{"reader_html":"

NumbersChapter 10<\/span><\/h1>\n

1<\/sup>Locutusque est Dominus ad Moysen, dicens:<\/span> <\/p>\n

2<\/sup>Fac tibi duas tubas argenteas ductiles, quibus convocare possis multitudinem quando movenda sunt castra.<\/span> <\/p>\n

3<\/sup>Cumque increpueris tubis, congregabitur ad te omnis turba ad ostium tabernaculi fœderis.<\/span> <\/p>\n

4<\/sup>Si semel clangueris, venient ad te principes, et capita multitudinis Israël.<\/span> <\/p>\n

5<\/sup>Si autem prolixior atque concisus clangor increpuerit, movebunt castra primi qui sunt ad orientalem plagam.<\/span> <\/p>\n

6<\/sup>In secundo autem sonitu et pari ululatu tubæ, levabunt tentoria qui habitant ad meridiem; et juxta hunc modum reliqui facient, ululantibus tubis in profectionem.<\/span> <\/p>\n

7<\/sup>Quando autem congregandus est populus, simplex tubarum clangor erit, et non concise ululabunt.<\/span> <\/p>\n

8<\/sup>Filii autem Aaron sacerdotes clangent tubis: eritque hoc legitimum sempiternum in generationibus vestris.<\/span> <\/p>\n

9<\/sup>Si exieritis ad bellum de terra vestra contra hostes qui dimicant adversum vos, clangetis ululantibus tubis, et erit recordatio vestri coram Domino Deo vestro, ut eruamini de manibus inimicorum vestrorum.<\/span> <\/p>\n

10<\/sup>Siquando habebitis epulum, et dies festos, et calendas, canetis tubis super holocaustis, et pacificis victimis, ut sint vobis in recordationem Dei vestri. Ego Dominus Deus vester.<\/span> <\/p>\n

11<\/sup>Anno secundo, mense secundo, vigesima die mensis, elevata est nubes de tabernaculo fœderis:<\/span> <\/p>\n

12<\/sup>profectique sunt filii Israël per turmas suas de deserto Sinai, et recubuit nubes in solitudine Pharan.<\/span> <\/p>\n

13<\/sup>Moveruntque castra primi juxta imperium Domini in manu Moysi.<\/span> <\/p>\n

14<\/sup>Filii Juda per turmas suas: quorum princeps erat Nahasson filius Aminadab.<\/span> <\/p>\n

15<\/sup>In tribu filiorum Issachar fuit princeps Nathanaël filius Suar.<\/span> <\/p>\n

16<\/sup>In tribu Zabulon erat princeps Eliab filius Helon.<\/span> <\/p>\n

17<\/sup>Depositumque est tabernaculum, quod portantes egressi sunt filii Gerson et Merari.<\/span> <\/p>\n

18<\/sup>Profectique sunt et filii Ruben, per turmas et ordinem suum: quorum princeps erat Helisur filius Sedeur.<\/span> <\/p>\n

19<\/sup>In tribu autem filiorum Simeon, princeps fuit Salamiel filius Surisaddai.<\/span> <\/p>\n

20<\/sup>Porro in tribu Gad erat princeps Eliasaph filius Duel.<\/span> <\/p>\n

21<\/sup>Profectique sunt et Caathitæ portantes sanctuarium. Tamdiu tabernaculum portabatur, donec venirent ad erectionis locum.<\/span> <\/p>\n

22<\/sup>Moverunt castra et filii Ephraim per turmas suas, in quorum exercitu princeps erat Elisama filius Ammiud.<\/span> <\/p>\n

23<\/sup>In tribu autem filiorum Manasse princeps fuit Gamaliel filius Phadassur.<\/span> <\/p>\n

24<\/sup>Et in tribu Benjamin erat dux Abidan filius Gedeonis.<\/span> <\/p>\n

25<\/sup>Novissimi castrorum omnium profecti sunt filii Dan per turmas suas, in quorum exercitu princeps fuit Ahiezer filius Ammisaddai.<\/span> <\/p>\n

26<\/sup>In tribu autem filiorum Aser erat princeps Phegiel filius Ochran.<\/span> <\/p>\n

27<\/sup>Et in tribu filiorum Nephthali princeps fuit Ahira filius Enan.<\/span> <\/p>\n

28<\/sup>Hæc sunt castra, et profectiones filiorum Israël per turmas suas quando egrediebantur.<\/span> <\/p>\n

29<\/sup>Dixitque Moyses Hobab filio Raguel Madianitæ, cognato suo: Proficiscimur ad locum quem Dominus daturus est nobis: veni nobiscum, ut benefaciamus tibi, quia Dominus bona promisit Israëli.<\/span> <\/p>\n

30<\/sup>Cui ille respondit: Non vadam tecum, sed revertar in terram meam, in qua natus sum.<\/span> <\/p>\n

31<\/sup>Et ille: Noli, inquit, nos relinquere: tu enim nosti in quibus locis per desertum castra ponere debeamus, et eris ductor noster.<\/span> <\/p>\n

32<\/sup>Cumque nobiscum veneris, quidquid optimum fuerit ex opibus, quas nobis traditurus est Dominus, dabimus tibi.<\/span> <\/p>\n

33<\/sup>Profecti sunt ergo de monte Domini viam trium dierum, arcaque fœderis Domini præcedebat eos, per dies tres providens castrorum locum.<\/span> <\/p>\n

34<\/sup>Nubes quoque Domini super eos erat per diem cum incederent.<\/span> <\/p>\n

35<\/sup>Cumque elevaretur arca, dicebat Moyses: Surge, Domine, et dissipentur inimici tui, et fugiant qui oderunt te, a facie tua.<\/span> <\/p>\n

36<\/sup>Cum autem deponeretur, aiebat: Revertere, Domine, ad multitudinem exercitus Israël.<\/span> <\/p>\n

‹ Previous<\/a>Next ›<\/a><\/div>\n","page_title":"Numbers, Chapter 10 — Latin Vulgate","book_title":"Numbers","toolbar_title":"Numbers — Ch. 10","prev_url":"\/vulgate\/1\/4\/9","next_url":"\/vulgate\/1\/4\/11","tid":1,"book_id":4,"chapter":10,"num_chapters":36,"trans":"Vulgate","is_rtl":false,"strongs_data":{},"bsb_glosses":{},"book_name":"Numbers","canonical_url":"https:\/\/accept.gift\/vulgate\/1\/4\/10","meta_desc":"Locutusque est Dominus ad Moysen, dicens: Fac tibi duas tubas argenteas ductiles, quibus convocare possis multitudinem quando movenda sunt castra. Cumque inc…"}