{"reader_html":"

The Gospel According to LukeChapter 18<\/span><\/h1>\n

1<\/sup>Dicebat autem et parabolam ad illos, quoniam oportet semper orare et non deficere,<\/span> <\/p>\n

2<\/sup>dicens: Judex quidam erat in quadam civitate, qui Deum non timebat, et hominem non reverebatur.<\/span> <\/p>\n

3<\/sup>Vidua autem quædam erat in civitate illa, et veniebat ad eum, dicens: Vindica me de adversario meo.<\/span> <\/p>\n

4<\/sup>Et nolebat per multum tempus. Post hæc autem dixit intra se: Etsi Deum non timeo, nec hominem revereor:<\/span> <\/p>\n

5<\/sup>tamen quia molesta est mihi hæc vidua, vindicabo illam, ne in novissimo veniens sugillet me.<\/span> <\/p>\n

6<\/sup>Ait autem Dominus: Audite quid judex iniquitatis dicit:<\/span> <\/p>\n

7<\/sup>Deus autem non faciet vindictam electorum suorum clamantium ad se die ac nocte, et patientiam habebit in illis?<\/span> <\/p>\n

8<\/sup>Dico vobis quia cito faciet vindictam illorum. Verumtamen Filius hominis veniens, putas, inveniet fidem in terra?<\/span> <\/p>\n

9<\/sup>Dixit autem et ad quosdam qui in se confidebant tamquam justi, et aspernabantur ceteros, parabolam istam:<\/span> <\/p>\n

10<\/sup>Duo homines ascenderunt in templum ut orarent: unus pharisæus et alter publicanus.<\/span> <\/p>\n

11<\/sup>Pharisæus stans, hæc apud se orabat: Deus, gratias ago tibi, quia non sum sicut ceteri hominum: raptores, injusti, adulteri, velut etiam hic publicanus:<\/span> <\/p>\n

12<\/sup>jejuno bis in sabbato, decimas do omnium quæ possideo.<\/span> <\/p>\n

13<\/sup>Et publicanus a longe stans, nolebat nec oculos ad cælum levare: sed percutiebat pectus suum, dicens: Deus propitius esto mihi peccatori.<\/span> <\/p>\n

14<\/sup>Dico vobis, descendit hic justificatus in domum suam ab illo: quia omnis qui se exaltat, humiliabitur, et qui se humiliat, exaltabitur.<\/span> <\/p>\n

15<\/sup>Afferebant autem ad illum et infantes, ut eos tangeret. Quod cum viderent discipuli, increpabant illos.<\/span> <\/p>\n

16<\/sup>Jesus autem convocans illos, dixit: Sinite pueros venire ad me, et nolite vetare eos: talium est enim regnum Dei.<\/span> <\/p>\n

17<\/sup>Amen dico vobis, quicumque non acceperit regnum Dei sicut puer, non intrabit in illud.<\/span> <\/p>\n

18<\/sup>Et interrogavit eum quidam princeps, dicens: Magister bone, quid faciens vitam æternam possidebo?<\/span> <\/p>\n

19<\/sup>Dixit autem ei Jesus: Quid me dicis bonum? nemo bonus nisi solus Deus.<\/span> <\/p>\n

20<\/sup>Mandata nosti: non occides; non mœchaberis; non furtum facies; non falsum testimonium dices; honora patrem tuum et matrem.<\/span> <\/p>\n

21<\/sup>Qui ait: Hæc omnia custodivi a juventute mea.<\/span> <\/p>\n

22<\/sup>Quo audito, Jesus ait ei: Adhuc unum tibi deest: omnia quæcumque habes vende, et da pauperibus, et habebis thesaurum in cælo: et veni, sequere me.<\/span> <\/p>\n

23<\/sup>His ille auditis, contristatus est: quia dives erat valde.<\/span> <\/p>\n

24<\/sup>Videns autem Jesus illum tristem factum, dixit: Quam difficile, qui pecunias habent, in regnum Dei intrabunt!<\/span> <\/p>\n

25<\/sup>facilius est enim camelum per foramen acus transire quam divitem intrare in regnum Dei.<\/span> <\/p>\n

26<\/sup>Et dixerunt qui audiebant: Et quis potest salvus fieri?<\/span> <\/p>\n

27<\/sup>Ait illis: Quæ impossibilia sunt apud homines, possibilia sunt apud Deum.<\/span> <\/p>\n

28<\/sup>Ait autem Petrus: Ecce nos dimisimus omnia et secuti sumus te.<\/span> <\/p>\n

29<\/sup>Qui dixit eis: Amen dico vobis, nemo est qui reliquit domum, aut parentes, aut fratres, aut uxorem, aut filios propter regnum Dei,<\/span> <\/p>\n

30<\/sup>et non recipiat multo plura in hoc tempore, et in sæculo venturo vitam æternam.<\/span> <\/p>\n

31<\/sup>Assumpsit autem Jesus duodecim, et ait illis: Ecce ascendimus Jerosolymam, et consummabuntur omnia quæ scripta sunt per prophetas de Filio hominis:<\/span> <\/p>\n

32<\/sup>tradetur enim gentibus, et illudetur, et flagellabitur, et conspuetur:<\/span> <\/p>\n

33<\/sup>et postquam flagellaverint, occident eum, et tertia die resurget.<\/span> <\/p>\n

34<\/sup>Et ipsi nihil horum intellexerunt, et erat verbum istud absconditum ab eis, et non intelligebant quæ dicebantur.<\/span> <\/p>\n

35<\/sup>Factum est autem, cum appropinquaret Jericho, cæcus quidam sedebat secus viam, mendicans.<\/span> <\/p>\n

36<\/sup>Et cum audiret turbam prætereuntem, interrogabat quid hoc esset.<\/span> <\/p>\n

37<\/sup>Dixerunt autem ei quod Jesus Nazarenus transiret.<\/span> <\/p>\n

38<\/sup>Et clamavit, dicens: Jesu, fili David, miserere mei.<\/span> <\/p>\n

39<\/sup>Et qui præibant, increpabant eum ut taceret. Ipse vero multo magis clamabat: Fili David, miserere mei.<\/span> <\/p>\n

40<\/sup>Stans autem Jesus jussit illum adduci ad se. Et cum appropinquasset, interrogavit illum,<\/span> <\/p>\n

41<\/sup>dicens: Quid tibi vis faciam? At ille dixit: Domine, ut videam.<\/span> <\/p>\n

42<\/sup>Et Jesus dixit illi: Respice, fides tua te salvum fecit.<\/span> <\/p>\n

43<\/sup>Et confestim vidit, et sequebatur illum magnificans Deum. Et omnis plebs ut vidit, dedit laudem Deo.<\/span> <\/p>\n

‹ Previous<\/a>Next ›<\/a><\/div>\n","page_title":"The Gospel According to Luke, Chapter 18 — Latin Vulgate","book_title":"The Gospel According to Luke","toolbar_title":"The Gospel According to Luke — Ch. 18","prev_url":"\/vulgate\/2\/3\/17","next_url":"\/vulgate\/2\/3\/19","tid":2,"book_id":3,"chapter":18,"num_chapters":24,"trans":"Vulgate","is_rtl":false,"strongs_data":{},"bsb_glosses":{},"book_name":"Luke","canonical_url":"https:\/\/accept.gift\/vulgate\/2\/3\/18","meta_desc":"Dicebat autem et parabolam ad illos, quoniam oportet semper orare et non deficere, dicens: Judex quidam erat in quadam civitate, qui Deum non timebat, et hom…"}