{"reader_html":"<h1 class=\"chapter-heading\">1 Samuel<span class=\"chapter-label\">Chapter 20<\/span><\/h1>\n<p class=\"verse-para\"><sup class=\"vnum\" data-v=\"1\" onclick=\"loadParallel(1,9,20,1,&quot;1 Samuel&quot;)\">1<\/sup><span class=\"vtext\">Fugit autem David de Najoth, quæ est in Ramatha, veniensque locutus est coram Jonatha: Quid feci? quæ est iniquitas mea, et quod peccatum meum in patrem tuum, quia quærit animam meam?<\/span> <\/p>\n<p class=\"verse-para\"><sup class=\"vnum\" data-v=\"2\" onclick=\"loadParallel(1,9,20,2,&quot;1 Samuel&quot;)\">2<\/sup><span class=\"vtext\">Qui dixit ei: Absit, non morieris: neque enim faciet pater meus quidquam grande vel parvum, nisi prius indicaverit mihi: hunc ergo celavit me pater meus sermonem tantummodo? nequaquam erit istud.<\/span> <\/p>\n<p class=\"verse-para\"><sup class=\"vnum\" data-v=\"3\" onclick=\"loadParallel(1,9,20,3,&quot;1 Samuel&quot;)\">3<\/sup><span class=\"vtext\">Et juravit rursum Davidi. Et ille ait: Scit profecto pater tuus quia inveni gratiam in oculis tuis, et dicet: Nesciat hoc Jonathas, ne forte tristetur. Quinimmo vivit Dominus, et vivit anima tua, quia uno tantum (ut ita dicam) gradu ego morsque dividimur.<\/span> <\/p>\n<p class=\"verse-para\"><sup class=\"vnum\" data-v=\"4\" onclick=\"loadParallel(1,9,20,4,&quot;1 Samuel&quot;)\">4<\/sup><span class=\"vtext\">Et ait Jonathas ad David: Quodcumque dixerit mihi anima tua, faciam tibi.<\/span> <\/p>\n<p class=\"verse-para\"><sup class=\"vnum\" data-v=\"5\" onclick=\"loadParallel(1,9,20,5,&quot;1 Samuel&quot;)\">5<\/sup><span class=\"vtext\">Dixit autem David ad Jonathan: Ecce calendæ sunt crastino, et ego ex more sedere soleo juxta regem ad vescendum: dimitte ergo me ut abscondar in agro usque ad vesperam diei tertiæ.<\/span> <\/p>\n<p class=\"verse-para\"><sup class=\"vnum\" data-v=\"6\" onclick=\"loadParallel(1,9,20,6,&quot;1 Samuel&quot;)\">6<\/sup><span class=\"vtext\">Si respiciens requisierit me pater tuus, respondebis ei: Rogavit me David ut iret celeriter in Bethlehem civitatem suam, quia victimæ solemnes ibi sunt universis contribulibus suis.<\/span> <\/p>\n<p class=\"verse-para\"><sup class=\"vnum\" data-v=\"7\" onclick=\"loadParallel(1,9,20,7,&quot;1 Samuel&quot;)\">7<\/sup><span class=\"vtext\">Si dixerit: Bene: pax erit servo tuo. Si autem fuerit iratus, scito quia completa est malitia ejus.<\/span> <\/p>\n<p class=\"verse-para\"><sup class=\"vnum\" data-v=\"8\" onclick=\"loadParallel(1,9,20,8,&quot;1 Samuel&quot;)\">8<\/sup><span class=\"vtext\">Fac ergo misericordiam in servum tuum, quia fœdus Domini me famulum tuum tecum inire fecisti: si autem est iniquitas aliqua in me, tu me interfice, et ad patrem tuum ne introducas me.<\/span> <\/p>\n<p class=\"verse-para\"><sup class=\"vnum\" data-v=\"9\" onclick=\"loadParallel(1,9,20,9,&quot;1 Samuel&quot;)\">9<\/sup><span class=\"vtext\">Et ait Jonathas: Absit hoc a te: neque enim fieri potest, ut si certe cognovero completam esse patris mei malitiam contra te, non annuntiem tibi.<\/span> <\/p>\n<p class=\"verse-para\"><sup class=\"vnum\" data-v=\"10\" onclick=\"loadParallel(1,9,20,10,&quot;1 Samuel&quot;)\">10<\/sup><span class=\"vtext\">Responditque David ad Jonathan: Quis renuntiabit mihi, si quid forte responderit tibi pater tuus dure de me?