{"reader_html":"

The Gospel According to LukeChapter 7<\/span><\/h1>\n

1<\/sup>Cum autem implesset omnia verba sua in aures plebis, intravit Capharnaum.<\/span> <\/p>\n

2<\/sup>Centurionis autem cujusdam servus male habens, erat moriturus: qui illi erat pretiosus.<\/span> <\/p>\n

3<\/sup>Et cum audisset de Jesu, misit ad eum seniores Judæorum, rogans eum ut veniret et salvaret servum ejus.<\/span> <\/p>\n

4<\/sup>At illi cum venissent ad Jesum, rogabant eum sollicite, dicentes ei: Quia dignus est ut hoc illi præstes:<\/span> <\/p>\n

5<\/sup>diligit enim gentem nostram, et synagogam ipse ædificavit nobis.<\/span> <\/p>\n

6<\/sup>Jesus autem ibat cum illis. Et cum jam non longe esset a domo, misit ad eum centurio amicos, dicens: Domine, noli vexari: non enim sum dignus ut sub tectum meum intres:<\/span> <\/p>\n

7<\/sup>propter quod et meipsum non sum dignum arbitratus ut venirem ad te: sed dic verbo, et sanabitur puer meus.<\/span> <\/p>\n

8<\/sup>Nam et ego homo sum sub potestate constitutus, habens sub me milites: et dico huic, Vade, et vadit: et alii, Veni, et venit: et servo meo, Fac hoc, et facit.<\/span> <\/p>\n

9<\/sup>Quo audito Jesus miratus est: et conversus sequentibus se turbis, dixit: Amen dico vobis, nec in Israël tantam fidem inveni.<\/span> <\/p>\n

10<\/sup>Et reversi, qui missi fuerant, domum, invenerunt servum, qui languerat, sanum.<\/span> <\/p>\n

11<\/sup>Et factum est: deinceps ibat in civitatem quæ vocatur Naim: et ibant cum eo discipuli ejus et turba copiosa.<\/span> <\/p>\n

12<\/sup>Cum autem appropinquaret portæ civitatis, ecce defunctus efferebatur filius unicus matris suæ: et hæc vidua erat: et turba civitatis multa cum illa.<\/span> <\/p>\n

13<\/sup>Quam cum vidisset Dominus, misericordia motus super eam, dixit illi: Noli flere.<\/span> <\/p>\n

14<\/sup>Et accessit, et tetigit loculum. (Hi autem qui portabant, steterunt.) Et ait: Adolescens, tibi dico, surge.<\/span> <\/p>\n

15<\/sup>Et resedit qui erat mortuus, et cœpit loqui. Et dedit illum matri suæ.<\/span> <\/p>\n

16<\/sup>Accepit autem omnes timor: et magnificabant Deum, dicentes: Quia propheta magnus surrexit in nobis: et quia Deus visitavit plebem suam.<\/span> <\/p>\n

17<\/sup>Et exiit hic sermo in universam Judæam de eo, et in omnem circa regionem.<\/span> <\/p>\n

18<\/sup>Et nuntiaverunt Joanni discipuli ejus de omnibus his.<\/span> <\/p>\n

19<\/sup>Et convocavit duos de discipulis suis Joannes, et misit ad Jesum, dicens: Tu es qui venturus es, an alium exspectamus?<\/span> <\/p>\n

20<\/sup>Cum autem venissent ad eum viri, dixerunt: Joannes Baptista misit nos ad te dicens: Tu es qui venturus es, an alium exspectamus?<\/span> <\/p>\n

21<\/sup>(In ipsa autem hora multos curavit a languoribus, et plagis, et spiritibus malis, et cæcis multis donavit visum.)<\/span> <\/p>\n

22<\/sup>Et respondens, dixit illis: Euntes renuntiate Joanni quæ audistis et vidistis: quia cæci vident, claudi ambulant, leprosi mundantur, surdi audiunt, mortui resurgunt, pauperes evangelizantur:<\/span> <\/p>\n

23<\/sup>et beatus est quicumque non fuerit scandalizatus in me.<\/span> <\/p>\n

24<\/sup>Et cum discessissent nuntii Joannis, cœpit de Joanne dicere ad turbas: Quid existis in desertum videre? arundinem vento agitatam?<\/span> <\/p>\n

25<\/sup>Sed quid existis videre? hominem mollibus vestibus indutum? Ecce qui in veste pretiosa sunt et deliciis, in domibus regum sunt.<\/span> <\/p>\n

26<\/sup>Sed quid existis videre? prophetam? Utique dico vobis, et plus quam prophetam:<\/span> <\/p>\n

27<\/sup>hic est, de quo scriptum est: Ecce mitto angelum meum ante faciem tuam, qui præparabit viam tuam ante te.<\/span> <\/p>\n

