{"reader_html":"<h1 class=\"chapter-heading\">Judges<span class=\"chapter-label\">Chapter 21<\/span><\/h1>\n<p class=\"verse-para\"><sup class=\"vnum\" data-v=\"1\" onclick=\"loadParallel(1,7,21,1,&quot;Judges&quot;)\">1<\/sup><span class=\"vtext\">Juraverunt quoque filii Israël in Maspha, et dixerunt: Nullus nostrum dabit filiis Benjamin de filiabus suis uxorem.<\/span> <\/p>\n<p class=\"verse-para\"><sup class=\"vnum\" data-v=\"2\" onclick=\"loadParallel(1,7,21,2,&quot;Judges&quot;)\">2<\/sup><span class=\"vtext\">Veneruntque omnes ad domum Dei in Silo, et in conspectu ejus sedentes usque ad vesperam, levaverunt vocem, et magno ululatu cœperunt flere, dicentes:<\/span> <\/p>\n<p class=\"verse-para\"><sup class=\"vnum\" data-v=\"3\" onclick=\"loadParallel(1,7,21,3,&quot;Judges&quot;)\">3<\/sup><span class=\"vtext\">Quare, Domine Deus Israël, factum est hoc malum in populo tuo, ut hodie una tribus auferretur ex nobis?<\/span> <\/p>\n<p class=\"verse-para\"><sup class=\"vnum\" data-v=\"4\" onclick=\"loadParallel(1,7,21,4,&quot;Judges&quot;)\">4<\/sup><span class=\"vtext\">Altera autem die diluculo consurgentes, exstruxerunt altare: obtuleruntque ibi holocausta, et pacificas victimas, et dixerunt:<\/span> <\/p>\n<p class=\"verse-para\"><sup class=\"vnum\" data-v=\"5\" onclick=\"loadParallel(1,7,21,5,&quot;Judges&quot;)\">5<\/sup><span class=\"vtext\">Quis non ascendit in exercitu Domini de universis tribubus Israël? grandi enim juramento se constrinxerant, cum essent in Maspha, interfici eos qui defuissent.<\/span> <\/p>\n<p class=\"verse-para\"><sup class=\"vnum\" data-v=\"6\" onclick=\"loadParallel(1,7,21,6,&quot;Judges&quot;)\">6<\/sup><span class=\"vtext\">Ductique pœnitentia filii Israël super fratre suo Benjamin, cœperunt dicere: Ablata est tribus una de Israël:<\/span> <\/p>\n<p class=\"verse-para\"><sup class=\"vnum\" data-v=\"7\" onclick=\"loadParallel(1,7,21,7,&quot;Judges&quot;)\">7<\/sup><span class=\"vtext\">unde uxores accipient? omnes enim in commune juravimus, non daturos nos his filias nostras.<\/span> <\/p>\n<p class=\"verse-para\"><sup class=\"vnum\" data-v=\"8\" onclick=\"loadParallel(1,7,21,8,&quot;Judges&quot;)\">8<\/sup><span class=\"vtext\">Idcirco dixerunt: Quis est de universis tribubus Israël, qui non ascendit ad Dominum in Maspha? Et ecce inventi sunt habitatores Jabes Galaad in illo exercitu non fuisse.<\/span> <\/p>\n<p class=\"verse-para\"><sup class=\"vnum\" data-v=\"9\" onclick=\"loadParallel(1,7,21,9,&quot;Judges&quot;)\">9<\/sup><span class=\"vtext\">(Eo quoque tempore cum essent in Silo, nullus ex eis ibi repertus est.)<\/span> <\/p>\n<p class=\"verse-para\"><sup class=\"vnum\" data-v=\"10\" onclick=\"loadParallel(1,7,21,10,&quot;Judges&quot;)\">10<\/sup><span class=\"vtext\">Miserunt itaque decem millia viros robustissimos, et præceperunt eis: Ite, et percutite habitatores Jabes Galaad in ore gladii, tam uxores quam parvulos eorum.<\/span> <\/p>\n<p class=\"verse-para\"><sup class=\"vnum\" data-v=\"11\" onclick=\"loadParallel(1,7,21,11,&quot;Judges&quot;)\">11<\/sup><span class=\"vtext\">Et hoc erit quod observare debebitis: omne generis masculini, et mulieres quæ cognoverunt viros, interficite; virgines autem reservate.<\/span> <\/p>\n<p class=\"verse-para\"><sup class=\"vnum\" data-v=\"12\" onclick=\"loadParallel(1,7,21,12,&quot;Judges&quot;)\">12<\/sup><span class=\"vtext\">Inventæque sunt de Jabes Galaad quadringentæ virgines, quæ nescierunt viri thorum: et adduxerunt eas ad castra in Silo, in terram Chanaan.<\/span> <\/p>\n<p class=\"verse-para\"><sup class=\"vnum\" data-v=\"13\" onclick=\"loadParallel(1,7,21,13,&quot;Judges&quot;)\">13<\/sup><span class=\"vtext\">Miseruntque nuntios ad filios Benjamin, qui erant in petra Remmon, et præceperunt eis, ut eos susciperent in pace.<\/span> <\/p>\n<p class=\"verse-para\"><sup class=\"vnum\" data-v=\"14\" onclick=\"loadParallel(1,7,21,14,&quot;Judges&quot;)\">14<\/sup><span class=\"vtext\">Veneruntque filii Benjamin in illo tempore, et datæ sunt eis uxores de filiabus Jabes Galaad: alias autem non repererunt, quas simili modo traderent.