<\/span> <\/p>\n<p class=\"verse-para\"><sup class=\"vnum\" data-v=\"11\" onclick=\"loadParallel(1,9,20,11,&quot;1 Samuel&quot;)\">11<\/sup><span class=\"vtext\">Et ait Jonathas ad David: Veni, et egrediamur foras in agrum. Cumque exissent ambo in agrum,<\/span> <\/p>\n<p class=\"verse-para\"><sup class=\"vnum\" data-v=\"12\" onclick=\"loadParallel(1,9,20,12,&quot;1 Samuel&quot;)\">12<\/sup><span class=\"vtext\">ait Jonathas ad David: Domine Deus Israël, si investigavero sententiam patris mei crastino vel perendie, et aliquid boni fuerit super David, et non statim misero ad te, et notum tibi fecero,<\/span> <\/p>\n<p class=\"verse-para\"><sup class=\"vnum\" data-v=\"13\" onclick=\"loadParallel(1,9,20,13,&quot;1 Samuel&quot;)\">13<\/sup><span class=\"vtext\">hæc faciat Dominus Jonathæ, et hæc addat. Si autem perseveraverit patris mei malitia adversum te, revelabo aurem tuam, et dimittam te, ut vadas in pace, et sit Dominus tecum, sicut fuit cum patre meo.<\/span> <\/p>\n<p class=\"verse-para\"><sup class=\"vnum\" data-v=\"14\" onclick=\"loadParallel(1,9,20,14,&quot;1 Samuel&quot;)\">14<\/sup><span class=\"vtext\">Et si vixero, facies mihi misericordiam Domini: si vero mortuus fuero,<\/span> <\/p>\n<p class=\"verse-para\"><sup class=\"vnum\" data-v=\"15\" onclick=\"loadParallel(1,9,20,15,&quot;1 Samuel&quot;)\">15<\/sup><span class=\"vtext\">non auferes misericordiam tuam a domo mea usque in sempiternum, quando eradicaverit Dominus inimicos David, unumquemque de terra: auferat Jonathan de domo sua, et requirat Dominus de manu inimicorum David.<\/span> <\/p>\n<p class=\"verse-para\"><sup class=\"vnum\" data-v=\"16\" onclick=\"loadParallel(1,9,20,16,&quot;1 Samuel&quot;)\">16<\/sup><span class=\"vtext\">Pepigit ergo Jonathas fœdus cum domo David: et requisivit Dominus de manu inimicorum David.<\/span> <\/p>\n<p class=\"verse-para\"><sup class=\"vnum\" data-v=\"17\" onclick=\"loadParallel(1,9,20,17,&quot;1 Samuel&quot;)\">17<\/sup><span class=\"vtext\">Et addidit Jonathas dejerare David, eo quod diligeret illum: sicut enim animam suam, ita diligebat eum.<\/span> <\/p>\n<p class=\"verse-para\"><sup class=\"vnum\" data-v=\"18\" onclick=\"loadParallel(1,9,20,18,&quot;1 Samuel&quot;)\">18<\/sup><span class=\"vtext\">Dixitque ad eum Jonathas: Cras calendæ sunt, et requireris:<\/span> <\/p>\n<p class=\"verse-para\"><sup class=\"vnum\" data-v=\"19\" onclick=\"loadParallel(1,9,20,19,&quot;1 Samuel&quot;)\">19<\/sup><span class=\"vtext\">requiretur enim sessio tua usque perendie. Descendes ergo festinus, et venies in locum ubi celandus es in die qua operari licet, et sedebis juxta lapidem cui nomen est Ezel.<\/span> <\/p>\n<p class=\"verse-para\"><sup class=\"vnum\" data-v=\"20\" onclick=\"loadParallel(1,9,20,20,&quot;1 Samuel&quot;)\">20<\/sup><span class=\"vtext\">Et ego tres sagittas mittam juxta eum, et jaciam quasi exercens me ad signum.<\/span> <\/p>\n<p class=\"verse-para\"><sup class=\"vnum\" data-v=\"21\" onclick=\"loadParallel(1,9,20,21,&quot;1 Samuel&quot;)\">21<\/sup><span class=\"vtext\">Mittam quoque et puerum, dicens ei: Vade, et affer mihi sagittas.<\/span> <\/p>\n<p class=\"verse-para\"><sup class=\"vnum\" data-v=\"22\" onclick=\"loadParallel(1,9,20,22,&quot;1 Samuel&quot;)\">22<\/sup><span class=\"vtext\">Si dixero puero: Ecce sagittæ intra te sunt, tolle eas: tu veni ad me, quia pax tibi est, et nihil est mali, vivit Dominus. Si autem sic locutus fuero puero: Ecce sagittæ ultra te sunt: vade in pace, quia dimisit te Dominus.