{"reader_html":"<h1 class=\"chapter-heading\">1 Samuel<span class=\"chapter-label\">Chapter 15<\/span><\/h1>\n<p class=\"verse-para\"><sup class=\"vnum\" data-v=\"1\" onclick=\"loadParallel(1,9,15,1,&quot;1 Samuel&quot;)\">1<\/sup><span class=\"vtext\">Et dixit Samuel ad Saul: Me misit Dominus ut ungerem te in regem super populum ejus Israël: nunc ergo audi vocem Domini.<\/span> <\/p>\n<p class=\"verse-para\"><sup class=\"vnum\" data-v=\"2\" onclick=\"loadParallel(1,9,15,2,&quot;1 Samuel&quot;)\">2<\/sup><span class=\"vtext\">Hæc dicit Dominus exercituum: Recensui quæcumque fecit Amalec Israëli: quomodo restitit ei in via cum ascenderet de Ægypto.<\/span> <\/p>\n<p class=\"verse-para\"><sup class=\"vnum\" data-v=\"3\" onclick=\"loadParallel(1,9,15,3,&quot;1 Samuel&quot;)\">3<\/sup><span class=\"vtext\">Nunc ergo vade, et percute Amalec, et demolire universa ejus: non parcas ei, et non concupiscas ex rebus ipsius aliquid, sed interfice a viro usque ad mulierem, et parvulum atque lactentem, bovem et ovem, camelum et asinum.<\/span> <\/p>\n<p class=\"verse-para\"><sup class=\"vnum\" data-v=\"4\" onclick=\"loadParallel(1,9,15,4,&quot;1 Samuel&quot;)\">4<\/sup><span class=\"vtext\">Præcepit itaque Saul populo, et recensuit eos quasi agnos: ducenta millia peditum, et decem millia virorum Juda.<\/span> <\/p>\n<p class=\"verse-para\"><sup class=\"vnum\" data-v=\"5\" onclick=\"loadParallel(1,9,15,5,&quot;1 Samuel&quot;)\">5<\/sup><span class=\"vtext\">Cumque venisset Saul usque ad civitatem Amalec, tetendit insidias in torrente.<\/span> <\/p>\n<p class=\"verse-para\"><sup class=\"vnum\" data-v=\"6\" onclick=\"loadParallel(1,9,15,6,&quot;1 Samuel&quot;)\">6<\/sup><span class=\"vtext\">Dixitque Saul Cinæo: Abite, recedite, atque descendite ab Amalec, ne forte involvam te cum eo: tu enim fecisti misericordiam cum omnibus filiis Israël, cum ascenderent de Ægypto. Et recessit Cinæus de medio Amalec.<\/span> <\/p>\n<p class=\"verse-para\"><sup class=\"vnum\" data-v=\"7\" onclick=\"loadParallel(1,9,15,7,&quot;1 Samuel&quot;)\">7<\/sup><span class=\"vtext\">Percussitque Saul Amalec ab Hevila donec venias ad Sur, quæ est e regione Ægypti.<\/span> <\/p>\n<p class=\"verse-para\"><sup class=\"vnum\" data-v=\"8\" onclick=\"loadParallel(1,9,15,8,&quot;1 Samuel&quot;)\">8<\/sup><span class=\"vtext\">Et apprehendit Agag regem Amalec vivum: omne autem vulgus interfecit in ore gladii.<\/span> <\/p>\n<p class=\"verse-para\"><sup class=\"vnum\" data-v=\"9\" onclick=\"loadParallel(1,9,15,9,&quot;1 Samuel&quot;)\">9<\/sup><span class=\"vtext\">Et pepercit Saul et populus Agag, et optimis gregibus ovium et armentorum, et vestibus et arietibus, et universis quæ pulchra erant, nec voluerunt disperdere ea: quidquid vero vile fuit et reprobum, hoc demoliti sunt.<\/span> <\/p>\n<p class=\"verse-para\"><sup class=\"vnum\" data-v=\"10\" onclick=\"loadParallel(1,9,15,10,&quot;1 Samuel&quot;)\">10<\/sup><span class=\"vtext\">Factum est autem verbum Domini ad Samuel, dicens:<\/span> <\/p>\n<p class=\"verse-para\"><sup class=\"vnum\" data-v=\"11\" onclick=\"loadParallel(1,9,15,11,&quot;1 Samuel&quot;)\">11<\/sup><span class=\"vtext\">Pœnitet me quod constituerim Saul regem: quia dereliquit me, et verba mea opere non implevit. Contristatusque est Samuel, et clamavit ad Dominum tota nocte.<\/span> <\/p>\n<p class=\"verse-para\"><sup class=\"vnum\" data-v=\"12\" onclick=\"loadParallel(1,9,15,12,&quot;1 Samuel&quot;)\">12<\/sup><span class=\"vtext\">Cumque de nocte surrexisset Samuel ut iret ad Saul mane, nuntiatum est Samueli eo quod venisset Saul in Carmelum, et erexisset sibi fornicem triumphalem, et reversus transisset, descendissetque in Galgala. Venit ergo Samuel ad Saul, et Saul offerebat holocaustum Domino de initiis prædarum quæ attulerat ex Amalec.