glosses":{},"book_name":"Leviticus","canonical_url":"https:\/\/accept.gift\/vulgate\/1\/3\/25","meta_desc":"Locutusque est Dominus ad Moysen in monte Sinai, dicens: Loquere filiis Israël, et dices ad eos: Quando ingressi fueritis terram quam ego dabo vobis, sabbati…"}