{"reader_html":"

The Gospel According to JohnChapter 11<\/span><\/h1>\n

1<\/sup>Erat autem quidam languens Lazarus a Bethania, de castello Mariæ et Marthæ sororis ejus.<\/span> <\/p>\n

2<\/sup>(Maria autem erat quæ unxit Dominum unguento, et extersit pedes ejus capillis suis: cujus frater Lazarus infirmabatur.)<\/span> <\/p>\n

3<\/sup>Miserunt ergo sorores ejus ad eum dicentes: Domine, ecce quem amas infirmatur.<\/span> <\/p>\n

4<\/sup>Audiens autem Jesus dixit eis: Infirmitas hæc non est ad mortem, sed pro gloria Dei, ut glorificetur Filius Dei per eam.<\/span> <\/p>\n

5<\/sup>Diligebat autem Jesus Martham, et sororem ejus Mariam, et Lazarum.<\/span> <\/p>\n

6<\/sup>Ut ergo audivit quia infirmabatur, tunc quidem mansit in eodem loco duobus diebus;<\/span> <\/p>\n

7<\/sup>deinde post hæc dixit discipulis suis: Eamus in Judæam iterum.<\/span> <\/p>\n

8<\/sup>Dicunt ei discipuli: Rabbi, nunc quærebant te Judæi lapidare, et iterum vadis illuc?<\/span> <\/p>\n

9<\/sup>Respondit Jesus: Nonne duodecim sunt horæ diei? Si quis ambulaverit in die, non offendit, quia lucem hujus mundi videt:<\/span> <\/p>\n

10<\/sup>si autem ambulaverit in nocte, offendit, quia lux non est in eo.<\/span> <\/p>\n

11<\/sup>Hæc ait, et post hæc dixit eis: Lazarus amicus noster dormit: sed vado ut a somno excitem eum.<\/span> <\/p>\n

12<\/sup>Dixerunt ergo discipuli ejus: Domine, si dormit, salvus erit.<\/span> <\/p>\n

13<\/sup>Dixerat autem Jesus de morte ejus: illi autem putaverunt quia de dormitione somni diceret.<\/span> <\/p>\n

14<\/sup>Tunc ergo Jesus dixit eis manifeste: Lazarus mortuus est:<\/span> <\/p>\n

15<\/sup>et gaudeo propter vos, ut credatis, quoniam non eram ibi, sed eamus ad eum.<\/span> <\/p>\n

16<\/sup>Dixit ergo Thomas, qui dicitur Didymus, ad condiscipulos: Eamus et nos, ut moriamur cum eo.<\/span> <\/p>\n

17<\/sup>Venit itaque Jesus: et invenit eum quatuor dies jam in monumento habentem.<\/span> <\/p>\n

18<\/sup>(Erat autem Bethania juxta Jerosolymam quasi stadiis quindecim.)<\/span> <\/p>\n

19<\/sup>Multi autem ex Judæis venerant ad Martham et Mariam, ut consolarentur eas de fratre suo.<\/span> <\/p>\n

20<\/sup>Martha ergo ut audivit quia Jesus venit, occurrit illi: Maria autem domi sedebat.<\/span> <\/p>\n

21<\/sup>Dixit ergo Martha ad Jesum: Domine, si fuisses hic, frater meus non fuisset mortuus:<\/span> <\/p>\n

22<\/sup>sed et nunc scio quia quæcumque poposceris a Deo, dabit tibi Deus.<\/span> <\/p>\n

23<\/sup>Dicit illi Jesus: Resurget frater tuus.<\/span> <\/p>\n

24<\/sup>Dicit ei Martha: Scio quia resurget in resurrectione in novissimo die.<\/span> <\/p>\n

25<\/sup>Dixit ei Jesus: Ego sum resurrectio et vita: qui credit in me, etiam si mortuus fuerit, vivet:<\/span> <\/p>\n

26<\/sup>et omnis qui vivit et credit in me, non morietur in æternum. Credis hoc?<\/span> <\/p>\n

27<\/sup>Ait illi: Utique Domine, ego credidi quia tu es Christus, Filius Dei vivi, qui in hunc mundum venisti.<\/span> <\/p>\n

28<\/sup>Et cum hæc dixisset, abiit, et vocavit Mariam sororem suam silentio, dicens: Magister adest, et vocat te.<\/span> <\/p>\n

29<\/sup>Illa ut audivit, surgit cito, et venit ad eum;<\/span> <\/p>\n

30<\/sup>nondum enim venerat Jesus in castellum: sed erat adhuc in illo loco, ubi occurrerat ei Martha.<\/span> <\/p>\n

31<\/sup>Judæi ergo, qui erant cum ea in domo, et consolabantur eam, cum vidissent Mariam quia cito surrexit, et exiit, secuti sunt eam dicentes: Quia vadit ad monumentum, ut ploret ibi.<\/span> <\/p>\n

32<\/sup>Maria ergo, cum venisset ubi erat Jesus, videns eum, cecidit ad pedes ejus, et dicit ei: Domine, si fuisses hic, non esset mortuus frater meus.<\/span> <\/p>\n

