{"reader_html":"

The Acts of the ApostlesChapter 15<\/span><\/h1>\n

1<\/sup>Et quidam descendentes de Judæa docebant fratres: Quia nisi circumcidamini secundum morem Moysi, non potestis salvari.<\/span> <\/p>\n

2<\/sup>Facta ergo seditione non minima Paulo et Barnabæ adversus illos, statuerunt ut ascenderent Paulus et Barnabas, et quidam alii ex aliis ad Apostolos et presbyteros in Jerusalem super hac quæstione.<\/span> <\/p>\n

3<\/sup>Illi ergo deducti ab ecclesia pertransibant Phœnicen et Samariam, narrantes conversionem gentium: et faciebant gaudium magnum omnibus fratribus.<\/span> <\/p>\n

4<\/sup>Cum autem venissent Jerosolymam, suscepti sunt ab ecclesia, et ab Apostolis et senioribus, annuntiantes quanta Deus fecisset cum illis.<\/span> <\/p>\n

5<\/sup>Surrexerunt autem quidam de hæresi pharisæorum, qui crediderunt, dicentes quia oportet circumcidi eos, præcipere quoque servare legem Moysi.<\/span> <\/p>\n

6<\/sup>Conveneruntque Apostoli et seniores videre de verbo hoc.<\/span> <\/p>\n

7<\/sup>Cum autem magna conquisitio fieret, surgens Petrus dixit ad eos: Viri fratres, vos scitis quoniam ab antiquis diebus Deus in nobis elegit, per os meum audire gentes verbum Evangelii et credere.<\/span> <\/p>\n

8<\/sup>Et qui novit corda Deus, testimonium perhibuit, dans illis Spiritum Sanctum, sicut et nobis,<\/span> <\/p>\n

9<\/sup>et nihil discrevit inter nos et illos, fide purificans corda eorum.<\/span> <\/p>\n

10<\/sup>Nunc ergo quid tentatis Deum, imponere jugum super cervices discipulorum quod neque patres nostri, neque nos portare potuimus?<\/span> <\/p>\n

11<\/sup>sed per gratiam Domini Jesu Christi credimus salvari, quemadmodum et illi.<\/span> <\/p>\n

12<\/sup>Tacuit autem omnis multitudo: et audiebant Barnabam et Paulum narrantes quanta Deus fecisset signa et prodigia per eos.<\/span> <\/p>\n

13<\/sup>Et postquam tacuerunt, respondit Jacobus, dicens: Viri fratres, audite me.<\/span> <\/p>\n

14<\/sup>Simon narravit quemadmodum primum Deus visitavit sumere ex gentibus populum nomini suo.<\/span> <\/p>\n

15<\/sup>Et huic concordant verba prophetarum: sicut scriptum est:<\/span> <\/p>\n

16<\/sup>Post hæc revertar, et reædificabo tabernaculum David quod decidit: et diruta ejus reædificabo, et erigam illud:<\/span> <\/p>\n

17<\/sup>ut requirant ceteri hominum Dominum, et omnes gentes super quas invocatum est nomen meum, dicit Dominus faciens hæc.<\/span> <\/p>\n

18<\/sup>Notum a sæculo est Domino opus suum.<\/span> <\/p>\n

19<\/sup>Propter quod ego judico non inquietari eos qui ex gentibus convertuntur ad Deum,<\/span> <\/p>\n

20<\/sup>sed scribere ad eos ut abstineant se a contaminationibus simulacrorum, et fornicatione, et suffocatis, et sanguine.<\/span> <\/p>\n

21<\/sup>Moyses enim a temporibus antiquis habet in singulis civitatibus qui eum prædicent in synagogis, ubi per omne sabbatum legitur.<\/span> <\/p>\n

22<\/sup>Tunc placuit Apostolis et senioribus cum omni ecclesia eligere viros ex eis, et mittere Antiochiam cum Paulo et Barnaba: Judam, qui cognominabatur Barsabas, et Silam, viros primos in fratribus:<\/span> <\/p>\n

