{"reader_html":"

The Acts of the ApostlesChapter 8<\/span><\/h1>\n

1<\/sup>Facta est autem in illa die persecutio magna in ecclesia quæ erat Jerosolymis, et omnes dispersi sunt per regiones Judææ et Samariæ præter Apostolos.<\/span> <\/p>\n

2<\/sup>Curaverunt autem Stephanum viri timorati, et fecerunt planctum magnum super eum.<\/span> <\/p>\n

3<\/sup>Saulus autem devastabat ecclesiam per domos intrans, et trahens viros ac mulieres, tradebat in custodiam.<\/span> <\/p>\n

4<\/sup>Igitur qui dispersi erant pertransibant, evangelizantes verbum Dei.<\/span> <\/p>\n

5<\/sup>Philippus autem descendens in civitatem Samariæ, prædicabant illis Christum.<\/span> <\/p>\n

6<\/sup>Intendebant autem turbæ his quæ a Philippo dicebantur, unanimiter audientes, et videntes signa quæ faciebat.<\/span> <\/p>\n

7<\/sup>Multi enim eorum qui habebant spiritus immundos, clamantes voce magna exibant. Multi autem paralytici et claudi curati sunt.<\/span> <\/p>\n

8<\/sup>Factum est ergo gaudium magnum in illa civitate.<\/span> <\/p>\n

9<\/sup>Vir autem quidam nomine Simon, qui ante fuerat in civitate magnus, seducens gentem Samariæ, dicens se esse aliquem magnum:<\/span> <\/p>\n

10<\/sup>cui auscultabant omnes a minimo usque ad maximum, dicentes: Hic est virtus Dei, quæ vocatur magna.<\/span> <\/p>\n

11<\/sup>Attendebant autem eum: propter quod multo tempore magiis suis dementasset eos.<\/span> <\/p>\n

12<\/sup>Cum vero credidissent Philippo evangelizanti de regno Dei, in nomine Jesu Christi baptizabantur viri ac mulieres.<\/span> <\/p>\n

13<\/sup>Tunc Simon et ipse credidit: et cum baptizatus esset, adhærebat Philippo. Videns etiam signa et virtutes maximas fieri, stupens admirabatur.<\/span> <\/p>\n

14<\/sup>Cum autem audissent Apostoli qui erant Jerosolymis, quod recepisset Samaria verbum Dei, miserunt ad eos Petrum et Joannem.<\/span> <\/p>\n

15<\/sup>Qui cum venissent, oraverunt pro ipsis ut acciperent Spiritum Sanctum:<\/span> <\/p>\n

16<\/sup>nondum enim in quemquam illorum venerat, sed baptizati tantum erant in nomine Domini Jesu.<\/span> <\/p>\n

17<\/sup>Tunc imponebant manus super illos, et accipiebant Spiritum Sanctum.<\/span> <\/p>\n

18<\/sup>Cum vidisset autem Simon quia per impositionem manus Apostolorum daretur Spiritus Sanctus, obtulit eis pecuniam,<\/span> <\/p>\n

19<\/sup>dicens: Date et mihi hanc potestatem, ut cuicumque imposuero manus, accipiat Spiritum Sanctum. Petrus autem dixit ad eum:<\/span> <\/p>\n

20<\/sup>Pecunia tua tecum sit in perditionem: quoniam donum Dei existimasti pecunia possideri.<\/span> <\/p>\n

21<\/sup>Non est tibi pars neque sors in sermone isto: cor enim tuum non est rectum coram Deo.<\/span> <\/p>\n

22<\/sup>Pœnitentiam itaque age ab hac nequitia tua: et roga Deum, si forte remittatur tibi hæc cogitatio cordis tui.<\/span> <\/p>\n

23<\/sup>In felle enim amaritudinis, et obligatione iniquitatis, video te esse.<\/span> <\/p>\n