33<\/sup>Jesus ergo, ut vidit eam plorantem, et Judæos, qui venerant cum ea, plorantes, infremuit spiritu, et turbavit seipsum,<\/span> <\/p>\n

34<\/sup>et dixit: Ubi posuistis eum? Dicunt ei: Domine, veni, et vide.<\/span> <\/p>\n

35<\/sup>Et lacrimatus est Jesus.<\/span> <\/p>\n

36<\/sup>Dixerunt ergo Judæi: Ecce quomodo amabat eum.<\/span> <\/p>\n

37<\/sup>Quidam autem ex ipsis dixerunt: Non poterat hic, qui aperuit oculos cæci nati, facere ut hic non moreretur?<\/span> <\/p>\n

38<\/sup>Jesus ergo rursum fremens in semetipso, venit ad monumentum. Erat autem spelunca, et lapis superpositus erat ei.<\/span> <\/p>\n

39<\/sup>Ait Jesus: Tollite lapidem. Dicit ei Martha, soror ejus qui mortuus fuerat: Domine, jam fœtet, quatriduanus est enim.<\/span> <\/p>\n

40<\/sup>Dicit ei Jesus: Nonne dixi tibi quoniam si credideris, videbis gloriam Dei?<\/span> <\/p>\n

41<\/sup>Tulerunt ergo lapidem: Jesus autem, elevatis sursum oculis, dixit: Pater, gratias ago tibi quoniam audisti me.<\/span> <\/p>\n

42<\/sup>Ego autem sciebam quia semper me audis, sed propter populum qui circumstat, dixi: ut credant quia tu me misisti.<\/span> <\/p>\n

43<\/sup>Hæc cum dixisset, voce magna clamavit: Lazare, veni foras.<\/span> <\/p>\n

44<\/sup>Et statim prodiit qui fuerat mortuus, ligatus pedes, et manus institis, et facies illius sudario erat ligata. Dixit eis Jesus: Solvite eum et sinite abire.<\/span> <\/p>\n

45<\/sup>Multi ergo ex Judæis, qui venerant ad Mariam, et Martham, et viderant quæ fecit Jesus, crediderunt in eum.<\/span> <\/p>\n

46<\/sup>Quidam autem ex ipsis abierunt ad pharisæos, et dixerunt eis quæ fecit Jesus.<\/span> <\/p>\n

47<\/sup>Collegerunt ergo pontifices et pharisæi concilium, et dicebant: Quid faciamus, quia hic homo multa signa facit?<\/span> <\/p>\n

48<\/sup>Si dimittimus eum sic, omnes credent in eum, et venient Romani, et tollent nostrum locum, et gentem.<\/span> <\/p>\n

49<\/sup>Unus autem ex ipsis, Caiphas nomine, cum esset pontifex anni illius, dixit eis: Vos nescitis quidquam,<\/span> <\/p>\n

50<\/sup>nec cogitatis quia expedit vobis ut unus moriatur homo pro populo, et non tota gens pereat.<\/span> <\/p>\n

51<\/sup>Hoc autem a semetipso non dixit: sed cum esset pontifex anni illius, prophetavit, quod Jesus moriturus erat pro gente,<\/span> <\/p>\n

52<\/sup>et non tantum pro gente, sed ut filios Dei, qui erant dispersi, congregaret in unum.<\/span> <\/p>\n

53<\/sup>Ab illo ergo die cogitaverunt ut interficerent eum.<\/span> <\/p>\n

54<\/sup>Jesus ergo jam non in palam ambulabat apud Judæos, sed abiit in regionem juxta desertum, in civitatem quæ dicitur Ephrem, et ibi morabatur cum discipulis suis.<\/span> <\/p>\n

55<\/sup>Proximum autem erat Pascha Judæorum, et ascenderunt multi Jerosolymam de regione ante Pascha, ut sanctificarent seipsos.<\/span> <\/p>\n

56<\/sup>Quærebant ergo Jesum, et colloquebantur ad invicem, in templo stantes: Quid putatis, quia non venit ad diem festum?<\/span> <\/p>\n

57<\/sup>Dederant autem pontifices et pharisæi mandatum ut si quis cognoverit ubi sit, indicet, ut apprehendant eum.<\/span> <\/p>\n

‹ Previous<\/a>Next ›<\/a><\/div>\n","page_title":"The Gospel According to John, Chapter 11 — Latin Vulgate","book_title":"The Gospel According to John","toolbar_title":"The Gospel According to John — Ch. 11","prev_url":"\/vulgate\/2\/4\/10","next_url":"\/vulgate\/2\/4\/12","tid":2,"book_id":4,"chapter":11,"num_chapters":21,"trans":"Vulgate","is_rtl":false,"strongs_data":{},"bsb_glosses":{},"book_name":"John","canonical_url":"https:\/\/accept.gift\/vulgate\/2\/4\/11","meta_desc":"Erat autem quidam languens Lazarus a Bethania, de castello Mariæ et Marthæ sororis ejus. (Maria autem erat quæ unxit Dominum unguento, et extersit pedes ejus…"}