{"reader_html":"

HebrewsChapter 3<\/span><\/h1>\n

1<\/sup>Unde, fratres sancti, vocationis cælestis participes, considerate Apostolum, et pontificem confessionis nostræ Jesum:<\/span> <\/p>\n

2<\/sup>qui fidelis est ei, qui fecit illum, sicut et Moyses in omni domo ejus.<\/span> <\/p>\n

3<\/sup>Amplioris enim gloriæ iste præ Moyse dignus est habitus, quanto ampliorem honorem habet domus, qui fabricavit illam.<\/span> <\/p>\n

4<\/sup>Omnis namque domus fabricatur ab aliquo: qui autem omnia creavit, Deus est.<\/span> <\/p>\n

5<\/sup>Et Moyses quidem fidelis erat in tota domo ejus tamquam famulus, in testimonium eorum, quæ dicenda erant:<\/span> <\/p>\n

6<\/sup>Christus vero tamquam filius in domo sua: quæ domus sumus nos, si fiduciam, et gloriam spei usque ad finem, firmam retineamus.<\/span> <\/p>\n

7<\/sup>Quapropter sicut dicit Spiritus Sanctus: Hodie si vocem ejus audieritis,<\/span> <\/p>\n

8<\/sup>nolite obdurare corda vestra, sicut in exacerbatione secundum diem tentationis in deserto,<\/span> <\/p>\n

9<\/sup>ubi tentaverunt me patres vestri: probaverunt, et viderunt opera mea<\/span> <\/p>\n

10<\/sup>quadraginta annis: propter quod infensus fui generationi huic, et dixi: Semper errant corde. Ipsi autem non cognoverunt vias meas,<\/span> <\/p>\n

11<\/sup>sicut juravi in ira mea: Si introibunt in requiem meam.<\/span> <\/p>\n

12<\/sup>Videte fratres, ne forte sit in aliquo vestrum cor malum incredulitatis, discedendi a Deo vivo:<\/span> <\/p>\n

13<\/sup>sed adhortamini vosmetipsos per singulos dies, donec hodie cognominatur, ut non obduretur quis ex vobis fallacia peccati.<\/span> <\/p>\n

14<\/sup>Participes enim Christi effecti sumus, si tamen initium substantiæ ejus usque ad finem firmum retineamus.<\/span> <\/p>\n

15<\/sup>Dum dicitur: Hodie si vocem ejus audieritis, nolite obdurare corda vestra, quemadmodum in illa exacerbatione.<\/span> <\/p>\n

16<\/sup>Quidam enim audientes exacerbaverunt: sed non universi qui profecti sunt ex Ægypto per Moysen.<\/span> <\/p>\n

17<\/sup>Quibus autem infensus est quadraginta annis? nonne illis qui peccaverunt, quorum cadavera prostrata sunt in deserto?<\/span> <\/p>\n

18<\/sup>Quibus autem juravit non introire in requiem ipsius, nisi illis qui increduli fuerunt?<\/span> <\/p>\n

19<\/sup>Et videmus, quia non potuerunt introire propter incredulitatem.<\/span> <\/p>\n

‹ Previous<\/a>Next ›<\/a><\/div>\n","page_title":"Hebrews, Chapter 3 — Latin Vulgate","book_title":"Hebrews","toolbar_title":"Hebrews — Ch. 3","prev_url":"\/vulgate\/2\/19\/2","next_url":"\/vulgate\/2\/19\/4","tid":2,"book_id":19,"chapter":3,"num_chapters":13,"trans":"Vulgate","is_rtl":false,"strongs_data":{},"bsb_glosses":{},"book_name":"Hebrews","canonical_url":"https:\/\/accept.gift\/vulgate\/2\/19\/3","meta_desc":"Unde, fratres sancti, vocationis cælestis participes, considerate Apostolum, et pontificem confessionis nostræ Jesum: qui fidelis est ei, qui fecit illum, si…"}