<\/span> <\/p>\n<p class=\"verse-para\"><sup class=\"vnum\" data-v=\"13\" onclick=\"loadParallel(1,9,15,13,&quot;1 Samuel&quot;)\">13<\/sup><span class=\"vtext\">Et cum venisset Samuel ad Saul, dixit ei Saul: Benedictus tu Domino: implevi verbum Domini.<\/span> <\/p>\n<p class=\"verse-para\"><sup class=\"vnum\" data-v=\"14\" onclick=\"loadParallel(1,9,15,14,&quot;1 Samuel&quot;)\">14<\/sup><span class=\"vtext\">Dixitque Samuel: Et quæ est hæc vox gregum, quæ resonat in auribus meis, et armentorum, quam ego audio?<\/span> <\/p>\n<p class=\"verse-para\"><sup class=\"vnum\" data-v=\"15\" onclick=\"loadParallel(1,9,15,15,&quot;1 Samuel&quot;)\">15<\/sup><span class=\"vtext\">Et ait Saul: De Amalec adduxerunt ea: pepercit enim populus melioribus ovibus et armentis ut immolarentur Domino Deo tuo, reliqua vero occidimus.<\/span> <\/p>\n<p class=\"verse-para\"><sup class=\"vnum\" data-v=\"16\" onclick=\"loadParallel(1,9,15,16,&quot;1 Samuel&quot;)\">16<\/sup><span class=\"vtext\">Ait autem Samuel ad Saul: Sine me, et indicabo tibi quæ locutus sit Dominus ad me nocte. Dixitque ei: Loquere.<\/span> <\/p>\n<p class=\"verse-para\"><sup class=\"vnum\" data-v=\"17\" onclick=\"loadParallel(1,9,15,17,&quot;1 Samuel&quot;)\">17<\/sup><span class=\"vtext\">Et ait Samuel: Nonne cum parvulus esses in oculis tuis, caput in tribubus Israël factus es? unxitque te Dominus in regem super Israël,<\/span> <\/p>\n<p class=\"verse-para\"><sup class=\"vnum\" data-v=\"18\" onclick=\"loadParallel(1,9,15,18,&quot;1 Samuel&quot;)\">18<\/sup><span class=\"vtext\">et misit te Dominus in viam, et ait: Vade, et interfice peccatores Amalec, et pugnabis contra eos usque ad internecionem eorum?<\/span> <\/p>\n<p class=\"verse-para\"><sup class=\"vnum\" data-v=\"19\" onclick=\"loadParallel(1,9,15,19,&quot;1 Samuel&quot;)\">19<\/sup><span class=\"vtext\">Quare ergo non audisti vocem Domini: sed versus ad prædam es, et fecisti malum in oculis Domini?<\/span> <\/p>\n<p class=\"verse-para\"><sup class=\"vnum\" data-v=\"20\" onclick=\"loadParallel(1,9,15,20,&quot;1 Samuel&quot;)\">20<\/sup><span class=\"vtext\">Et ait Saul ad Samuelem: Immo audivi vocem Domini, et ambulavi in via per quam misit me Dominus, et adduxi Agag regem Amalec, et Amalec interfeci.<\/span> <\/p>\n<p class=\"verse-para\"><sup class=\"vnum\" data-v=\"21\" onclick=\"loadParallel(1,9,15,21,&quot;1 Samuel&quot;)\">21<\/sup><span class=\"vtext\">Tulit autem de præda populus oves et boves, primitias eorum quæ cæsa sunt, ut immolet Domino Deo suo in Galgalis.<\/span> <\/p>\n<p class=\"verse-para\"><sup class=\"vnum\" data-v=\"22\" onclick=\"loadParallel(1,9,15,22,&quot;1 Samuel&quot;)\">22<\/sup><span class=\"vtext\">Et ait Samuel: Numquid vult Dominus holocausta et victimas, et non potius ut obediatur voci Domini? melior est enim obedientia quam victimæ, et auscultare magis quam offerre adipem arietum.<\/span> <\/p>\n<p class=\"verse-para\"><sup class=\"vnum\" data-v=\"23\" onclick=\"loadParallel(1,9,15,23,&quot;1 Samuel&quot;)\">23<\/sup><span class=\"vtext\">Quoniam quasi peccatum ariolandi est, repugnare: et quasi scelus idololatriæ, nolle acquiescere. Pro eo ergo quod abjecisti sermonem Domini, abjecit te Dominus ne sis rex.<\/span> <\/p>\n<p class=\"verse-para\"><sup class=\"vnum\" data-v=\"24\" onclick=\"loadParallel(1,9,15,24,&quot;1 Samuel&quot;)\">24<\/sup><span class=\"vtext\">Dixitque Saul ad Samuelem: Peccavi, quia prævaricatus sum sermonem Domini et verba tua, timens populum, et obediens voci eorum.