{"reader_html":"

The Acts of the ApostlesChapter 13<\/span><\/h1>\n

1<\/sup>Erant autem in ecclesia quæ erat Antiochiæ, prophetæ et doctores, in quibus Barnabas, et Simon qui vocabatur Niger, et Lucius Cyrenensis, et Manahen, qui erat Herodis Tetrarchæ collactaneus, et Saulus.<\/span> <\/p>\n

2<\/sup>Ministrantibus autem illis Domino, et jejunantibus, dixit illis Spiritus Sanctus: Segregate mihi Saulum et Barnabam in opus ad quod assumpsi eos.<\/span> <\/p>\n

3<\/sup>Tunc jejunantes et orantes, imponentesque eis manus, dimiserunt illos.<\/span> <\/p>\n

4<\/sup>Et ipsi quidem missi a Spiritu Sancto abierunt Seleuciam: et inde navigaverunt Cyprum.<\/span> <\/p>\n

5<\/sup>Et cum venissent Salaminam, prædicabant verbum Dei in synagogis Judæorum. Habebant autem et Joannem in ministerio.<\/span> <\/p>\n

6<\/sup>Et cum perambulassent universam insulam usque Paphum, invenerunt quemdam virum magum pseudoprophetam, Judæum, cui nomen erat Barjesu,<\/span> <\/p>\n

7<\/sup>qui erat cum proconsule Sergio Paulo viro prudente. Hic, accersitis Barnaba et Saulo, desiderabat audire verbum Dei.<\/span> <\/p>\n

8<\/sup>Resistebat autem illis Elymas magus (sic enim interpretatur nomen ejus), quærens avertere proconsulem a fide.<\/span> <\/p>\n

9<\/sup>Saulus autem, qui et Paulus, repletus Spiritu Sancto, intuens in eum,<\/span> <\/p>\n

10<\/sup>dixit: O plene omni dolo et omni fallacia, fili diaboli, inimice omnis justitiæ, non desinis subvertere vias Domini rectas.<\/span> <\/p>\n

11<\/sup>Et nunc ecce manus Domini super te, et eris cæcus, non videns solem usque ad tempus. Et confestim cecidit in eum caligo et tenebræ: et circuiens quærebat qui ei manum daret.<\/span> <\/p>\n

12<\/sup>Tunc proconsul cum vidisset factum, credidit admirans super doctrina Domini.<\/span> <\/p>\n

13<\/sup>Et cum a Papho navigassent Paulus et qui cum eo erant, venerunt Pergen Pamphyliæ. Joannes autem discedens ab eis, reversus est Jerosolymam.<\/span> <\/p>\n

14<\/sup>Illi vero pertranseuntes Pergen, venerunt Antiochiam Pisidiæ: et ingressi synagogam die sabbatorum, sederunt.<\/span> <\/p>\n

15<\/sup>Post lectionem autem legis et prophetarum, miserunt principes synagogæ ad eos, dicentes: Viri fratres, si quis est in vobis sermo exhortationis ad plebem, dicite.<\/span> <\/p>\n

16<\/sup>Surgens autem Paulus, et manu silentium indicens, ait: Viri Israëlitæ, et qui timetis Deum, audite:<\/span> <\/p>\n

17<\/sup>Deus plebis Israël elegit patres nostros, et plebem exaltavit cum essent incolæ in terra Ægypti, et in brachio excelso eduxit eos ex ea,<\/span> <\/p>\n

18<\/sup>et per quadraginta annorum tempus mores eorum sustinuit in deserto.<\/span> <\/p>\n

19<\/sup>Et destruens gentes septem in terra Chanaan, sorte distribuit eis terram eorum,<\/span> <\/p>\n

20<\/sup>quasi post quadringentos et quinquaginta annos: et post hæc dedit judices, usque ad Samuel prophetam.<\/span> <\/p>\n

21<\/sup>Et exinde postulaverunt regem: et dedit illis Deus Saul filium Cis, virum de tribu Benjamin, annis quadraginta:<\/span> <\/p>\n

22<\/sup>et amoto illo, suscitavit illis David regem: cui testimonium perhibens, dixit: Inveni David filium Jesse, virum secundum cor meum, qui faciet omnes voluntates meas.<\/span> <\/p>\n

23<\/sup>Hujus Deus ex semine secundum promissionem eduxit Israël salvatorem Jesum,<\/span> <\/p>\n

24<\/sup>prædicante Joanne ante faciem adventus ejus baptismum pœnitentiæ omni populo Israël.<\/span> <\/p>\n

25<\/sup>Cum impleret autem Joannes cursum suum, dicebat: Quem me arbitramini esse, non sum ego: sed ecce venit post me, cujus non sum dignus calceamenta pedum solvere.<\/span> <\/p>\n

26<\/sup>Viri fratres, filii generis Abraham, et qui in vobis timent Deum, vobis verbum salutis hujus missum est.<\/span> <\/p>\n

27<\/sup>Qui enim habitabant Jerusalem, et principes ejus hunc ignorantes, et voces prophetarum quæ per omne sabbatum leguntur, judicantes impleverunt,<\/span> <\/p>\n

