{"reader_html":"

The Gospel According to MatthewChapter 15<\/span><\/h1>\n

1<\/sup>Tunc accesserunt ad eum ab Jerosolymis scribæ et pharisæi, dicentes:<\/span> <\/p>\n

2<\/sup>Quare discipuli tui transgrediuntur traditionem seniorum? non enim lavant manus suas cum panem manducant.<\/span> <\/p>\n

3<\/sup>Ipse autem respondens ait illis: Quare et vos transgredimini mandatum Dei propter traditionem vestram? Nam Deus dixit:<\/span> <\/p>\n

4<\/sup>Honora patrem, et matrem: et, Qui maledixerit patri, vel matri, morte moriatur.<\/span> <\/p>\n

5<\/sup>Vos autem dicitis: Quicumque dixerit patri, vel matri: Munus, quodcumque est ex me, tibi proderit:<\/span> <\/p>\n

6<\/sup>et non honorificavit patrem suum, aut matrem suam: et irritum fecistis mandatum Dei propter traditionem vestram.<\/span> <\/p>\n

7<\/sup>Hypocritæ, bene prophetavit de vobis Isaias, dicens:<\/span> <\/p>\n

8<\/sup>Populus hic labiis me honorat: cor autem eorum longe est a me.<\/span> <\/p>\n

9<\/sup>Sine causa autem colunt me, docentes doctrinas et mandata hominum.<\/span> <\/p>\n

10<\/sup>Et convocatis ad se turbis, dixit eis: Audite, et intelligite.<\/span> <\/p>\n

11<\/sup>Non quod intrat in os, coinquinat hominem: sed quod procedit ex ore, hoc coinquinat hominem.<\/span> <\/p>\n

12<\/sup>Tunc accedentes discipuli ejus, dixerunt ei: Scis quia pharisæi audito verbo hoc, scandalizati sunt?<\/span> <\/p>\n

13<\/sup>At ille respondens ait: Omnis plantatio, quam non plantavit Pater meus cælestis, eradicabitur.<\/span> <\/p>\n

14<\/sup>Sinite illos: cæci sunt, et duces cæcorum; cæcus autem si cæco ducatum præstet, ambo in foveam cadunt.<\/span> <\/p>\n

15<\/sup>Respondens autem Petrus dixit ei: Edissere nobis parabolam istam.<\/span> <\/p>\n

16<\/sup>At ille dixit: Adhuc et vos sine intellectu estis?<\/span> <\/p>\n

17<\/sup>Non intelligitis quia omne quod in os intrat, in ventrem vadit, et in secessum emittitur?<\/span> <\/p>\n

18<\/sup>Quæ autem procedunt de ore, de corde exeunt, et ea coinquinant hominem:<\/span> <\/p>\n

19<\/sup>de corde enim exeunt cogitationes malæ, homicidia, adulteria, fornicationes, furta, falsa testimonia, blasphemiæ:<\/span> <\/p>\n

20<\/sup>hæc sunt, quæ coinquinant hominem. Non lotis autem manibus manducare, non coinquinat hominem.<\/span> <\/p>\n

21<\/sup>Et egressus inde Jesus secessit in partes Tyri et Sidonis.<\/span> <\/p>\n

22<\/sup>Et ecce mulier chananæa a finibus illis egressa clamavit, dicens ei: Miserere mei, Domine fili David: filia mea male a dæmonio vexatur.<\/span> <\/p>\n

23<\/sup>Qui non respondit ei verbum. Et accedentes discipuli ejus rogabant eum dicentes: Dimitte eam: quia clamat post nos.<\/span> <\/p>\n

24<\/sup>Ipse autem respondens ait: Non sum missus nisi ad oves, quæ perierunt domus Israël.<\/span> <\/p>\n

25<\/sup>At illa venit, et adoravit eum, dicens: Domine, adjuva me.<\/span> <\/p>\n

26<\/sup>Qui respondens ait: Non est bonum sumere panem filiorum, et mittere canibus.<\/span> <\/p>\n

27<\/sup>At illa dixit: Etiam Domine: nam et catelli edunt de micis quæ cadunt de mensa dominorum suorum.<\/span> <\/p>\n

28<\/sup>Tunc respondens Jesus, ait illi: O mulier, magna est fides tua: fiat tibi sicut vis. Et sanata est filia ejus ex illa hora.<\/span> <\/p>\n

29<\/sup>Et cum transisset inde Jesus, venit secus mare Galilææ: et ascendens in montem, sedebat ibi.<\/span> <\/p>\n

30<\/sup>Et accesserunt ad eum turbæ multæ, habentes secum mutos, cæcos, claudos, debiles, et alios multos: et projecerunt eos ad pedes ejus, et curavit eos,<\/span> <\/p>\n

31<\/sup>ita ut turbæ mirarentur, videntes mutos loquentes, claudos ambulantes, cæcos videntes: et magnificabant Deum Israël.<\/span> <\/p>\n

32<\/sup>Jesus autem, convocatis discipulis suis, dixit: Misereor turbæ, quia triduo jam perseverant mecum, et non habent quod manducent: et dimittere eos jejunos nolo, ne deficiant in via.<\/span> <\/p>\n

33<\/sup>Et dicunt ei discipuli: Unde ergo nobis in deserto panes tantos, ut saturemus turbam tantam?<\/span> <\/p>\n

34<\/sup>Et ait illis Jesus: Quot habetis panes? At illi dixerunt: Septem, et paucos pisciculos.<\/span> <\/p>\n

35<\/sup>Et præcepit turbæ ut discumberent super terram.<\/span> <\/p>\n

36<\/sup>Et accipiens septem panes, et pisces, et gratias agens, fregit, et dedit discipulis suis, et discipuli dederunt populo.<\/span> <\/p>\n

37<\/sup>Et comederunt omnes, et saturati sunt. Et quod superfuit de fragmentis, tulerunt septem sportas plenas.<\/span> <\/p>\n

38<\/sup>Erant autem qui manducaverunt quatuor millia hominum, extra parvulos et mulieres.<\/span> <\/p>\n

39<\/sup>Et, dimissa turba, ascendit in naviculam: et venit in fines Magedan.<\/span> <\/p>\n

‹ Previous<\/a>Next ›<\/a><\/div>\n","page_title":"The Gospel According to Matthew, Chapter 15 — Latin Vulgate","book_title":"The Gospel According to Matthew","toolbar_title":"The Gospel According to Matthew — Ch. 15","prev_url":"\/vulgate\/2\/1\/14","next_url":"\/vulgate\/2\/1\/16","tid":2,"book_id":1,"chapter":15,"num_chapters":28,"trans":"Vulgate","is_rtl":false,"strongs_data":{},"bsb_glosses":{},"book_name":"Matthew","canonical_url":"https:\/\/accept.gift\/vulgate\/2\/1\/15","meta_desc":"Tunc accesserunt ad eum ab Jerosolymis scribæ et pharisæi, dicentes: Quare discipuli tui transgrediuntur traditionem seniorum? non enim lavant manus suas cum…"}