{"reader_html":"

The Gospel According to LukeChapter 11<\/span><\/h1>\n

1<\/sup>Et factum est: cum esset in quodam loco orans, ut cessavit, dixit unus ex discipulis ejus ad eum: Domine, doce nos orare, sicut docuit et Joannes discipulos suos.<\/span> <\/p>\n

2<\/sup>Et ait illis: Cum oratis, dicite: Pater, sanctificetur nomen tuum. Adveniat regnum tuum.<\/span> <\/p>\n

3<\/sup>Panem nostrum quotidianum da nobis hodie.<\/span> <\/p>\n

4<\/sup>Et dimitte nobis peccata nostra, siquidem et ipsi dimittimus omni debenti nobis. Et ne nos inducas in tentationem.<\/span> <\/p>\n

5<\/sup>Et ait ad illos: Quis vestrum habebit amicum, et ibit ad illum media nocte, et dicet illi: Amice, commoda mihi tres panes,<\/span> <\/p>\n

6<\/sup>quoniam amicus meus venit de via ad me, et non habeo quod ponam ante illum,<\/span> <\/p>\n

7<\/sup>et ille de intus respondens dicat: Noli mihi molestus esse, jam ostium clausum est, et pueri mei mecum sunt in cubili: non possum surgere, et dare tibi.<\/span> <\/p>\n

8<\/sup>Et si ille perseveraverit pulsans: dico vobis, etsi non dabit illi surgens eo quod amicus ejus sit, propter improbitatem tamen ejus surget, et dabit illi quotquot habet necessarios.<\/span> <\/p>\n

9<\/sup>Et ego dico vobis: Petite, et dabitur vobis; quærite, et invenietis; pulsate, et aperietur vobis.<\/span> <\/p>\n

10<\/sup>Omnis enim qui petit, accipit: et qui quærit, invenit: et pulsanti aperietur.<\/span> <\/p>\n

11<\/sup>Quis autem ex vobis patrem petit panem, numquid lapidem dabit illi? aut piscem, numquid pro pisce serpentem dabit illi?<\/span> <\/p>\n

12<\/sup>aut si petierit ovum, numquid porriget illi scorpionem?<\/span> <\/p>\n

13<\/sup>Si ergo vos, cum sitis mali, nostis bona data dare filiis vestris: quanto magis Pater vester de cælo dabit spiritum bonum petentibus se?<\/span> <\/p>\n

14<\/sup>Et erat ejiciens dæmonium, et illud erat mutum. Et cum ejecisset dæmonium, locutus est mutus, et admiratæ sunt turbæ.<\/span> <\/p>\n

15<\/sup>Quidam autem ex eis dixerunt: In Beelzebub principe dæmoniorum ejicit dæmonia.<\/span> <\/p>\n

16<\/sup>Et alii tentantes, signum de cælo quærebant ab eo.<\/span> <\/p>\n

17<\/sup>Ipse autem ut vidit cogitationes eorum, dixit eis: Omne regnum in seipsum divisum desolabitur, et domus supra domum cadet.<\/span> <\/p>\n

18<\/sup>Si autem et Satanas in seipsum divisus est, quomodo stabit regnum ejus? quia dicitis in Beelzebub me ejicere dæmonia.<\/span> <\/p>\n

19<\/sup>Si autem ego in Beelzebub ejicio dæmonia: filii vestri in quo ejiciunt? ideo ipsi judices vestri erunt.<\/span> <\/p>\n

20<\/sup>Porro si in digito Dei ejicio dæmonia: profecto pervenit in vos regnum Dei.<\/span> <\/p>\n

21<\/sup>Cum fortis armatus custodit atrium suum, in pace sunt ea quæ possidet.<\/span> <\/p>\n

22<\/sup>Si autem fortior eo superveniens vicerit eum, universa arma ejus auferet, in quibus confidebat, et spolia ejus distribuet.<\/span> <\/p>\n

23<\/sup>Qui non est mecum, contra me est: et qui non colligit mecum, dispergit.<\/span> <\/p>\n

24<\/sup>Cum immundus spiritus exierit de homine, ambulat per loca inaquosa, quærens requiem: et non inveniens dicit: Revertar in domum meam unde exivi.<\/span> <\/p>\n

25<\/sup>Et cum venerit, invenit eam scopis mundatam, et ornatam.<\/span> <\/p>\n

26<\/sup>Tunc vadit, et assumit septem alios spiritus secum, nequiores se, et ingressi habitant ibi. Et fiunt novissima hominis illius pejora prioribus.<\/span> <\/p>\n

27<\/sup>Factum est autem, cum hæc diceret: extollens vocem quædam mulier de turba dixit illi: Beatus venter qui te portavit, et ubera quæ suxisti.<\/span> <\/p>\n

28<\/sup>At ille dixit: Quinimmo beati, qui audiunt verbum Dei et custodiunt illud.<\/span> <\/p>\n

29<\/sup>Turbis autem concurrentibus cœpit dicere: Generatio hæc, generatio nequam est: signum quærit, et signum non dabitur ei, nisi signum Jonæ prophetæ.<\/span> <\/p>\n

30<\/sup>Nam sicut fuit Jonas signum Ninivitis, ita erit et Filius hominis generationi isti.<\/span> <\/p>\n