<\/span> <\/p>\n<p class=\"verse-para\"><sup class=\"vnum\" data-v=\"23\" onclick=\"loadParallel(1,9,20,23,&quot;1 Samuel&quot;)\">23<\/sup><span class=\"vtext\">De verbo autem quod locuti sumus ego et tu, sit Dominus inter me et te usque in sempiternum.<\/span> <\/p>\n<p class=\"verse-para\"><sup class=\"vnum\" data-v=\"24\" onclick=\"loadParallel(1,9,20,24,&quot;1 Samuel&quot;)\">24<\/sup><span class=\"vtext\">Absconditus est ergo David in agro, et venerunt calendæ, et sedit rex ad comedendum panem.<\/span> <\/p>\n<p class=\"verse-para\"><sup class=\"vnum\" data-v=\"25\" onclick=\"loadParallel(1,9,20,25,&quot;1 Samuel&quot;)\">25<\/sup><span class=\"vtext\">Cumque sedisset rex super cathedram suam (secundum consuetudinem) quæ erat juxta parietem, surrexit Jonathas, et sedit Abner ex latere Saul: vacuusque apparuit locus David.<\/span> <\/p>\n<p class=\"verse-para\"><sup class=\"vnum\" data-v=\"26\" onclick=\"loadParallel(1,9,20,26,&quot;1 Samuel&quot;)\">26<\/sup><span class=\"vtext\">Et non est locutus Saul quidquam in die illa: cogitabat enim quod forte evenisset ei, ut non esset mundus, nec purificatus.<\/span> <\/p>\n<p class=\"verse-para\"><sup class=\"vnum\" data-v=\"27\" onclick=\"loadParallel(1,9,20,27,&quot;1 Samuel&quot;)\">27<\/sup><span class=\"vtext\">Cumque illuxisset dies secunda post calendas, rursus apparuit vacuus locus David. Dixitque Saul ad Jonathan filium suum: Cur non venit filius Isai nec heri nec hodie ad vescendum?<\/span> <\/p>\n<p class=\"verse-para\"><sup class=\"vnum\" data-v=\"28\" onclick=\"loadParallel(1,9,20,28,&quot;1 Samuel&quot;)\">28<\/sup><span class=\"vtext\">Responditque Jonathas Sauli: Rogavit me obnixe ut iret in Bethlehem,<\/span> <\/p>\n<p class=\"verse-para\"><sup class=\"vnum\" data-v=\"29\" onclick=\"loadParallel(1,9,20,29,&quot;1 Samuel&quot;)\">29<\/sup><span class=\"vtext\">et ait: Dimitte me, quoniam sacrificium solemne est in civitate, unus de fratribus meis accersivit me: nunc ergo si inveni gratiam in oculis tuis, vadam cito, et videbo fratres meos. Ob hanc causam non venit ad mensam regis.<\/span> <\/p>\n<p class=\"verse-para\"><sup class=\"vnum\" data-v=\"30\" onclick=\"loadParallel(1,9,20,30,&quot;1 Samuel&quot;)\">30<\/sup><span class=\"vtext\">Iratus autem Saul adversum Jonathan, dixit ei: Fili mulieris virum ultro rapientis, numquid ignoro quia diligis filium Isai in confusionem tuam, et in confusionem ignominiosæ matris tuæ?<\/span> <\/p>\n<p class=\"verse-para\"><sup class=\"vnum\" data-v=\"31\" onclick=\"loadParallel(1,9,20,31,&quot;1 Samuel&quot;)\">31<\/sup><span class=\"vtext\">Omnibus enim diebus quibus filius Isai vixerit super terram, non stabilieris tu, neque regnum tuum. Itaque jam nunc mitte, et adduc eum ad me: quia filius mortis est.<\/span> <\/p>\n<p class=\"verse-para\"><sup class=\"vnum\" data-v=\"32\" onclick=\"loadParallel(1,9,20,32,&quot;1 Samuel&quot;)\">32<\/sup><span class=\"vtext\">Respondens autem Jonathas Sauli patri suo, ait: Quare morietur? quid fecit?<\/span> <\/p>\n<p class=\"verse-para\"><sup class=\"vnum\" data-v=\"33\" onclick=\"loadParallel(1,9,20,33,&quot;1 Samuel&quot;)\">33<\/sup><span class=\"vtext\">Et arripuit Saul lanceam ut percuteret eum. Et intellexit Jonathas quod definitum esset a patre suo, ut interficeret David.<\/span> <\/p>\n<p class=\"verse-para\"><sup class=\"vnum\" data-v=\"34\" onclick=\"loadParallel(1,9,20,34,&quot;1 Samuel&quot;)\">34<\/sup><span class=\"vtext\">Surrexit ergo Jonathas a mensa in ira furoris, et non comedit in die calendarum secunda panem. Contristatus est enim super David, eo quod confudisset eum pater suus.