<\/span> <\/p>\n<p class=\"verse-para\"><sup class=\"vnum\" data-v=\"15\" onclick=\"loadParallel(1,7,21,15,&quot;Judges&quot;)\">15<\/sup><span class=\"vtext\">Universusque Israël valde doluit, et egit pœnitentiam super interfectione unius tribus ex Israël.<\/span> <\/p>\n<p class=\"verse-para\"><sup class=\"vnum\" data-v=\"16\" onclick=\"loadParallel(1,7,21,16,&quot;Judges&quot;)\">16<\/sup><span class=\"vtext\">Dixeruntque majores natu: Quid faciemus reliquis, qui non acceperunt uxores? omnes in Benjamin feminæ conciderunt,<\/span> <\/p>\n<p class=\"verse-para\"><sup class=\"vnum\" data-v=\"17\" onclick=\"loadParallel(1,7,21,17,&quot;Judges&quot;)\">17<\/sup><span class=\"vtext\">et magna nobis cura, ingentique studio providendum est, ne una tribus deleatur ex Israël.<\/span> <\/p>\n<p class=\"verse-para\"><sup class=\"vnum\" data-v=\"18\" onclick=\"loadParallel(1,7,21,18,&quot;Judges&quot;)\">18<\/sup><span class=\"vtext\">Filias enim nostras eis dare non possumus, constricti juramento et maledictione qua diximus: Maledictus qui dederit de filiabus suis uxorem Benjamin.<\/span> <\/p>\n<p class=\"verse-para\"><sup class=\"vnum\" data-v=\"19\" onclick=\"loadParallel(1,7,21,19,&quot;Judges&quot;)\">19<\/sup><span class=\"vtext\">Ceperuntque consilium, atque dixerunt: Ecce solemnitas Domini est in Silo anniversaria, quæ sita est ad septentrionem urbis Bethel, et ad orientalem plagam viæ, quæ de Bethel tendit ad Sichimam, et ad meridiem oppidi Lebona.<\/span> <\/p>\n<p class=\"verse-para\"><sup class=\"vnum\" data-v=\"20\" onclick=\"loadParallel(1,7,21,20,&quot;Judges&quot;)\">20<\/sup><span class=\"vtext\">Præceperuntque filiis Benjamin, atque dixerunt: Ite, ad latitate in vineis.<\/span> <\/p>\n<p class=\"verse-para\"><sup class=\"vnum\" data-v=\"21\" onclick=\"loadParallel(1,7,21,21,&quot;Judges&quot;)\">21<\/sup><span class=\"vtext\">Cumque videritis filias Silo ad ducendos choros ex more procedere, exite repente de vineis, et rapite ex eis singuli uxores singulas, et pergite in terram Benjamin.<\/span> <\/p>\n<p class=\"verse-para\"><sup class=\"vnum\" data-v=\"22\" onclick=\"loadParallel(1,7,21,22,&quot;Judges&quot;)\">22<\/sup><span class=\"vtext\">Cumque venerint patres earum, ac fratres, et adversum vos queri cœperint atque jurgari, dicemus eis: Miseremini eorum: non enim rapuerunt eas jure bellantium atque victorum: sed rogantibus ut acciperent, non dedistis, et a vestra parte peccatum est.<\/span> <\/p>\n<p class=\"verse-para\"><sup class=\"vnum\" data-v=\"23\" onclick=\"loadParallel(1,7,21,23,&quot;Judges&quot;)\">23<\/sup><span class=\"vtext\">Feceruntque filii Benjamin ut sibi fuerat imperatum: et juxta numerum suum, rapuerunt sibi de his quæ ducebant choros, uxores singulas: abieruntque in possessionem suam ædificantes urbes, et habitantes in eis.<\/span> <\/p>\n<p class=\"verse-para\"><sup class=\"vnum\" data-v=\"24\" onclick=\"loadParallel(1,7,21,24,&quot;Judges&quot;)\">24<\/sup><span class=\"vtext\">Filii quoque Israël reversi sunt per tribus et familias in tabernacula sua. In diebus illis non erat rex in Israël: sed unusquisque quod sibi rectum videbatur, hoc faciebat.<\/span> <\/p>\n<div class=\"bottom-nav\"><a href=\"\/vulgate\/1\/7\/20\" class=\"nav-btn-lg nav-ajax\">&lsaquo; Previous<\/a><a href=\"\/vulgate\/1\/8\/1\" class=\"nav-btn-lg nav-ajax\">Next &rsaquo;<\/a><\/div>\n","page_title":"Judges, Chapter 21 — Latin Vulgate","book_title":"Judges","toolbar_title":"Judges — Ch. 21","prev_url":"\/vulgate\/1\/7\/20","next_url":"\/vulgate\/1\/8\/1","tid":1,"book_id":7,"chapter":21,"num_chapters":21,"trans":"Vulgate","is_rtl":false,"strongs_data":{},"bsb_glosses":{},"book_name":"Judges","canonical_url":"https:\/\/accept.gift\/vulgate\/1\/7\/21","meta_desc":"Juraverunt quoque filii Israël in Maspha, et dixerunt: Nullus nostrum dabit filiis Benjamin de filiabus suis uxorem. Veneruntque omnes ad domum Dei in Silo,…"}