23<\/sup>scribentes per manus eorum: Apostoli et seniores fratres, his qui sunt Antiochiæ, et Syriæ, et Ciliciæ, fratribus ex gentibus, salutem.<\/span> <\/p>\n

24<\/sup>Quoniam audivimus quia quidam ex nobis exeuntes, turbaverunt vos verbis, evertentes animas vestras, quibus non mandavimus,<\/span> <\/p>\n

25<\/sup>placuit nobis collectis in unum eligere viros, et mittere ad vos cum carissimis nostris Barnaba et Paulo,<\/span> <\/p>\n

26<\/sup>hominibus qui tradiderunt animas suas pro nomine Domini nostri Jesu Christi.<\/span> <\/p>\n

27<\/sup>Misimus ergo Judam et Silam, qui et ipsi vobis verbis referent eadem.<\/span> <\/p>\n

28<\/sup>Visum est enim Spiritui Sancto et nobis nihil ultra imponere vobis oneris quam hæc necessaria:<\/span> <\/p>\n

29<\/sup>ut abstineatis vos ab immolatis simulacrorum, et sanguine, et suffocato, et fornicatione: a quibus custodientes vos, bene agetis. Valete.<\/span> <\/p>\n

30<\/sup>Illi ergo dimissi, descenderunt Antiochiam: et congregata multitudine tradiderunt epistolam.<\/span> <\/p>\n

31<\/sup>Quam cum legissent, gavisi sunt super consolatione.<\/span> <\/p>\n

32<\/sup>Judas autem et Silas, et ipsi cum essent prophetæ, verbo plurimo consolati sunt fratres, et confirmaverunt.<\/span> <\/p>\n

33<\/sup>Facto autem ibi aliquanto tempore, dimissi sunt cum pace a fratribus ad eos qui miserant illos.<\/span> <\/p>\n

34<\/sup>Visum est autem Silæ ibi remanere: Judas autem solus abiit Jerusalem.<\/span> <\/p>\n

35<\/sup>Paulus autem et Barnabas demorabantur Antiochiæ, docentes et evangelizantes cum aliis pluribus verbum Domini.<\/span> <\/p>\n

36<\/sup>Post aliquot autem dies, dixit ad Barnabam Paulus: Revertentes visitemus fratres per universas civitates in quibus prædicavimus verbum Domini, quomodo se habeant.<\/span> <\/p>\n

37<\/sup>Barnabas autem volebat secum assumere et Joannem, qui cognominabatur Marcus.<\/span> <\/p>\n

38<\/sup>Paulus autem rogabat eum (ut qui discessisset ab eis de Pamphylia, et non isset cum eis in opus) non debere recipi.<\/span> <\/p>\n

39<\/sup>Facta est autem dissensio, ita ut discederent ab invicem, et Barnabas quidem, assumpto Marco, navigaret Cyprum.<\/span> <\/p>\n

40<\/sup>Paulus vero, electo Sila, profectus est, traditus gratiæ Dei a fratribus.<\/span> <\/p>\n

41<\/sup>Perambulabat autem Syriam et Ciliciam, confirmans ecclesias: præcipiens custodire præcepta Apostolorum et seniorum.<\/span> <\/p>\n

‹ Previous<\/a>Next ›<\/a><\/div>\n","page_title":"The Acts of the Apostles, Chapter 15 — Latin Vulgate","book_title":"The Acts of the Apostles","toolbar_title":"The Acts of the Apostles — Ch. 15","prev_url":"\/vulgate\/2\/5\/14","next_url":"\/vulgate\/2\/5\/16","tid":2,"book_id":5,"chapter":15,"num_chapters":28,"trans":"Vulgate","is_rtl":false,"strongs_data":{},"bsb_glosses":{},"book_name":"Acts","canonical_url":"https:\/\/accept.gift\/vulgate\/2\/5\/15","meta_desc":"Et quidam descendentes de Judæa docebant fratres: Quia nisi circumcidamini secundum morem Moysi, non potestis salvari. Facta ergo seditione non minima Paulo…"}