<\/span> <\/p>\n<p class=\"verse-para\"><sup class=\"vnum\" data-v=\"35\" onclick=\"loadParallel(1,9,20,35,&quot;1 Samuel&quot;)\">35<\/sup><span class=\"vtext\">Cumque illuxisset mane, venit Jonathas in agrum juxta placitum David, et puer parvulus cum eo.<\/span> <\/p>\n<p class=\"verse-para\"><sup class=\"vnum\" data-v=\"36\" onclick=\"loadParallel(1,9,20,36,&quot;1 Samuel&quot;)\">36<\/sup><span class=\"vtext\">Et ait ad puerum suum: Vade, et affer mihi sagittas quas ego jacio. Cumque puer cucurrisset, jecit aliam sagittam trans puerum.<\/span> <\/p>\n<p class=\"verse-para\"><sup class=\"vnum\" data-v=\"37\" onclick=\"loadParallel(1,9,20,37,&quot;1 Samuel&quot;)\">37<\/sup><span class=\"vtext\">Venit itaque puer ad locum jaculi quod miserat Jonathas: et clamavit Jonathas post tergum pueri, et ait: Ecce ibi est sagitta porro ultra te.<\/span> <\/p>\n<p class=\"verse-para\"><sup class=\"vnum\" data-v=\"38\" onclick=\"loadParallel(1,9,20,38,&quot;1 Samuel&quot;)\">38<\/sup><span class=\"vtext\">Clamavitque iterum Jonathas post tergum pueri, dicens: Festina velociter, ne steteris. Collegit autem puer Jonathæ sagittas, et attulit ad dominum suum:<\/span> <\/p>\n<p class=\"verse-para\"><sup class=\"vnum\" data-v=\"39\" onclick=\"loadParallel(1,9,20,39,&quot;1 Samuel&quot;)\">39<\/sup><span class=\"vtext\">et quid ageretur, penitus ignorabat, tantummodo enim Jonathas et David rem noverant.<\/span> <\/p>\n<p class=\"verse-para\"><sup class=\"vnum\" data-v=\"40\" onclick=\"loadParallel(1,9,20,40,&quot;1 Samuel&quot;)\">40<\/sup><span class=\"vtext\">Dedit ergo Jonathas arma sua puero, et dixit ei: Vade, et defer in civitatem.<\/span> <\/p>\n<p class=\"verse-para\"><sup class=\"vnum\" data-v=\"41\" onclick=\"loadParallel(1,9,20,41,&quot;1 Samuel&quot;)\">41<\/sup><span class=\"vtext\">Cumque abiisset puer, surrexit David de loco qui vergebat ad austrum, et cadens pronus in terram, adoravit tertio: et osculantes se alterutrum, fleverunt pariter, David autem amplius.<\/span> <\/p>\n<p class=\"verse-para\"><sup class=\"vnum\" data-v=\"42\" onclick=\"loadParallel(1,9,20,42,&quot;1 Samuel&quot;)\">42<\/sup><span class=\"vtext\">Dixit ergo Jonathas ad David: Vade in pace: quæcumque juravimus ambo in nomine Domini, dicentes: Dominus sit inter me et te, et inter semen meum et semen tuum usque in sempiternum.<\/span> <\/p>\n<p class=\"verse-para\"><sup class=\"vnum\" data-v=\"43\" onclick=\"loadParallel(1,9,20,43,&quot;1 Samuel&quot;)\">43<\/sup><span class=\"vtext\">Et surrexit David, et abiit: sed et Jonathas ingressus est civitatem.<\/span> <\/p>\n<div class=\"bottom-nav\"><a href=\"\/vulgate\/1\/9\/19\" class=\"nav-btn-lg nav-ajax\">&lsaquo; Previous<\/a><a href=\"\/vulgate\/1\/9\/21\" class=\"nav-btn-lg nav-ajax\">Next &rsaquo;<\/a><\/div>\n","page_title":"1 Samuel, Chapter 20 — Latin Vulgate","book_title":"1 Samuel","toolbar_title":"1 Samuel — Ch. 20","prev_url":"\/vulgate\/1\/9\/19","next_url":"\/vulgate\/1\/9\/21","tid":1,"book_id":9,"chapter":20,"num_chapters":31,"trans":"Vulgate","is_rtl":false,"strongs_data":{},"bsb_glosses":{},"book_name":"1 Samuel","canonical_url":"https:\/\/accept.gift\/vulgate\/1\/9\/20","meta_desc":"Fugit autem David de Najoth, quæ est in Ramatha, veniensque locutus est coram Jonatha: Quid feci? quæ est iniquitas mea, et quod peccatum meum in patrem tuum…"}