31<\/sup>Regina austri surget in judicio cum viris generationis hujus, et condemnabit illos: quia venit a finibus terræ audire sapientiam Salomonis: et ecce plus quam Salomon hic.<\/span> <\/p>\n

32<\/sup>Viri Ninivitæ surgent in judicio cum generatione hac, et condemnabunt illam: quia pœnitentiam egerunt ad prædicationem Jonæ, et ecce plus quam Jonas hic.<\/span> <\/p>\n

33<\/sup>Nemo lucernam accendit, et in abscondito ponit, neque sub modio: sed supra candelabrum, ut qui ingrediuntur, lumen videant.<\/span> <\/p>\n

34<\/sup>Lucerna corporis tui est oculus tuus. Si oculus tuus fuerit simplex, totum corpus tuum lucidum erit: si autem nequam fuerit, etiam corpus tuum tenebrosum erit.<\/span> <\/p>\n

35<\/sup>Vide ergo ne lumen quod in te est, tenebræ sint.<\/span> <\/p>\n

36<\/sup>Si ergo corpus tuum totum lucidum fuerit, non habens aliquam partem tenebrarum, erit lucidum totum, et sicut lucerna fulgoris illuminabit te.<\/span> <\/p>\n

37<\/sup>Et cum loqueretur, rogavit illum quidam pharisæus ut pranderet apud se. Et ingressus recubuit.<\/span> <\/p>\n

38<\/sup>Pharisæus autem cœpit intra se reputans dicere, quare non baptizatus esset ante prandium.<\/span> <\/p>\n

39<\/sup>Et ait Dominus ad illum: Nunc vos pharisæi, quod deforis est calicis et catini, mundatis: quod autem intus est vestrum, plenum est rapina et iniquitate.<\/span> <\/p>\n

40<\/sup>Stulti! nonne qui fecit quod deforis est, etiam id quod deintus est fecit?<\/span> <\/p>\n

41<\/sup>Verumtamen quod superest, date eleemosynam: et ecce omnia munda sunt vobis.<\/span> <\/p>\n

42<\/sup>Sed væ vobis, pharisæis, quia decimatis mentham, et rutam, et omne olus, et præteritis judicium et caritatem Dei: hæc autem oportuit facere, et illa non omittere.<\/span> <\/p>\n

43<\/sup>Væ vobis, pharisæis, quia diligitis primas cathedras in synagogis, et salutationes in foro.<\/span> <\/p>\n

44<\/sup>Væ vobis, quia estis ut monumenta, quæ non apparent, et homines ambulantes supra, nesciunt.<\/span> <\/p>\n

45<\/sup>Respondens autem quidam ex legisperitis, ait illi: Magister, hæc dicens etiam contumeliam nobis facis.<\/span> <\/p>\n

46<\/sup>At ille ait: Et vobis legisperitis væ: quia oneratis homines oneribus, quæ portare non possunt, et ipsi uno digito vestro non tangitis sarcinas.<\/span> <\/p>\n

47<\/sup>Væ vobis, qui ædificatis monumenta prophetarum: patres autem vestri occiderunt illos.<\/span> <\/p>\n

48<\/sup>Profecto testificamini quod consentitis operibus patrum vestrorum: quoniam ipsi quidem eos occiderunt, vos autem ædificatis eorum sepulchra.<\/span> <\/p>\n

49<\/sup>Propterea et sapientia Dei dixit: Mittam ad illos prophetas, et apostolos, et ex illis occident, et persequentur:<\/span> <\/p>\n

50<\/sup>ut inquiratur sanguis omnium prophetarum, qui effusus est a constitutione mundi a generatione ista,<\/span> <\/p>\n

51<\/sup>a sanguine Abel, usque ad sanguinem Zachariæ, qui periit inter altare et ædem. Ita dico vobis, requiretur ab hac generatione.<\/span> <\/p>\n

52<\/sup>Væ vobis, legisperitis, quia tulistis clavem scientiæ: ipsi non introistis, et eos qui introibant, prohibuistis.<\/span> <\/p>\n

53<\/sup>Cum autem hæc ad illos diceret, cœperunt pharisæi et legisperiti graviter insistere, et os ejus opprimere de multis,<\/span> <\/p>\n

54<\/sup>insidiantes ei, et quærentes aliquid capere de ore ejus, ut accusarent eum.<\/span> <\/p>\n

‹ Previous<\/a>Next ›<\/a><\/div>\n","page_title":"The Gospel According to Luke, Chapter 11 — Latin Vulgate","book_title":"The Gospel According to Luke","toolbar_title":"The Gospel According to Luke — Ch. 11","prev_url":"\/vulgate\/2\/3\/10","next_url":"\/vulgate\/2\/3\/12","tid":2,"book_id":3,"chapter":11,"num_chapters":24,"trans":"Vulgate","is_rtl":false,"strongs_data":{},"bsb_glosses":{},"book_name":"Luke","canonical_url":"https:\/\/accept.gift\/vulgate\/2\/3\/11","meta_desc":"Et factum est: cum esset in quodam loco orans, ut cessavit, dixit unus ex discipulis ejus ad eum: Domine, doce nos orare, sicut docuit et Joannes discipulos…"}