{"reader_html":"

RomansChapter 1<\/span><\/h1>\n

1<\/sup>Paulus, servus Jesu Christi, vocatus Apostolus, segregatus in Evangelium Dei,<\/span> <\/p>\n

2<\/sup>quod ante promiserat per prophetas suos in Scripturis sanctis<\/span> <\/p>\n

3<\/sup>de Filio suo, qui factus est ei ex semine David secundum carnem,<\/span> <\/p>\n

4<\/sup>qui prædestinatus est Filius Dei in virtute secundum spiritum sanctificationis ex resurrectione mortuorum Jesu Christi Domini nostri:<\/span> <\/p>\n

5<\/sup>per quem accepimus gratiam, et apostolatum ad obediendum fidei in omnibus gentibus pro nomine ejus,<\/span> <\/p>\n

6<\/sup>in quibus estis et vos vocati Jesu Christi:<\/span> <\/p>\n

7<\/sup>omnibus qui sunt Romæ, dilectis Dei, vocatis sanctis. Gratia vobis, et pax a Deo Patre nostro, et Domino Jesu Christo.<\/span> <\/p>\n

8<\/sup>Primum quidem gratias ago Deo meo per Jesum Christum pro omnibus vobis: quia fides vestra annuntiatur in universo mundo.<\/span> <\/p>\n

9<\/sup>Testis enim mihi est Deus, cui servio in spiritu meo in Evangelio Filii ejus, quod sine intermissione memoriam vestri facio<\/span> <\/p>\n

10<\/sup>semper in orationibus meis: obsecrans, si quomodo tandem aliquando prosperum iter habeam in voluntate Dei veniendi ad vos.<\/span> <\/p>\n

11<\/sup>Desidero enim videre vos, ut aliquid impertiar vobis gratiæ spiritualis ad confirmandos vos:<\/span> <\/p>\n

12<\/sup>id est, simul consolari in vobis per eam quæ invicem est, fidem vestram atque meam.<\/span> <\/p>\n

13<\/sup>Nolo autem vos ignorare fratres: quia sæpe proposui venire ad vos (et prohibitus sum usque adhuc) ut aliquem fructum habeam et in vobis, sicut et in ceteris gentibus.<\/span> <\/p>\n

14<\/sup>Græcis ac barbaris, sapientibus, et insipientibus debitor sum:<\/span> <\/p>\n

15<\/sup>ita (quod in me) promptum est et vobis, qui Romæ estis, evangelizare.<\/span> <\/p>\n

16<\/sup>Non enim erubesco Evangelium. Virtus enim Dei est in salutem omni credenti, Judæo primum, et Græco.<\/span> <\/p>\n

17<\/sup>Justitia enim Dei in eo revelatur ex fide in fidem: sicut scriptum est: Justus autem ex fide vivit.<\/span> <\/p>\n

18<\/sup>Revelatur enim ira Dei de cælo super omnem impietatem, et injustitiam hominum eorum, qui veritatem Dei in injustitia detinent:<\/span> <\/p>\n

19<\/sup>quia quod notum est Dei, manifestum est in illis. Deus enim illis manifestavit.<\/span> <\/p>\n

20<\/sup>Invisibilia enim ipsius, a creatura mundi, per ea quæ facta sunt, intellecta, conspiciuntur: sempiterna quoque ejus virtus, et divinitas: ita ut sint inexcusabiles.<\/span> <\/p>\n

21<\/sup>Quia cum cognovissent Deum, non sicut Deum glorificaverunt, aut gratias egerunt: sed evanuerunt in cogitationibus suis, et obscuratum est insipiens cor eorum:<\/span> <\/p>\n

22<\/sup>dicentes enim se esse sapientes, stulti facti sunt.<\/span> <\/p>\n

23<\/sup>Et mutaverunt gloriam incorruptibilis Dei in similitudinem imaginis corruptibilis hominis, et volucrum, et quadrupedum, et serpentium.<\/span> <\/p>\n

24<\/sup>Propter quod tradidit illos Deus in desideria cordis eorum, in immunditiam, ut contumeliis afficiant corpora sua in semetipsis:<\/span> <\/p>\n

25<\/sup>qui commutaverunt veritatem Dei in mendacium: et coluerunt, et servierunt creaturæ potius quam Creatori, qui est benedictus in sæcula. Amen.<\/span> <\/p>\n

26<\/sup>Propterea tradidit illos Deus in passiones ignominiæ: nam feminæ eorum immutaverunt naturalem usum in eum usum qui est contra naturam.<\/span> <\/p>\n

27<\/sup>Similiter autem et masculi, relicto naturali usu feminæ, exarserunt in desideriis suis in invicem, masculi in masculos turpitudinem operantes, et mercedem, quam oportuit, erroris sui in semetipsis recipientes.<\/span> <\/p>\n

28<\/sup>Et sicut non probaverunt Deum habere in notitia, tradidit illos Deus in reprobum sensum, ut faciant ea quæ non conveniunt,<\/span> <\/p>\n

29<\/sup>repletos omni iniquitate, malitia, fornicatione, avaritia, nequitia, plenos invidia, homicidio, contentione, dolo, malignitate: susurrones,<\/span> <\/p>\n

30<\/sup>detractores, Deo odibiles, contumeliosos, superbos, elatos, inventores malorum, parentibus non obedientes,<\/span> <\/p>\n

31<\/sup>insipientes, incompositos, sine affectione, absque fœdere, sine misericordia.<\/span> <\/p>\n

32<\/sup>Qui cum justitiam Dei cognovissent, non intellexerunt quoniam qui talia agunt, digni sunt morte: et non solum qui ea faciunt, sed etiam qui consentiunt facientibus.<\/span> <\/p>\n

‹ Previous<\/a>Next ›<\/a><\/div>\n","page_title":"Romans, Chapter 1 — Latin Vulgate","book_title":"Romans","toolbar_title":"Romans — Ch. 1","prev_url":"\/vulgate\/2\/5\/28","next_url":"\/vulgate\/2\/6\/2","tid":2,"book_id":6,"chapter":1,"num_chapters":16,"trans":"Vulgate","is_rtl":false,"strongs_data":{},"bsb_glosses":{},"book_name":"Romans","canonical_url":"https:\/\/accept.gift\/vulgate\/2\/6\/1","meta_desc":"Paulus, servus Jesu Christi, vocatus Apostolus, segregatus in Evangelium Dei, quod ante promiserat per prophetas suos in Scripturis sanctis de Filio suo, qui…"}