<\/span> <\/p>\n<p class=\"verse-para\"><sup class=\"vnum\" data-v=\"25\" onclick=\"loadParallel(1,9,15,25,&quot;1 Samuel&quot;)\">25<\/sup><span class=\"vtext\">Sed nunc porta, quæso, peccatum meum, et revertere mecum, ut adorem Dominum.<\/span> <\/p>\n<p class=\"verse-para\"><sup class=\"vnum\" data-v=\"26\" onclick=\"loadParallel(1,9,15,26,&quot;1 Samuel&quot;)\">26<\/sup><span class=\"vtext\">Et ait Samuel ad Saul: Non revertar tecum, quia projecisti sermonem Domini, et projecit te Dominus ne sis rex super Israël.<\/span> <\/p>\n<p class=\"verse-para\"><sup class=\"vnum\" data-v=\"27\" onclick=\"loadParallel(1,9,15,27,&quot;1 Samuel&quot;)\">27<\/sup><span class=\"vtext\">Et conversus est Samuel ut abiret: ille autem apprehendit summitatem pallii ejus, quæ et scissa est.<\/span> <\/p>\n<p class=\"verse-para\"><sup class=\"vnum\" data-v=\"28\" onclick=\"loadParallel(1,9,15,28,&quot;1 Samuel&quot;)\">28<\/sup><span class=\"vtext\">Et ait ad eum Samuel: Scidit Dominus regnum Israël a te hodie, et tradidit illud proximo tuo meliori te.<\/span> <\/p>\n<p class=\"verse-para\"><sup class=\"vnum\" data-v=\"29\" onclick=\"loadParallel(1,9,15,29,&quot;1 Samuel&quot;)\">29<\/sup><span class=\"vtext\">Porro triumphator in Israël non parcet, et pœnitudine non flectetur: neque enim homo est ut agat pœnitentiam.<\/span> <\/p>\n<p class=\"verse-para\"><sup class=\"vnum\" data-v=\"30\" onclick=\"loadParallel(1,9,15,30,&quot;1 Samuel&quot;)\">30<\/sup><span class=\"vtext\">At ille ait: Peccavi: sed nunc honora me coram senioribus populi mei et coram Israël, et revertere mecum, ut adorem Dominum Deum tuum.<\/span> <\/p>\n<p class=\"verse-para\"><sup class=\"vnum\" data-v=\"31\" onclick=\"loadParallel(1,9,15,31,&quot;1 Samuel&quot;)\">31<\/sup><span class=\"vtext\">Reversus ergo Samuel secutus est Saulem: et adoravit Saul Dominum.<\/span> <\/p>\n<p class=\"verse-para\"><sup class=\"vnum\" data-v=\"32\" onclick=\"loadParallel(1,9,15,32,&quot;1 Samuel&quot;)\">32<\/sup><span class=\"vtext\">Dixitque Samuel: Adducite ad me Agag regem Amalec. Et oblatus est ei Agag, pinguissimus et tremens. Et dixit Agag: Siccine separat amara mors?<\/span> <\/p>\n<p class=\"verse-para\"><sup class=\"vnum\" data-v=\"33\" onclick=\"loadParallel(1,9,15,33,&quot;1 Samuel&quot;)\">33<\/sup><span class=\"vtext\">Et ait Samuel: Sicut fecit absque liberis mulieres gladius tuus, sic absque liberis erit inter mulieres mater tua. Et in frustra concidit eum Samuel coram Domino in Galgalis.<\/span> <\/p>\n<p class=\"verse-para\"><sup class=\"vnum\" data-v=\"34\" onclick=\"loadParallel(1,9,15,34,&quot;1 Samuel&quot;)\">34<\/sup><span class=\"vtext\">Abiit autem Samuel in Ramatha: Saul vero ascendit in domum suam in Gabaa.<\/span> <\/p>\n<p class=\"verse-para\"><sup class=\"vnum\" data-v=\"35\" onclick=\"loadParallel(1,9,15,35,&quot;1 Samuel&quot;)\">35<\/sup><span class=\"vtext\">Et non vidit Samuel ultra Saul usque ad diem mortis suæ: verumtamen lugebat Samuel Saulem, quoniam Dominum pœnitebat quod constituisset eum regem super Israël.<\/span> <\/p>\n<div class=\"bottom-nav\"><a href=\"\/vulgate\/1\/9\/14\" class=\"nav-btn-lg nav-ajax\">&lsaquo; Previous<\/a><a href=\"\/vulgate\/1\/9\/16\" class=\"nav-btn-lg nav-ajax\">Next &rsaquo;<\/a><\/div>\n","page_title":"1 Samuel, Chapter 15 — Latin Vulgate","book_title":"1 Samuel","toolbar_title":"1 Samuel — Ch. 15","prev_url":"\/vulgate\/1\/9\/14","next_url":"\/vulgate\/1\/9\/16","tid":1,"book_id":9,"chapter":15,"num_chapters":31,"trans":"Vulgate","is_rtl":false,"strongs_data":{},"bsb_glosses":{},"book_name":"1 Samuel","canonical_url":"https:\/\/accept.gift\/vulgate\/1\/9\/15","meta_desc":"Et dixit Samuel ad Saul: Me misit Dominus ut ungerem te in regem super populum ejus Israël: nunc ergo audi vocem Domini. Hæc dicit Dominus exercituum: Recens…"}