28<\/sup>et nullam causam mortis invenientes in eo, petierunt a Pilato ut interficerent eum.<\/span> <\/p>\n

29<\/sup>Cumque consummassent omnia quæ de eo scripta erant, deponentes eum de ligno, posuerunt eum in monumento.<\/span> <\/p>\n

30<\/sup>Deus vero suscitavit eum a mortuis tertia die: qui visus est per dies multos his<\/span> <\/p>\n

31<\/sup>qui simul ascenderant cum eo de Galilæa in Jerusalem: qui usque nunc sunt testes ejus ad plebem.<\/span> <\/p>\n

32<\/sup>Et nos vobis annuntiamus eam, quæ ad patres nostros repromissio facta est:<\/span> <\/p>\n

33<\/sup>quoniam hanc Deus adimplevit filiis nostris resuscitans Jesum, sicut et in psalmo secundo scriptum est: Filius meus es tu, ego hodie genui te.<\/span> <\/p>\n

34<\/sup>Quod autem suscitavit eum a mortuis, amplius jam non reversurum in corruptionem, ita dixit: Quia dabo vobis sancta David fidelia.<\/span> <\/p>\n

35<\/sup>Ideoque et alias dicit: Non dabis sanctum tuum videre corruptionem.<\/span> <\/p>\n

36<\/sup>David enim in sua generatione cum administrasset, voluntati Dei dormivit: et appositus est ad patres suos, et vidit corruptionem.<\/span> <\/p>\n

37<\/sup>Quem vero Deus suscitavit a mortuis, non vidit corruptionem.<\/span> <\/p>\n

38<\/sup>Notum igitur sit vobis, viri fratres, quia per hunc vobis remissio peccatorum annuntiatur, et ab omnibus quibus non potuistis in lege Moysi justificari,<\/span> <\/p>\n

39<\/sup>in hoc omnis qui credit, justificatur.<\/span> <\/p>\n

40<\/sup>Videte ergo ne superveniat vobis quod dictum est in prophetis:<\/span> <\/p>\n

41<\/sup>Videte contemptores, et admiramini, et disperdimini: quia opus operor ego in diebus vestris, opus quod non credetis, si quis enarraverit vobis.<\/span> <\/p>\n

42<\/sup>Exeuntibus autem illis rogabant ut sequenti sabbato loquerentur sibi verba hæc.<\/span> <\/p>\n

43<\/sup>Cumque dimissa esset synagoga, secuti sunt multi Judæorum, et colentium advenarum, Paulum et Barnabam: qui loquentes suadebant eis ut permanerent in gratia Dei.<\/span> <\/p>\n

44<\/sup>Sequenti vero sabbato pene universa civitas convenit audire verbum Dei.<\/span> <\/p>\n

45<\/sup>Videntes autem turbas Judæi, repleti sunt zelo, et contradicebant his quæ a Paulo dicebantur, blasphemantes.<\/span> <\/p>\n

46<\/sup>Tunc constanter Paulus et Barnabas dixerunt: Vobis oportebat primum loqui verbum Dei: sed quoniam repellitis illud, et indignos vos judicatis æternæ vitæ, ecce convertimur ad gentes.<\/span> <\/p>\n

47<\/sup>Sic enim præcepit nobis Dominus: Posui te in lucem gentium, ut sis in salutem usque ad extremum terræ.<\/span> <\/p>\n

48<\/sup>Audientes autem gentes, gavisæ sunt, et glorificabant verbum Domini: et crediderunt quotquot erant præordinati ad vitam æternam.<\/span> <\/p>\n

49<\/sup>Disseminabatur autem verbum Domini per universam regionem.<\/span> <\/p>\n

50<\/sup>Judæi autem concitaverunt mulieres religiosas et honestas, et primos civitatis, et excitaverunt persecutionem in Paulum et Barnabam: et ejecerunt eos de finibus suis.<\/span> <\/p>\n

51<\/sup>At illi excusso pulvere pedum in eos, venerunt Iconium.<\/span> <\/p>\n

52<\/sup>Discipuli quoque replebantur gaudio, et Spiritu Sancto.<\/span> <\/p>\n

‹ Previous<\/a>Next ›<\/a><\/div>\n","page_title":"The Acts of the Apostles, Chapter 13 — Latin Vulgate","book_title":"The Acts of the Apostles","toolbar_title":"The Acts of the Apostles — Ch. 13","prev_url":"\/vulgate\/2\/5\/12","next_url":"\/vulgate\/2\/5\/14","tid":2,"book_id":5,"chapter":13,"num_chapters":28,"trans":"Vulgate","is_rtl":false,"strongs_data":{},"bsb_glosses":{},"book_name":"Acts","canonical_url":"https:\/\/accept.gift\/vulgate\/2\/5\/13","meta_desc":"Erant autem in ecclesia quæ erat Antiochiæ, prophetæ et doctores, in quibus Barnabas, et Simon qui vocabatur Niger, et Lucius Cyrenensis, et Manahen, qui era…"}