{"reader_html":"

2 CorinthiansChapter 3<\/span><\/h1>\n

1<\/sup>Incipimus iterum nosmetipsos commendare? aut numquid egemus (sicut quidam) commendatitiis epistolis ad vos, aut ex vobis?<\/span> <\/p>\n

2<\/sup>Epistola nostra vos estis, scripta in cordibus nostris, quæ scitur, et legitur ab omnibus hominibus:<\/span> <\/p>\n

3<\/sup>manifestati quod epistola estis Christi, ministrata a nobis, et scripta non atramento, sed Spiritu Dei vivi: non in tabulis lapideis, sed in tabulis cordis carnalibus.<\/span> <\/p>\n

4<\/sup>Fiduciam autem talem habemus per Christum ad Deum:<\/span> <\/p>\n

5<\/sup>non quod sufficientes simus cogitare aliquid a nobis, quasi ex nobis: sed sufficientia nostra ex Deo est:<\/span> <\/p>\n

6<\/sup>qui et idoneos nos fecit ministros novi testamenti: non littera, sed Spiritu: littera enim occidit, Spiritus autem vivificat.<\/span> <\/p>\n

7<\/sup>Quod si ministratio mortis litteris deformata in lapidibus fuit in gloria, ita ut non possent intendere filii Israël in faciem Moysi propter gloriam vultus ejus, quæ evacuatur:<\/span> <\/p>\n

8<\/sup>quomodo non magis ministratio Spiritus erit in gloria?<\/span> <\/p>\n

9<\/sup>Nam si ministratio damnationis gloria est: multo magis abundat ministerium justitiæ in gloria.<\/span> <\/p>\n

10<\/sup>Nam nec glorificatum est, quod claruit in hac parte, propter excellentem gloriam.<\/span> <\/p>\n

11<\/sup>Si enim quod evacuatur, per gloriam est: multo magis quod manet, in gloria est.<\/span> <\/p>\n

12<\/sup>Habentes igitur talem spem, multa fiducia utimur:<\/span> <\/p>\n

13<\/sup>et non sicut Moyses ponebat velamen super faciem suam, ut non intenderent filii Israël in faciem ejus, quod evacuatur,<\/span> <\/p>\n

14<\/sup>sed obtusi sunt sensus eorum. Usque in hodiernum enim diem, idipsum velamen in lectione veteris testamenti manet non revelatum (quoniam in Christo evacuatur),<\/span> <\/p>\n

15<\/sup>sed usque in hodiernum diem, cum legitur Moyses, velamen positum est super cor eorum.<\/span> <\/p>\n

16<\/sup>Cum autem conversus fuerit ad Dominum, auferetur velamen.<\/span> <\/p>\n

17<\/sup>Dominus autem Spiritus est: ubi autem Spiritus Domini, ibi libertas.<\/span> <\/p>\n

18<\/sup>Nos vero omnes, revelata facie gloriam Domini speculantes, in eamdem imaginem transformamur a claritate in claritatem, tamquam a Domini Spiritu.<\/span> <\/p>\n

‹ Previous<\/a>Next ›<\/a><\/div>\n","page_title":"2 Corinthians, Chapter 3 — Latin Vulgate","book_title":"2 Corinthians","toolbar_title":"2 Corinthians — Ch. 3","prev_url":"\/vulgate\/2\/8\/2","next_url":"\/vulgate\/2\/8\/4","tid":2,"book_id":8,"chapter":3,"num_chapters":13,"trans":"Vulgate","is_rtl":false,"strongs_data":{},"bsb_glosses":{},"book_name":"2 Corinthians","canonical_url":"https:\/\/accept.gift\/vulgate\/2\/8\/3","meta_desc":"Incipimus iterum nosmetipsos commendare? aut numquid egemus (sicut quidam) commendatitiis epistolis ad vos, aut ex vobis? Epistola nostra vos estis, scripta…"}