28<\/sup>Dico enim vobis: major inter natos mulierum propheta Joanne Baptista nemo est: qui autem minor est in regno Dei, major est illo.<\/span> <\/p>\n

29<\/sup>Et omnis populus audiens et publicani, justificaverunt Deum, baptizati baptismo Joannis.<\/span> <\/p>\n

30<\/sup>Pharisæi autem et legisperiti consilium Dei spreverunt in semetipsos, non baptizati ab eo.<\/span> <\/p>\n

31<\/sup>Ait autem Dominus: Cui ergo similes dicam homines generationis hujus? et cui similes sunt?<\/span> <\/p>\n

32<\/sup>Similes sunt pueris sedentibus in foro, et loquentibus ad invicem, et dicentibus: Cantavimus vobis tibiis, et non saltastis: lamentavimus, et non plorastis.<\/span> <\/p>\n

33<\/sup>Venit enim Joannes Baptista, neque manducans panem, neque bibens vinum, et dicitis: Dæmonium habet.<\/span> <\/p>\n

34<\/sup>Venit Filius hominis manducans, et bibens, et dicitis: Ecce homo devorator, et bibens vinum, amicus publicanorum et peccatorum.<\/span> <\/p>\n

35<\/sup>Et justificata est sapientia ab omnibus filiis suis.<\/span> <\/p>\n

36<\/sup>Rogabat autem illum quidam de pharisæis ut manducaret cum illo. Et ingressus domum pharisæi discubuit.<\/span> <\/p>\n

37<\/sup>Et ecce mulier, quæ erat in civitate peccatrix, ut cognovit quod accubuisset in domo pharisæi, attulit alabastrum unguenti:<\/span> <\/p>\n

38<\/sup>et stans retro secus pedes ejus, lacrimis cœpit rigare pedes ejus, et capillis capitis sui tergebat, et osculabatur pedes ejus, et unguento ungebat.<\/span> <\/p>\n

39<\/sup>Videns autem pharisæus, qui vocaverat eum, ait intra se dicens: Hic si esset propheta, sciret utique quæ et qualis est mulier, quæ tangit eum: quia peccatrix est.<\/span> <\/p>\n

40<\/sup>Et respondens Jesus, dixit ad illum: Simon, habeo tibi aliquid dicere. At ille ait: Magister, dic.<\/span> <\/p>\n

41<\/sup>Duo debitores erant cuidam fœneratori: unus debebat denarios quingentos, et alius quinquaginta.<\/span> <\/p>\n

42<\/sup>Non habentibus illis unde redderent, donavit utrisque. Quis ergo eum plus diligit?<\/span> <\/p>\n

43<\/sup>Respondens Simon dixit: Æstimo quia is cui plus donavit. At ille dixit: Recte judicasti.<\/span> <\/p>\n

44<\/sup>Et conversus ad mulierem, dixit Simoni: Vides hanc mulierem? Intravi in domum tuam, aquam pedibus meis non dedisti: hæc autem lacrimis rigavit pedes meos, et capillis suis tersit.<\/span> <\/p>\n

45<\/sup>Osculum mihi non dedisti: hæc autem ex quo intravit, non cessavit osculari pedes meos.<\/span> <\/p>\n

46<\/sup>Oleo caput meum non unxisti: hæc autem unguento unxit pedes meos.<\/span> <\/p>\n

47<\/sup>Propter quod dico tibi: remittuntur ei peccata multa, quoniam dilexit multum. Cui autem minus dimittitur, minus diligit.<\/span> <\/p>\n

48<\/sup>Dixit autem ad illam: Remittuntur tibi peccata.<\/span> <\/p>\n

49<\/sup>Et cœperunt qui simul accumbebant, dicere intra se: Quis est hic qui etiam peccata dimittit?<\/span> <\/p>\n

50<\/sup>Dixit autem ad mulierem: Fides tua te salvam fecit: vade in pace.<\/span> <\/p>\n

‹ Previous<\/a>Next ›<\/a><\/div>\n","page_title":"The Gospel According to Luke, Chapter 7 — Latin Vulgate","book_title":"The Gospel According to Luke","toolbar_title":"The Gospel According to Luke — Ch. 7","prev_url":"\/vulgate\/2\/3\/6","next_url":"\/vulgate\/2\/3\/8","tid":2,"book_id":3,"chapter":7,"num_chapters":24,"trans":"Vulgate","is_rtl":false,"strongs_data":{},"bsb_glosses":{},"book_name":"Luke","canonical_url":"https:\/\/accept.gift\/vulgate\/2\/3\/7","meta_desc":"Cum autem implesset omnia verba sua in aures plebis, intravit Capharnaum. Centurionis autem cujusdam servus male habens, erat moriturus: qui illi erat pretio…"}