{"reader_html":"

The Gospel According to MatthewChapter 22<\/span><\/h1>\n

1<\/sup>Et respondens Jesus, dixit iterum in parabolis eis, dicens:<\/span> <\/p>\n

2<\/sup>Simile factum est regnum cælorum homini regi, qui fecit nuptias filio suo.<\/span> <\/p>\n

3<\/sup>Et misit servos suos vocare invitatos ad nuptias, et nolebant venire.<\/span> <\/p>\n

4<\/sup>Iterum misit alios servos, dicens: Dicite invitatis: Ecce prandium meum paravi, tauri mei et altilia occisa sunt, et omnia parata: venite ad nuptias.<\/span> <\/p>\n

5<\/sup>Illi autem neglexerunt: et abierunt, alius in villam suam, alius vero ad negotiationem suam:<\/span> <\/p>\n

6<\/sup>reliqui vero tenuerunt servos ejus, et contumeliis affectos occiderunt.<\/span> <\/p>\n

7<\/sup>Rex autem cum audisset, iratus est: et missis exercitibus suis, perdidit homicidas illos, et civitatem illorum succendit.<\/span> <\/p>\n

8<\/sup>Tunc ait servis suis: Nuptiæ quidem paratæ sunt, sed qui invitati erant, non fuerunt digni:<\/span> <\/p>\n

9<\/sup>ite ergo ad exitus viarum, et quoscumque inveneritis, vocate ad nuptias.<\/span> <\/p>\n

10<\/sup>Et egressi servi ejus in vias, congregaverunt omnes quos invenerunt, malos et bonos: et impletæ sunt nuptiæ discumbentium.<\/span> <\/p>\n

11<\/sup>Intravit autem rex ut videret discumbentes, et vidit ibi hominem non vestitum veste nuptiali.<\/span> <\/p>\n

12<\/sup>Et ait illi: Amice, quomodo huc intrasti non habens vestem nuptialem? At ille obmutuit.<\/span> <\/p>\n

13<\/sup>Tunc dicit rex ministris: Ligatis manibus et pedibus ejus, mittite eum in tenebras exteriores: ibi erit fletus et stridor dentium.<\/span> <\/p>\n

14<\/sup>Multi enim sunt vocati, pauci vero electi.<\/span> <\/p>\n

15<\/sup>Tunc abeuntes pharisæi, consilium inierunt ut caperent eum in sermone.<\/span> <\/p>\n

16<\/sup>Et mittunt ei discipulos suos cum Herodianis, dicentes: Magister, scimus quia verax es, et viam Dei in veritate doces, et non est tibi cura de aliquo: non enim respicis personam hominum:<\/span> <\/p>\n

17<\/sup>dic ergo nobis quid tibi videtur, licet censum dare Cæsari, an non?<\/span> <\/p>\n

18<\/sup>Cognita autem Jesus nequitia eorum, ait: Quid me tentatis, hypocritæ?<\/span> <\/p>\n

19<\/sup>ostendite mihi numisma census. At illi obtulerunt ei denarium.<\/span> <\/p>\n

20<\/sup>Et ait illis Jesus: Cujus est imago hæc, et superscriptio?<\/span> <\/p>\n

21<\/sup>Dicunt ei: Cæsaris. Tunc ait illis: Reddite ergo quæ sunt Cæsaris, Cæsari: et quæ sunt Dei, Deo.<\/span> <\/p>\n

22<\/sup>Et audientes mirati sunt, et relicto eo abierunt.<\/span> <\/p>\n

23<\/sup>In illo die accesserunt ad eum sadducæi, qui dicunt non esse resurrectionem: et interrogaverunt eum,<\/span> <\/p>\n

24<\/sup>dicentes: Magister, Moyses dixit: Si quis mortuus fuerit non habens filium, ut ducat frater ejus uxorem illius, et suscitet semen fratri suo.<\/span> <\/p>\n

25<\/sup>Erant autem apud nos septem fratres: et primus, uxore ducta, defunctus est: et non habens semen, reliquit uxorem suam fratri suo.<\/span> <\/p>\n

26<\/sup>Similiter secundus, et tertius usque ad septimum.<\/span> <\/p>\n

27<\/sup>Novissime autem omnium et mulier defuncta est.<\/span> <\/p>\n

28<\/sup>In resurrectione ergo cujus erit de septem uxor? omnes enim habuerunt eam.<\/span> <\/p>\n

29<\/sup>Respondens autem Jesus, ait illis: Erratis nescientes Scripturas, neque virtutem Dei.<\/span> <\/p>\n

30<\/sup>In resurrectione enim neque nubent, neque nubentur: sed erunt sicut angeli Dei in cælo.<\/span> <\/p>\n

31<\/sup>De resurrectione autem mortuorum non legistis quod dictum est a Deo dicente vobis:<\/span> <\/p>\n

32<\/sup>Ego sum Deus Abraham, et Deus Isaac, et Deus Jacob? Non est Deus mortuorum, sed viventium.<\/span> <\/p>\n

33<\/sup>Et audientes turbæ, mirabantur in doctrina ejus.<\/span> <\/p>\n

34<\/sup>Pharisæi autem audientes quod silentium imposuisset sadducæis, convenerunt in unum:<\/span> <\/p>\n

35<\/sup>et interrogavit eum unus ex eis legis doctor, tentans eum:<\/span> <\/p>\n

36<\/sup>Magister, quod est mandatum magnum in lege?<\/span> <\/p>\n

37<\/sup>Ait illi Jesus: Diliges Dominum Deum tuum ex toto corde tuo, et in tota anima tua, et in tota mente tua.<\/span> <\/p>\n

38<\/sup>Hoc est maximum, et primum mandatum.<\/span> <\/p>\n

39<\/sup>Secundum autem simile est huic: Diliges proximum tuum, sicut teipsum.<\/span> <\/p>\n

40<\/sup>In his duobus mandatis universa lex pendet, et prophetæ.<\/span> <\/p>\n

41<\/sup>Congregatis autem pharisæis, interrogavit eos Jesus,<\/span> <\/p>\n

42<\/sup>dicens: Quid vobis videtur de Christo? cujus filius est? Dicunt ei: David.<\/span> <\/p>\n

43<\/sup>Ait illis: Quomodo ergo David in spiritu vocat eum Dominum, dicens:<\/span> <\/p>\n

44<\/sup>Dixit Dominus Domino meo: Sede a dextris meis, donec ponam inimicos tuos scabellum pedum tuorum?<\/span> <\/p>\n

45<\/sup>Si ergo David vocat eum Dominum, quomodo filius ejus est?<\/span> <\/p>\n

46<\/sup>Et nemo poterat ei respondere verbum: neque ausus fuit quisquam ex illa die eum amplius interrogare.<\/span> <\/p>\n

‹ Previous<\/a>Next ›<\/a><\/div>\n","page_title":"The Gospel According to Matthew, Chapter 22 — Latin Vulgate","book_title":"The Gospel According to Matthew","toolbar_title":"The Gospel According to Matthew — Ch. 22","prev_url":"\/vulgate\/2\/1\/21","next_url":"\/vulgate\/2\/1\/23","tid":2,"book_id":1,"chapter":22,"num_chapters":28,"trans":"Vulgate","is_rtl":false,"strongs_data":{},"bsb_glosses":{},"book_name":"Matthew","canonical_url":"https:\/\/accept.gift\/vulgate\/2\/1\/22","meta_desc":"Et respondens Jesus, dixit iterum in parabolis eis, dicens: Simile factum est regnum cælorum homini regi, qui fecit nuptias filio suo. Et misit servos suos v…"}