24<\/sup>Respondens autem Simon, dixit: Precamini vos pro me ad Dominum, ut nihil veniat super me horum quæ dixistis.<\/span> <\/p>\n

25<\/sup>Et illi quidem testificati, et locuti verbum Domini, redibant Jerosolymam, et multis regionibus Samaritanorum evangelizabant.<\/span> <\/p>\n

26<\/sup>Angelus autem Domini locutus est ad Philippum, dicens: Surge, et vade contra meridianum, ad viam quæ descendit ab Jerusalem in Gazam: hæc est deserta.<\/span> <\/p>\n

27<\/sup>Et surgens abiit. Et ecce vir Æthiops, eunuchus, potens Candacis reginæ Æthiopum, qui erat super omnes gazas ejus, venerat adorare in Jerusalem:<\/span> <\/p>\n

28<\/sup>et revertebatur sedens super currum suum, legensque Isaiam prophetam.<\/span> <\/p>\n

29<\/sup>Dixit autem Spiritus Philippo: Accede, et adjunge te ad currum istum.<\/span> <\/p>\n

30<\/sup>Accurrens autem Philippus, audivit eum legentem Isaiam prophetam, et dixit: Putasne intelligis quæ legis?<\/span> <\/p>\n

31<\/sup>Qui ait: Et quomodo possum, si non aliquis ostenderit mihi? Rogavitque Philippum ut ascenderet, et sederet secum.<\/span> <\/p>\n

32<\/sup>Locus autem Scripturæ quem legebat, erat hic: Tamquam ovis ad occisionem ductus est: et sicut agnus coram tondente se, sine voce, sic non aperuit os suum.<\/span> <\/p>\n

33<\/sup>In humilitate judicium ejus sublatum est. Generationem ejus quis enarrabit? quoniam tolletur de terra vita ejus.<\/span> <\/p>\n

34<\/sup>Respondens autem eunuchus Philippo, dixit: Obsecro te, de quo propheta dicit hoc? de se, an de alio aliquo?<\/span> <\/p>\n

35<\/sup>Aperiens autem Philippus os suum, et incipiens a Scriptura ista, evangelizavit illi Jesum.<\/span> <\/p>\n

36<\/sup>Et dum irent per viam, venerunt ad quamdam aquam: et ait eunuchus: Ecce aqua: quid prohibet me baptizari?<\/span> <\/p>\n

37<\/sup>Dixit autem Philippus: Si credis ex toto corde, licet. Et respondens ait: Credo Filium Dei esse Jesum Christum.<\/span> <\/p>\n

38<\/sup>Et jussit stare currum: et descenderunt uterque in aquam, Philippus et eunuchus, et baptizavit eum.<\/span> <\/p>\n

39<\/sup>Cum autem ascendissent de aqua, Spiritus Domini rapuit Philippum, et amplius non vidit eum eunuchus. Ibat autem per viam suam gaudens.<\/span> <\/p>\n

40<\/sup>Philippus autem inventus est in Azoto, et pertransiens evangelizabat civitatibus cunctis, donec veniret Cæsaream.<\/span> <\/p>\n

‹ Previous<\/a>Next ›<\/a><\/div>\n","page_title":"The Acts of the Apostles, Chapter 8 — Latin Vulgate","book_title":"The Acts of the Apostles","toolbar_title":"The Acts of the Apostles — Ch. 8","prev_url":"\/vulgate\/2\/5\/7","next_url":"\/vulgate\/2\/5\/9","tid":2,"book_id":5,"chapter":8,"num_chapters":28,"trans":"Vulgate","is_rtl":false,"strongs_data":{},"bsb_glosses":{},"book_name":"Acts","canonical_url":"https:\/\/accept.gift\/vulgate\/2\/5\/8","meta_desc":"Facta est autem in illa die persecutio magna in ecclesia quæ erat Jerosolymis, et omnes dispersi sunt per regiones Judææ et Samariæ præter Apostolos. Curaver…"}